މުޝްފިގު ހޯދަން ބޮޑު ސަރަހައްދެއް ބަލައިފި، އަދިވެސް ނުފެނޭ
ހޮޅުދޫ ބޯޓުގައި އަލިފާން ރޯވެ އަޑިއަށް ގޮސްފައިވަނީ ތ. އަތޮޅު ވަންދޫއާ ކައިރި އަށް
ގެއްލިގެން ހޯދަމުންދާ އަލީ މުޝްފިގު
އަލިފާން ރޯވެ އަޑިއަށް ދިޔަ 'ހޮޅުދޫ ބޯޓު' އިން ގެއްލުނު އަލީ މުޝްފިގު ހޯދަން ބޮޑު ސަރަހައްދެއް ބަލައިފިއެވެ.
ތ. ހިރިލަންދޫއަށް ދަތުރުކުރަމުން ދަނިކޮށް އަލިފާން ރޯވި "ހޮޅުދޫ ބޯޓު"ން ގެއްލުނު ލ.މާވަށަށް ނިސްބަތްވާ އުމުރުން 25 އަހަރުގެ ޢަލީ މުޝްފިޤް މުޙައްމަދު ޝަރީފް ހޯދުމުގެ މަސައްކަތް އެމްއެންޑީއެފް އިން ކުރަމުން އަންނަ އިރު، މި އޮޕަރޭޝަނުގައި ސަރފޭސް ސަރޗްގެ ގޮތުގައި 53.04 ސްކޮއަރ ނޯޓިކަލް މޭލް ވަނީ ބަލާފައެވެ. އަދި އަންޑަރވޯޓަރ (ޑައިވިންގ) ސަރޗްގެ ގޮތުގައި 64240 އަކަމީޓަރު ވަނީ ބަލާފަައިވާ އިރު، ވައިގެ މަގުން 1545 ސްކޮއަރ މޭލް (4000 އަކަމީޓަރު) ވަނީ ބަލާފައެވެ.
އެމްއެންޑީއެފް ކޯސްޓްގާޑް ޝިޕް ޢާޒީ، އެފްއައިސީ މާފަތް، އެޗްޕީ 114، ޑައިވަރުންނާއި އެއާރ ކޯރގެ ޑްރޯން އަދި އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުން ޢަލީ މުޝްފިޤް ޝަރީފް ހޯދުމުގެ މަސައްކަތް ދަނީ ކުރަމުންނެވެ.
"ހޮޅުދޫ ބޯޓް" ނަމަކަށް ކިޔާ މުދާ އުފުލާ ބޯޓެއްގައި އަލިފާން ރޯވެގެން، އެމްއެންޑީއެފް ސެންޓްރަލް އޭރިއާ ކޮމާންޑް، ކައްދޫ ފަޔަރ ސްޓޭޝަނުގެ ފަޔަރފައިޓަރުން ހަރަކާތްތެރި ވަމުންދާކަން އެމްއެންޑީއެފުން ހާމަކުރީ ބުދަ ދުވަހުގެ ރޭގަނޑު 09:35 ހާއިރު ގައެވެ.
18 މީހުންނާ އެކު ދަތުރުކުރަމުންދިޔަ މުދާ އުފުލާ ބޯޓުގައި އަލިފާން ރޯވިކަމުގެ މަޢުލޫމާތު އެ އިދާރާ އަށް ރިޕޯޓްކޮށްފައި ވަނީ 09:07 ހާއިރު ކަމަށާއި، އެ ރިޕޯޓް ލިބުމާއި އެކު އެމްއެންޑީއެފް ސެންޓްރަލް އޭރިއާ ކޮމާންޑުގެ ކޯސްޓްގާޑު ވަނީ ބޯޓު އޮތް ސަރަހައްދަށް ގޮސްފައި ކަމަށް އެމްއެންޑީއެފުން ވަނީ ބުނެފައެވެ.
އެ އިދާރާ އިން ހާމަކުރި ގޮތުގައި ބޯޓުން ދަތުރުކުރި 18 މީހުންގެ ތެރެއިން 17 މީހުން ވަނީ ސަލާމަތްކޮށްފައެވެ. މި މަސައްކަތުގައި، ތ.އަތޮޅު ޕޮލިސް ސްޓޭޝަނުގެ ފަރާތުން އެމްއެންޑީއެފް ސެންޓްރަލް އޭރިއާ ކޮމާންޑް ކޯސްޓްގާޑަށް ބޮޑު އެހީތެރިކަމެއް ލިބުނު ކަމަށް ވެސް އެ އިދާރާއިން ވަނީ ހާމަކޮށްފައެވެ.
އެމްއެންޑީއެފުން އިތުރަށް ބުނީ މި ހާދިސާގައި އަލިފާން ރޯވި "ހޮޅުދޫ ބޯޓް" ވަނީ ދަންވަރު 02:07 ހާއިރު އަޑިއަށް ގޮސްފައި ވާކަމަށެވެ. ބޯޓުގެ ބައިތައް އޮޔާދާތީ، އެ ސަރަހައްދުން ދަތުރުކުރައްވާ ފަރާތްތަކުން މިކަމަށް ސަމާލުކަން ދެއްވުމަށާއި ރޭގަނޑު މި ސަރަހައްދުން ދަތުރުކުރައްވާ ފަރާތްތަކުން ޚާއްޞަ ސަމާލުކަމެއް ދެއްވުމަށް އެމްއެންޑީއެފުން ވަނީ އިލްތިމާސްކޮށްފައެވެ. އަދި މުދަލާއެކު އުޅަނދު އަޑިޔަށް ގޮސް، އުޅަނދުގެ ބައިތައް އޮޔާދާތީ ދަތުރުކުރާ ފަރާތްތަކުން ސަމާލުކަން ދިނުމަށް ވެސް އެމްއެންޑީއެފްއިން ވަނީ އިލްތިމާސްކޮށްފަ އެވެ.
ހޮޅުދޫ ބޯޓުގައި އަލިފާން ރޯވެ އަޑިއަށް ގޮސްފައިވަނީ ތ. އަތޮޅު ވަންދޫ ކައިރި އަށެވެ.
