ދޮންބައްޕައަކު ހަތަރު އަހަރުވަންދެން ކުޑަ ދެ ކުއްޖަކަށް ޖިންސީގޯނާ ކުރި ކަމުގެ ތުހުމަތު
އެ ކުދިންގެ މަންމައަށް އެކަން އިނގުނު ނަމަވެސް ސިއްރު ކޮށްފައިވާ ކަމަށް ތުހުމަތު ކޮށްފައިވޭ
ޖިންސީ އަނިޔާގެ މަންޒަރެއް ދައްކައިދޭ ފޮޓޯއެއް
އއ. އަތޮޅު ރަށެއްގައި ދެ އަންހެން ކުއްޖަކަށް ޖިންސީ ގޯނާ ކުރި މައްސަލައެއް ފެންމަތިވެއްޖެ އެވެ.
ރާއްޖެއެމްވީއަށް އެ އާއިލާއިން ބުނީ އުމުރުން 17 އަހަރާއި، 14 އަހަރުގެ އަންހެން ދެ ކުދިންނަށް ދޮން ބައްޕައެއް ޖިންސީ ގޯނާ ކޮށްފައިވާ ކަމަށާއި، އެ މައްސަލަ 4 އޭޕްރީލް 2025 ގައި ފުލުހުންނަށް ރިޕޯޓު ކޮށްފައިވާ ކަމަށެވެ.
އެ ކުދިންނަށް ޖިންސީ ގޯނާ ކުރާތާ 4 އަހަރަށް ވުރެ ގިނަ ދުވަސްވެފައިވާ ކަމަށާއި، އެކުދިންގެ މަންމައަށް އެކަން އިނގުނު ނަމަވެސް ސިއްރު ކޮށްފައިވާ ކަމަށް ތުހުމަތު ކޮށްފައިވެއެވެ. އާއިލާއަށް މިކަން އެނގުނީ އެކުދިން ދެބެއިންގެ ދެދަރި ކުއްޖަކާ މިކަން ހިއްސާ ކުރުމުން ކަމަށެވެ.
މި މައްސަލައާ ގުޅިގެން މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން ޓީމެއް ރަށަށް އައިސް، ބަޔާން ނަގާފައިވާ ކަމަށާއި، އެކުދިން، އެކުދިންގެ ބޮޑުދައިތައާއި، މާމަގެ ބެލުމުގެ ދަށަށް ގެނެސްފައިވާ ކަމަށް އާއިލާއިން ބުނެފައިވެއެވެ.
މީގެ އިތުރުން އެ ކުދިންގެ ދޮން ބައްޕަ، އެކުދިންނަށް ބިރު ދައްކާފައިވާ ކަމަށާއި، އެކުދިންގެ ބަރަހަނާ ފޮޓޯތަކެއް ލީކުކޮށްލާނެ ކަމުގެ އިންޒާރު ދީފައިވާ ކަމަށް ވެސް އާއިލާއިން ބުނެފައިވެއެވެ.
މި މައްސަލަ ފެންމަތިވުމާ ގުޅިގެން އެމީހާ ހައްޔަރުކުރި ނަމަވެސް ކޯޓު އަމުރެއް ނެތުމުން ދޫކޮށްލާފައިވާ ކަމަށް އާއިލާއިން ބުނެއެވެ.
މި ހާދިސާއާ ގުޅޭގޮތުން ފުލުހުން ގެ ބަހެއް ވަނީ ލިބޭ ގޮތް ނުވެފައެވެ.
