މެންބަރުންގެ މުސާރަ ކުޑަކޮށް އިނާޔަތްތައް ކުޑަކުރަން ގޮވާލާ ޕެޓިޝަނެއް
1 އެޕްރީލު 2025 | އަންގާރަ 08:42މުސާރަ ކުޑަކުރުމުގެ އިތުރުން ވެސް ބައެއް ކަންކަމަށް އެ ޕެޓިޝަންގައި ވަނީ ޑިމާންކޮށްފަ
ރައްޔިތުންގެ މަޖިލީހުގެ 2025 ވަނަ އަހަރު ދައުރުން ބޭރުން ބޭއްވި ޖަލްސާގެ ތެރެއިން
ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކޮށް އިނާޔަތްތައް ކުޑަކުރަން ގޮވާލާ ޕެޓިޝަނެއްގައި ސޮއިކުރުމުގެ މަސައްކަތް ފަށައިފިއެވެ.
އާންމު ބައެއްގެ އިސްނެގުމާއި އެކު އެކުލަވާލާފައިވާ މި ޕެޓިޝަނާއި އެކު މީސްމީޑިއާގައި އާއްމުން ދަނީ އެ ޕެޓިޝަން އަށް ތާއީދުކޮށް ވާހަކަދައްކަމުންނެވެ.
އެ ޕެޓިޝަންގައި ބުނެފައި ވަނީ ރާއްޖޭގެ އިޤްތިޞާދަށް މާލީ ބުރަ ބޮޑު ވެފައި ވާއިރު، ރާއްޖޭގެ ކަންކަމާއި މެދު ކަންބޮޑުވާ ރައްޔިތުންގެ ހައިސިއްޔަތުން، ރައްޔިތުންގެ މަޖިލީހުގެ މެންބަރުންނަށް ލިބޭ ބޮޑު މުސާރަ އާއި، ކޮމިޓީ އެލަވަންސް އާއި، ޕްރީމިއަމް ހެލްތު އިންޝުއަރެންސްގެ އިނާޔަތްތަކާއި މެދު ކަންބޮޑުވާ ކަމަށެވެ.
ދިވެހިންގެ ޤައުމީ ދަރަނި ބޮޑުވުމާއި، ބަޖެޓް ޑެފިސިޓް ބޮޑުވުން ހިމެނޭ ގޮތަށް، ބޮޑެތި އިޤްތިޞާދީ ގޮންޖެހުންތަކާ ކުރިމަތިލާން ޖެހިފައިވާ މި ފަދަ ދަނޑިވަޅެއްގައި، ސަރުކާރުން ކޮންމެހެން ކުރަން ނުޖެހޭ ޚަރަދުތައް ކުޑަކުރުމަށް ފިޔަވަޅުތައް އެޅުން ކޮންމެހެން ބޭނުންތެރި ކަމަށް ޤަބޫލުކުރާ ކަމަށް އެ ޕެޓިޝަންގައި ވަނީ ބުނެފައެވެ.
މިވަގުތު މަޖިލިސް މެމްބަރުންނަށް މުސާރައިގެ އިތުރުން ބޮޑެތި ކޮމިޓީ އެލަވަންސްތައް ލިބެމުންދާ އިރު އެކަމުގެ ސަބަބުން މެމްބަރުންގެ ޖުމްލަ އާމްދަނީ ވަރަށް ބޮޑަށް އިތުރުވެގެންދާ ކަމަށް އެ ޕެޓިޝަންގައި ވަނީ ބަޔާންކޮށްފައެވެ. މީގެ އިތުރުން އާންމު ރައްޔިތުންނަށް ލިބޭ އާސަންދަ ސްކީމަށް ވުރެ ރަނގަޅު މޮޅު ޕްރީމިއަމް ހެލްތު އިންޝުއަރެންސް ޕެކޭޖެއް ވެސް އެމީހުންނަށް ލިބޭނެކަން އެ ޕެޓިޝަންގައި ފާހަގަކޮށްފައިވެއެވެ.
