ސަރުކާރު ފާލުން ނެއްޓި ގާނޫނުއަސާސީ ބަދަލުކޮށް ވެރިކަން ކުރަނީ ގޮށްމުށުގެ ބާރުން - މާޒް
މުޢިއްޒުގެ ވިސްނުންފުޅަކަށްވީ ވެރިކަން ލިބި، ހުރިހާ ބާރުތަކެއް ޖަމާކޮށްފައި ގޮށްމުށުގެ ބާރުން ވެރިކަންކުރެއްވުން
މާޒް ސަލީމް ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަނީ 26 މާޗް 2025
ސަރުކާރު ފާލުން ނެއްޓި ގާނޫނުއަސާސީ ބަދަލުކޮށް ވެރިކަން ކުރަނީ ގޮށްމުށުގެ ބާރުން ކަމަށް މާޒް ސަލީމް ވިދާޅުވެއްޖެ އެވެ.
އެމްޑީޕީގެ މުޒާހަރާތަކުގައި އިސްކޮށް ހަރަކާތްތެރިވާ މާޒް ސަލީމް، ރާއްޖެ ޓީވީގެ ފަލަސުުރުހީ ޕްރޮގްރާމުގައި ވާހަކަ ދައްކަވަމުން ވވިދާޅުވީ ސަރުކާރު އޮތީ ފާލުން ނެއްޓި ޤާނޫނުއަސާސީ ލައްޕާފައި ބޭނުންގޮތަކަށް މަސައްކަތްކުރާ ގޮތަށް ކަމަށެވެ. އަދި ރައީސް މުޢިއްޒުގެ ވިސްނުންފުޅަކަށްވީ ވެރިކަން ލިބި، ހަމައެއާއެކީގައި ރައްޔިތުންގެ މަޖިލީހުގެ މެޖޯރިޓީ ލިބި ވަޑައިގަތުމުން ހުރިހާ ބާރުތަކެއް ޖަމާކޮށްފައި، ޤާނޫނުއަސާސީއާ ޚިލާފަށް ގާނޫނުތައް ބަދަލުކޮށްގެން ގޮށްމުށުގެ ބާރުން ވެރިކަންކުރައްވަން ކަމަށެވެ.
ނަމަވެސް ރައްޔިތުންގެ ތެރޭގައި ގާނޫނުތައް ދަންނަ މީހުން ތިބޭނެ ކަމަށާއި، އެކަންކަން ދިރާސާކުރާ މީހުން ކަންކަ ބެލުމަށްފަހު ސަރުކާރާއި ދެކޮޅަށް މުޒާހަރާ ކުރަން ނުކުމެފައިވާ ކަމަށެވެ. މި ސަރުކާރުގެ އަނިޔާވެރިކަން ހުރި މިންވަރަކީ ރާއްޖެޓީވީ ކައިރީގައި ވެސް ބްރޯޑްކާސްޓިންގ ކޮމިޝަންގެ ބޭފުޅުން ދަންފަޅި ބަހައިގެން ތިބެނީ ޓީވީގައި ކިޔަނީ ކީކޭތޯ ބައްލަވަން ކަމަށެވެ. އަދި އެއީ މި ސަރުކާރުގެ އަނިޔާވެރިކަން ހުރި މިންވަރު ކަމަށާއި، މިއީ ދުވަހަކުވެސް ދިވެހިރާއްޖޭގައި މި ފަހުގެ ތާރީހުގައި ވެރިކަން ކުރިއިރު ފެނިވަޑައިގެންނެވި މަންޒަރެއް ނޫން ކަމަށް މާޒް ވިދާޅުވި އެވެ.
