12 ރަށެއްގައި ކުޑަކުދިންގެ ޕާކު ތަރައްޤީކުރުމަށް ސަރުކާރު ހިއްސާވާ ކުންފުނިތަކަށް!
މިސޮއިކުރި ކުޑަކުދިންގެ ޕާކުތައް ކުރިއަށް އޮތް 6 މަސްދުވަހުގެ ތެރޭ ނިންމުމަށް ވަނީ ހަމަޖެހިފައި
ކުޑަކުދިންގެ ޕާކު ތަރައްޤީކުރުމަށް ޙަވާލުރުމުގެ ރަސްމިއްޔާތުގެ ތެރެއިން
ކުޑަކުދިންގެ ޕާކު ނެތް 12 ރަށެއްގައި ކުޑަކުދިންގެ ޕާކު ތަރައްޤީކުރުމުގެ މަސައްކަތް މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސްއިން ސަރުކާރު ހިއްސާވާ ކުންފުނިތަކަށް ހަވާލުކޮށްފި އެވެ.
މި 12 ރަށުގައި ޕާކު ތަރައްޤީކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތު އޮތީ ސްޓެލްކޯގެ 5 ވަނަ ފަންގިފިލާގެ އޮޑިޓޯރިއަމްގަ އެވެ.
މި ރަސްމިއްޔާތުގައި ށ. ފީވަކާއި، ނ. ހެނބަދޫއާއި، ނ. މާޅެންދޫއާއި އަދި ނ. ކުޑަފަރީގެ އިތުރުން މ. ވޭވަށާއި، މ. މަޑުއްވަރީގައި ޕާކު ތަރައްޤީކުރުމަށް ސޮއިކުރީ ފެނަކައާއެކުގަ އެވެ. ށ. ކޮމަންޑޫއާއި، ނ. މަނަދޫއާއި، ނ. ފޮއްދޫއާއި އަދި ފ. ނިލަންދޫގައި ޕާކު ތަރައްޤީކުރުމަށް ސޮއިކުރީ އެމްޓީސީސީއާއެކުގަ އެވެ. ނ. ކެނދިކުޅުދޫއާއި، ނ. ވެލިދޫގައި ޕާކު ތަރައްޤީކުރުމަށް ސޮއިކުރީ އާރުޑީސީއާއެކުގަ އެވެ.
މި އެއްބަސްވުންތަކުގައި މިނިސްޓްރީގެ ފަރާތުން ސޮއިކުރެއްވީ ޕާރމަނަންޓް ސެކްރެޓަރީ ޑރ. ފާޠިމަތު މުނާ އެވެ. ފެނަކާގެ ފަރާތުން ސޮއިކުރެއްވީ އެ ކުންފުނީ އެމްޑީ މޭޖަރ ރިޓެއާޑް މުޙައްމަދު ނަޖާޙެވެ. އެމްޓީސީސީން ސޮއިކުރެއްވީ އެ ކުންފުނީގެ އެމްޑީ ޑީސީޕީ ރިޓެއާޑް އަޙްމަދު ސައުދީއެވެ. އާރުޑީސީން ސޮއިކުރެއްވީ އެމްޑީ ބްރެގޭޑިއަރ ޖެނަރަލް ރިޓެއާޑް ޢަލީ ޒުހައިރެވެ.
ޕާކުތައް ތަރައްޤީކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ޕާކުތައް ތަރައްޤީ ކުރުމަށް ހަމަޖެހިފައިވާ ރަށްތައް ހިމެނޭ ދާއިރާތަކުގެ ރައްޔިތުންގެ މަޖިލީހުގެ މެންބަރުން ބައިވެރިވެވަޑައިގެންނެވިއެވެ.
މިސޮއިކުރި ކުޑަކުދިންގެ ޕާކުތައް ކުރިއަށް އޮތް 6 މަސްދުވަހުގެ ތެރޭ ނިންމުމަށް ވަނީ ހަމަޖެހިފަ އެވެ.