އެހެންކަމަށް ވާއިރު މި ތަފާތަކީ އިންސާފުވެރި ނޫން އަދި ހަމަޖެހޭ ކަމެއް ނޫން ކަމަށާއި ހާއްސަކޮށް އާދައިގެ ދިވެހިންގެ ދިރިއުޅުމުގެ ހަރަދު ބޮޑުވުމާއި މާލީ ނުތަނަވަސްކަމާ ކުރިމަތިލާން ޖެހިފައިވާ ވަގުތުތަކުގައި އެއީ ބަލައިގަނެވޭ ކަމެއް ނޫން ކަމަށް އެ ޕެޓިޝަންގައި ވަނީ ބުނެފައެވެ.
މުސާރަ ކުޑަކުރުމުގެ އިތުރުން ވެސް ބައެއް ކަންކަމަށް އެ ޕެޓިޝަންގައި ވަނީ ޑިމާންކޮށްފައެވެ.
އޭގެ ތެރެއިން ފުރަތަމަ ކަމަކީ މެމްބަރުންނަށް މިހާރު ކޮމިޓީ އެލަވަންސް އުވާލުމެވެ. އެ ޕެޓިޝަންގައި ބުނެފައި ވަނީ މަޖިލިސް މެންބަރުންގެ މަސައްކަތަށް މިހާރުވެސް ރަނގަޅު މުސާރަ އެއް ލިބޭ ކަމަށެވެ. އަދި ކޮމިޓީގައި ބައިވެރިވުމަށް ދޭ އިތުރު އެލަވަންސަކީ ކޮންމެހެން ކުރަން ނުޖެހޭ ހަރަދެއް ކަމަށާއި އެކަން ނައްތާލަން ޖެހޭ ކަމަށް އެ ޕެޓިޝަންގައި ބުނެފައިވެއެވެ.
ދެވަނަ ކަމަކީ ހެލްތު އިންޝުއަރެންސްގެ އިނާޔަތްތައް ހަމަހަމަކުރުމެވެ. އެ ޕެޓިޝަންގައި ބުނެފައި ވަނީ ރައްޔިތުންގެ މަޖިލީހުގެ މެމްބަރުންނަށް ވެސް އާންމު ރައްޔިތުންނަށް ލިބޭ އާސަންދަ ހެލްތު އިންޝުއަރެންސް ސްކީމް އެއް ހައްގުވާ ކަމަށެވެ. އަދި އިންތިޚާބުވެފައިވާ މަންދޫބުންނަށް އެމީހުން ހިދުމަތްދޭ ރައްޔިތުންނަށް ނުލިބޭ ޕްރީމިއަމް ހެލްތްކެއާ ކަވަރޭޖް ލިބުމުގެ އެއްވެސް ހަމަޖެހޭ އުސޫލެއް ނެތް ކަމަށް އެ ޕެޓިޝަންގައި ބަޔާންކޮށްފައިވެއެވެ.
އެ ޕެޓިޝަންގައި ވަނީ ކުރީގެ މަޖިލިސް މެންބަރުންގެ އިނާޔަތްތައް ހުއްޓުވަން ވެސް ގޮވާލާފައެވެ.
މީގެ އިތުރުން މި ސިޔާސަތުތައް އިސްލާހުކޮށް، އާންމު ފައިސާ އިތުރަށް ޒިންމާދާރުކަމާ އެކު ދޫކުރެވޭތޯ ބެލުމަށް އަވަސް ފިޔަވަޅުތަކެއް އެޅުމަށް ރައްޔިތުންގެ މަޖިލީހަށް ވަނީ ގޮވާލާފައެވެ. ހުރިހާ ދިވެހިންނަށް މިއަށްވުރެ ހަމަހަމަ އަދި ދެމެހެއްޓެނިވި މުސްތަޤްބަލެއް ބިނާކުރުމަށް އެކުގައި މަސައްކަތް ކުރުމަށް ވެސް އެ ޕެޓިޝަންގައި ވަނީ ގޮވާލާފައެވެ.