މިއާއެކު އެއްޗެއް ބުނެފައި އިނިއްޔާ ހުރިހާ ގާނޫނުތައް ބޯމައްޗަށް ލައިގެން މި ދުވަނީ އަޅުގަނޑުމެން ކުޑައިރުގައި އަޅުގަނޑުމެންނަށް އަޑުއިވޭ، އަޅުގަނޑުމެންނަށް ފެނޭ މަގުމަތީގައި އުޅޭނެ ކޭންސިންގ ކިޔާ މީހެއް. އޭނާ ދިމާލަށް ކޭންސިންގ ހަމަ ގޮވާލީ، ހަމަ ފަހަތުން އޭނަ އަންނާނެ. ހަމަ އެ ބީދައިން އިނގޭތޯ. މި ޤައުމުގެ ވެރިޔަކަށް ހުރި މީހާ އަޅުގަނޑުމެންނަށް މި ފެންނަނީ އެ ބީދައިން މަސައްކަތްކުރަމުންދާ ތަން. ބަޔަކު ޓީވީއެއް އަރައި ވާހަކައެއް ދައްކައިފި ނޫނީ ތަނެއްގައި ވާހަކަދައްކައިފި، ސަރުކާރު މި ވަނީ އެ ގޮތަށް.މާޒް ސަލީމް
މާޒް ވިދާޅުވީ މި ސަރުކާރުގެ ކޮރަޕްޝަން ވެސް އޮތީ ހައްދުފަހަނައަޅާފައި ކަމަށާއި، ހުރިހާ ދިމާލަކުން އެންމެން އަންބާކިޔާ ވައްކަން ކުރަމުންދާ ކަމަށެވެ. ޤައުމުގެ ތިޖޫރީއަށް ނުބަލާ ކަމަށާއި، އެހެން ކަމަކަށް ނުބަލާ ކަމަށެވެ. އަދި ޖެހުނު ތާކުން، ޖެހުނު މީހަކު ވައްކަންކުރަމުން ދާ އިރު، ވައްކަންކުރާ މީހުންނަށް ހާސް ލައިސަންސެއް މި ސަރުކާރުން ދީފައި އޮންނަ ކަމަށެވެ.
ރައްޔިތަކަށް އެނގިއްޖިއްޔާމު، އެތަނަކުން ވަކިކޮށްފައި އަނެއްކާވެސް ކޮންމެވެސް އެހެން ތަނަކަށް ލަނީ އެތަނުގައި އެ އަޑު ކެނޑޭ ހިސާބަށް. އެއީ ކުރަމުންދާ ކަމަކީ. އެހެންވީމާ، މި ވާ ގޮތަކީ އަސްލުގެ ރައްޔިތުން ނުކުމެ މި އަޑު އުފުލާ ފަދައިން، ހުރިހާ މީހުން ނުކުމެ އަޑެއް ނުއުފުލާނެ. މީގެތެރޭގައި އެ އަޑު އުފުލަން ބަޔަކު ތިބޭނެ. އެކަމަކު ދެކޮޅަށް ވަކާލާތުކުރާ މީހުން ތިބޭނެ. އެ ތިބެނީ އަސްލުގެ ރައްޔިތުން ޙައްޤުގައި އެކަން ކުރަން ފެށިގެން ވާ ގޮތަކީ، މީނައަށް [ރައީސް މުއިއްޒު] ކަމުނުގޮސްގެން އަނިޔާދެނީ. ދެން ތި ވިދާޅުވާހެން އަޅުގަނޑު ވެސް ފުލުސް އޮފީހަށް ގެންދިޔައީ. ފުލުސް އޮފީހަށް ގެންގޮސް ނުވަތަ ދަޢުވާއަށް ކުރަން ފޮނުވައި ނުވަތަ ޖަލަށް ލާބަޔަކު ހެދިކަމުގައި ވީނަމަވެސް، އަސްލުގައި އެއަޑެއް ނުކެނޑޭނެ.މާޒް ސަލީމް
މާޒް ވިދާޅުވީ ޤާނޫނުއަސާސީއާ ޚިލާފަށް ވެރިޔަކު ކަންކަން ކުރަމުން އަންނަ ކަމަށާއި، ރައީސުލްޖުމްހޫރިއްޔާ ކަންކަން ކުރައްވަން ޖެހޭނީ ޤާނޫނުއަސާސީއާ އެއްގޮތަށް ކަމަށެވެ. ހުރިހާ ރައްޔިތުން ތިބެނީ ގާނޫނެއް ހަދައިގެން އެއަށް ތަބާވެގެން ކަމަށާއި، އެ ޤާނޫނުއަސާސީ ރައްޔިތުން ދެނީ ވެރިކަމަށް އަންނަ މީހާ އަށް ކަމަށެވެ.
ނަމަވެސް ގާނޫނުތައް ބައިޕާސްކޮށްފައި، ގާނޫނުތައް ބޭނުންގޮތަކަށް ބަދަލުކޮށް، ހަދަމުންދާއިރު، ބަދަލުކުރެވޭނެ ކަންކަމާއި ނުކުރެވޭނެ ކަންކަން އަދި ރައްޔިތުންގެ ހިޔާލާއި މަޝްވަރާ ހޯދަންޖެހޭ ކަންކަން ވެސް ހުންނާނެކަމަށް މާޒް ވިދާޅުވި އެވެ. ނަމަވެސް މިއިން އެއްވެސް ކަމަކަށް ބައްލަވާ ނުލައްވާ ރައީސް މުއިއްޒު ގެންދަވަނީ ހިތުހުރި ގޮތަކަށް އަމަލުކުރައްވަމުން ކަމަށް މާޒް ވިދާޅުވި އެވެ.
