އިސްރާއީލުގެ ޕާސްޕޯޓްގައި ދިވެހިރާއްޖެ އެތެރެވުން ހުއްޓުވުމަށް ހުށަހަޅައިފައިވާ ބިލާމެދު ގޮތެއް ނުނިމި ލަސްވަމުންދާތީ ހުށަހަޅާ ކުއްލި މައްސަލަ ބަލައިނުގަތުމަށް ރައްޔިތުންގެ މަޖިލީހުގެ ރިޔާސަތުން ނިންމައިފި އެވެ.

ހޯމަ ދުވަހު މަޖިލީހުގެ ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ ކެންދޫ ދާއިރާގެ މެމްބަރު މައުރޫފް ޒާކިރު ހުށަހަޅުއްވާފައިވާ އެ މައްސަލައަކީ ކުއްލި މައްސަލައެއްގެ ގޮތުގައި ބަލައިނުގަނެވޭނެ ކަމަށެވެ.

ނާޒިމް ވަނީ މަޖިލީހަށް ހުށަހަޅާ ކުއްލި މައްސަލައަކީ ރައްޔިތުންގެ ނުވަތަ ގައުމުގެ މަސްލަހަތަށް ސީދާ އަސަރު ކުރާފަދަ ބޮޑު ކަމެއް ކުއްލިއަކަށް ދިމާވުމުން އެކަމެއް ސަރުކާރުގެ ސަމާލުކަމަށް ގެނައުމަށް ހުށަހަޅާ މައްސަލަ އެއް ކަމަށް ވިދާޅުވެފަ އެވެ. މީގެ އިތުރުން ސަރުކާރުން ކަމާއި މެދު އަޅާފައިވާ ނުވަަތަ އަޅާފައިނުވާ ފިޔަވަޅަކާމެދު ފާޑުކިޔުމަށް ހުށަހެޅިފައިވާ މައްސަލައަކަށް ވުމާއި މަޖިލީހުގައި ކުރިއަށް ދާ ބިލަކާއި ގުޅޭ ކަމަކަށް ނުވުން ކުއްލި މައްސަލައިގެ ޝަރުތުތަކުގެ ތެރޭގައި ހިމެނޭ ކަމަށް ނާޒިމް ވިދާޅުވި އެވެ.

މައުރޫފް ހުށަހެޅުއްވި ކުއްލި މައްސަލައިގައި ބުނެފައި ވަނީ ފަލަސްތީނުގެ ބިންތަކަށް ވެރިވެގަނެ، އިސްރާއީލުން ފަލަސްތީނު ރައްޔިތުންނާ މެދު ހިންގަމުންދާ ޤަތުލު އާންމުންގެ ތެރެއިން 2023 ވަނަ އަހަރު ދޭން ފެށި، ނަސްލު ނައްތައިލުމުގެ ހަމަލާތައް ދުވަސްކޮޅަކަށް މެދުކަނޑާލުމަށްފަހު، ފާއިތުވެދިޔަ މާރޗް މަހުގެ ތެރޭގައި، އަނެއްކާވެސް، އިސްރޭލުން ފަލަސްތީނުގެ މައުސޫމު ރައްޔިތުންނާ ދެކޮޅަށް ދެމުންދާ ހަމަލާތައް ފަށާފައިވާކަމަށެވެ. އަދި މި ގަތުލު އާންމު ފެށުނުފަހުން މިއަދާ ހަމައަށް 2 އަހަރާއި، 5 މަސް ފާއިތުވެގެން ދިޔައިރުވެސް، އެ މައްސަލައިގައި އިސްރާއީލު ކުށްވެރިން ކުރުން ފިޔަވައި މިކަމާ ގުޅިގެން ހަރުދަނާ އެއްވެސް ފިޔަވަޅެއް އެޅުމަށް ދިވެހި ސަރުކާރުން ވަނީ ނުކުޅެދިފަ ކަމަށް އެ ކުއްލި މައްސަލައިގައި ބަޔާންކޮށްފައިވެއެވެ.

ހަމައެހެންމެ އިސްރާއީލުގެ ޕާސްޕޯޓުގައި ދިވެހިރާއްޖެއަށް އައުން މަނާކުރުމަށް، 2 ޖޫން 2024 ގައި ދިވެހި ރައްޔިތުންގެ ޑިމޮކްރެޓިކް ޕާޓީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އިމިގްރޭޝަން ޤާނޫނަށް އިޞްލާޙެއް ހުށަހެޅުމާއެކު، ހަމަ އެދުވަހުގެ ވަގުތެއްގައި ވަޒީރުންގެ މަޖިލީހުގެ ބައްދަލުވުމެއް ބާއްވަވައި، އިސްރާއީލުގެ ޕާސްޕޯޓު މަނާ ކުރުމަށް ސަރުކާރުން ނިންމަވައިފައިވާކަމަށް އިއުލާނުކޮށްފައިވާކަން އެ ކުއްލި މައްސަލައިގައި ފާހަގަކޮށްދައިވެއެވެ. ނަމަވެސް، މިއަދާ ހަމައަށް މިކަމުގައި ޢަމަލީ ސިފަ ޖެއްސުމަށް ސަރުކާރުގެ ފަރާތުން އެއްވެސް މަސައްކަތެއް ކުރަމުންދާކަމަކަށް ނުފެންނަ ކަމަށް މައުރޫފް ވަނީ ވިދާޅުވެފައެވެ.

