ބީއެމްއެލްގެ ފައިސާތައް ސަރުކާރުގެ ޕީއާރަށް ހުސްކުރަނީ
ބޭންކް އޮފް މޯލްޑިވްސް (ބީއެމްއެލް) ގެ ފައިސާތަކުން މިސަރުކާރުގެ ޕީއާރު ކުރުމަށް ބޭނުންކުރަމުން
ދ. ރިނބުދޫގައި އަލަށް ޤާއިމްކުރި ބީއެމްއެލް އޭޓީއެމް ޚިދުމަތް ރައީސް އިފްތިތާހުކޮށްދެއްވަނީ
ބޭންކް އޮފް މޯލްޑިވްސް (ބީއެމްއެލް) ގެ ފައިސާތައް ސަރުކާރުގެ ޕީއާރުއަށް ހުސްކުރަން ފަށައިފި އެވެ.
އެގޮތުން މީގެ ކުރިންވެސް ބީއެމްއެލްއިން ރަށްރަށުގައި އޭޓީއެމް ބެހެއްޓުމުގެ މަސައްކަތް ކުރަމުން އައި ނަމަވެސް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވާ ކަމެއްގެ ގޮތުގައި ދެއްކެވުމަށް ބީއެމްއެލްއިން އަޅާ އޭޓީއެމްތަކަކީ މި ސަރުކާރުން ކުރާ ކަމެއްގެ ގޮތުގައި ދެއްކުމަށް އަންނަނީ މަސައްކަތް ކުރަމުންނެވެ.
އެގޮތުން ރަށްރަށުގައި މިދިޔަ ދައުރުގައި ހަދަން ފެށި އޭޓީއެމްތައް ހުޅުވުމުގެ ނަމުގައި ސަރުކާރުގެ ޕީއާރު ރަނގަޅުކުރުމަށް އަންނަނީ ބޭންކް އޮފް މޯލްޑިވްސްގެ ހަރަދުގައި ސަރުކާރުގެ މިނިސްޓްރީތަކުގެ މިނިސްޓަރުންނާއި އިސްވެރިން ދަތުރުތައް ކުރަމުންނެވެ. އަދި މި ދަތުރުތަކުގައި ބީއެމްއެލްއިން ސީ ޕްލޭން ޗާޓަރުކޮށް ރަށްރަށުގައި ހަދާފައިވާ އޭޓީއެމްއެތައް ހުޅުވުމަށް މިނިސްޓަރުން ދަނީ ދަތުރުކުރަމުންނެވެ.
އެގޮތުން މި ސަރުކާރުގައި އިގްތިސާދު މެނޭޖްކުރަން ނޭނގި ކަންކަން ބޮއްސުންލާފައިވާ މިނިސްޓްރީގެ މިނިސްޓަރު މުހައްމަދު ސައީދު އާއި، ލާމަރުކަޒީ ނިޒާމް ސަރުކާރުގެ ކޮންޓްރޯލުގެ ދަށަށް ގެންނަން އައްޔަންކުރި ސިޓީސް މިިނިސްޓަރު އާދަމް ޝަރީފުގެ އިތުރުން، ރައީސް އޮފީހުގައި ސިޔާސީ އިސް މަގާމެއްގައި ހުންނެވުމަށްފަހު، ބީއެމްއެލްގެ ކޮންޓްރޯލް ނެގުމަށް ސަރުކާރުން އައްޔަން ކުރި ސީއީއޯ މުހައްމަދު ޝަރީފް ބައިވެރިވެ ވަޑައިގަންނަވަ އެވެ.
މީގެ ކުރިން ބީއެމްއެލްއިން ރަށްރަށުގައި ގާއިމްކުރާ އޭޓީއެމްތައް ހުޅުވަނީ ރަށު ކައުންސިލުން ބާއްވާ އިވެންޓެއްގައެވެ. ނަމަވެސް މި ސަރުކާރު ވެރިކަމަށް އައި ފަހުން ރަސްމީ ދަތުރަކާއި ދިމާނުވި ނަމަވެސް ބޭންކުން ހަރަދުކޮށްގެން ސަރުކާރުގެ އިސްވެރިންނާއެކު ޗާޓަރ ފުލައިޓްތަކުގައި ރަށްރަށަށް ގޮސް އޭޓީއެމް ހުޅުވުމުގެ ރަސްމިއްޔާތު އަންނަނީ ބާއްވަމުންނެވެ.
