ފުރިހަމަ މުއުމިނަކީ ދުވަހަކު ވެސް ހެޔޮ ޢަމަލުކުރުމަކަށް އަލްވަދާއު ކިޔާނެ މީހެއް ނޫން - ހުތުބާ
ބައެއް މޫސުމް ތަކުގައި ނުވަތަ ދުވަސްވަރުގައި އަޅުކަން ކުރުން އިތުރުވާކަން ފާހަގަކޮށް ހުކުރު ހުތުބާގައި ބުނެފައި ވަނީ ރަމަޟާން މަހަކީ އެފަދަ މަހެއް ކަމަށް
ހުކުރު ނަމާދުގެ ތެރެއިން
ފުރިހަމަ މުއުމިނަކީ ދުވަހަކު ވެސް ހެޔޮ ޢަމަލުކުރުމަކަށް އަލްވަދާއު ކިޔާނެ މީހެއް ނޫން ކަމަށް ހުކުރު ހުތުބާގައި ބުނެފިއެވެ.
ރަމަޟާން މަހަށް ފަހު ހެޔޮ ޢަމަލުކުރުން މަތީ ދެމިތިބުމަށް ހުކުރު ހުތުބާގައި ވަނީ އިރުޝާދު ދީފައެވެ. އެގޮތުން ހެޔޮ އަމަލުތައް މަތީ ދެމި ތިބުމުގެ މުހިންމު ކަމަށް ހުތުބާގައި ވަނީ ބަލާލާފައެވެ. މަރު އިންސާނާ އާއި ބައްދަލުކުރުމަށް ދާންދެން ހެޔޮ އަމަލުކުރުމަށް ހުތުބާގައި އިރުޝާދު ދީފައިވެއެވެ.
ނިމިގެން މި ދާ ރަމަޟާން މަހު ތިމާގެ އަމަލުތައް ހުރިގޮތަށް ވިސްނާ، ރަމަޟާން މަހާއި އެއްފަދައިން ފަރުޟު ނަމާދަށް ރައްކާތެރިވުމަށް ހުތުބާގައި ނަސޭހަތްތެރި ވެފައިވެއެވެ. އަދި ކޮންމެ ދުވަހަކު ވެސް ގުރުއާނުން މިންވަރެއް ކިޔެވުމަށް ނަސޭހަތްތެރިވެފައިވެއެވެ.
މުއުމިނުންނަކީ، ވަކި މަހެއްގައި، ނުވަތަ ވަކި މޫސުމެއްގައި އަޅުކަން ކުރަން ޖެހޭ ބައެއް ނޫންކަން ހުކުރު ހުތުބާގައި ވަނީ ބަޔާންކޮށްފައެވެ. އަދި މުއުމިނުންގެ މުޅި ޙަޔާތުގައި ވެސް އަޅުކަންކުރާން ޖެހޭނެކަން ހުތުބާގައި ވަނީ ހަނދާންކޮށްދީފައެވެ.
ރަމަޟާން މަސް މުސްލިމުންނާއި އަލްވަދާއު ކީ ނަމަވެސް އެ މަހުގެ ވެރި ﷲ ދިރިދެމިވޮޑިގެންވާކަމަށެވެ. އެހެންކަމުން
މުއުމިނުންނަށް އޮތީ ހެޔޮ އަމަލުތައް މަތީ ދެމި ތިބުން ކަމަށް ހުތުބާގައި ބަޔާންކޮށްފައިވެއެވެ. މީގެ އިތުރުން އެހެންކަމުން އޮތީ ހެޔޮ ޢަމަލު ކުރުންމަތީ ދެމިތިބުންކަމަށާއި އަޅުކަންކުރުމަކީ އިންސާނުންގެ މައްޗަށް ވާޖިބު ކަމެއް ކަމަށް ހުކުރު ހުތުބާގައި ބުނެފައިވެއެވެ.
ބައެއް މޫސުމް ތަކުގައި ނުވަތަ ދުވަސްވަރުގައި އަޅުކަން ކުރުން އިތުރުވާކަން ފާހަގަކޮށް ހުކުރު ހުތުބާގައި ބުނެފައި ވަނީ ރަމަޟާން މަހަކީ އެފަދަ މަހެއް ކަމަށެވެ. ރަމަޟާން މަސް މުސްލިމުންނާއި ވަކިވަނީ، ޝައްވާލު މަހާއި އެކުގައި ކަމަށް ވާއިރު އެ މަހުގެ ފުރިހަމަ ސަވާބު ހޯދުމަށް މަސައްކަތް ކުރުމަށް ހުތުބާގައި ވަނީ ބާރު އަޅާފައެވެ.