10 ޖޫން 2024 ގައި އެ ބިލު މަޖިލީހަށް ބަލައިގަތުމަށް ފާސްކޮށް، މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ވަނީ ފޮނުވާފައެވެ. ނަމަވެސް މިއަދާ ހަމައަށްވެސް މި ބިލާ ގުޅިގެން ކޮމިޓީގެ ބައްދަލުވުމެއްވެސް ބޭއްވިފައި ނުވާކަން މައުރޫފް ފާހަގަކުރެއްވިއެވެ.

އޭގެ އިތުރުން، މި ބިލު ރައްޔިތުންގެ މަޖިލީހުގެ ތެރޭގައި ހުއްޓުވައިފައި އޮންނަތާ 9 މަސް ދުވަސް ވެގެން ދާއިރު، މި ސަރުކާރުން އަދި މި ސަރުކާރުގެ ފުރިހަމަ އަގުލަބިއްޔަތު އޮންނަ މަޖިލީހަށް ހުށަހަޅަން ބޭނުންވާ އެތައް ބިލަކާއި އެހެނިހެން މަސައްކަތްތައް ހުށަހަޅައި، މަދު ގަޑިއިރެއްގެ ތެރޭގައި، ގިނަ ބިލުތަކެއް މި ފާއިތުވެދިޔަ ދުވަސްތަކުގައިވެސް މި މަޖިލީހުން ވަނީ ފާސްކޮށްފަކަން މައުރޫފްގެ ކުއްލި މައްސަލައިގައި ފާހަގަކޮށްފައިވެއެވެ.

އިސްރާއީލުން ހިންގާ ޖަރީމާތަކާ ދެކޮޅަށް ތެދުވުމުގައި ކުޑަވެސް ފަސްޖެހުމެއް ނުހުންނާނެކަމަށް ބުނެ ސަރުކާރުން ތަކުރާރުކޮށް ވަކާލާތުކުރަމުން ދާއިރު، މައްސަލައިގައި ސަރުކާރުގެ ވެރިންގެ އަމަލުތަކުން ދޭހަވަނީ، ސަރުކާރުގެ ނުނިޔަތާއި، ކޮންމެ ކަމެއްގައިވެސް، ބަހާއި އަމަލާ ދިމާ ނުވާ މިންވަރު ކަމަށް މައުރޫފް ވިދާޅުވިއެވެ.

ދިވެހިރާއްޖެ އަކީ ސައްތައިން ސައްތަ މުސްލިމް ޤައުމަކަށް ވީހިނދު،ފަލަސްތީނުގައި، ދަރިފަސްކޮޅެއް ނައްތާލަން އިޒްރޭލުން ހިންގަމުންގެންދާ ޤަތުލު އާއްމުގައި ޝަހީދުވަމުންދާ އެތައް ސަތޭކަ މުސްލިމް އަޙުންނާއި އުޙްތުންގެ ހައްޤުގައި ތެދުވުމަކީ އަޅުގަނޑުމެން ކޮންމެ ދިވެއްސެއްގެ ވާޖިބެއްކަމުގައި ދެކެވަޑައިގަންނަވާ ކަމަށް މައުރޫފް އެ ކުއްލި މައްސަލައިގައި ވިދާޅުވެފައިވެއެވެ.

މުޅި އިސްލާމީ އުއްމަތަށް އިސްރާއީލުން ޖައްސަމުން މިދާ ގިލަންވެރިކަމާއި އާފާތް ކުށްވެރިކޮށް އަޅުގަނޑުމެން އެކަމާއި ކަނޑައެޅިގެން ދެކޮޅުވެރިކަން ހާމަކޮށްދިނުމަށް ޓަކައި، ކޮންމެހެން ކުރަންޖެހޭ ކަމަކަށް، އިތުރު ލަސްތަކަކާ ނުލައި، އިސްރާއީލުގެ ޕާސްޕޯޓް މިހާރުން މިހާރަށް މަނާކުރުމަށް އެ ކުއްލި މައްސަލައިގައި ގޮވާލާފައިވެއެވެ. މި މައްސަލަ އާއި މެދު މަޖިލީހުން އަވަހަށް ގޮތެއް ނިންމައިދިނުމަށް ގޮވާލާ، ރައްޔިތުންގެ މަޖިލީހުގެ އިއްޒަތްތެރި ރައީސްގެ އިސްނެންގެވުމާއެކު އެކަން ކުރިއަށް ގެންގޮސްދެއްވުން އެދިވަޑައިގެންފައިވެ އެވެ.