ބީއެމްއެލްގެ ހިއްސާގެ އަގު ބޮޑުތަނުން ވެއްޓި، އިންވެސްޓަރުންގެ ކަންބޮޑުވުން!
2023 އަހަރަކީ ބޭންކަށް އެންމެ ރަނގަޅު މާލީ ނަތީޖާއެއް ހޯދުނު އަހަރު
ބޭންކް އޮފް މޯލްޑިވްސް (ބީއެމްއެލް)
ބޭންކް އޮފް މޯލްޑިވްސް ހިއްސާގެ މޫނުމަތީ އަގު ބޮޑުތަނުން ދަށްވެ އިންވެސްޓަރުން ކަންބޮޑުވުން އިންތިހާއަށް ގޮސްފިއެވެ.
ރާއްޖޭގެ މައި ބޭންކް ކަމަށްވާ ބީއެމްއެލްއަކީ ހިއްސާދާރުންނަށް ބޮޑެތި ފާއިދާތަކެއް ވަމުން އަންނަ ކުންފުންޏެއް ކަމަށްވާއިރު، ހިއްސާގެ މޫނުމަތީ އަގު ބޮޑުތަނުން ދަށަށް ދިޔައީ ސަރުކާރުން ބީއެމްއެލްގެ ބޯޑަށް ނުފޫޒު ފޯރުވައި، ދުވަހުން ދުވަހަށް ކުރަންޖެހޭ ކަންކަން ނިންމުމުގައި ރައީސް އޮފީހުން ނިންމުންތައް ނިންމަމުންދާތީ ކަމަށް އިތުބާރުހުރި ގޮތަކަށް ރާއްޖެއެމްވީއަށް މަޢުލޫމާތުލިބިފައިވެ އެވެ.
ރައްޔިތުން ހިއްސާވާ ދިވެހިންގެ ބޭންކަށް ރައްޔިތުންގެ އިތުބާރު ގެއްލި ހިއްސާގެ ދަށަށްދާން ފެއްޓުމަކީ ބީއެމްއެލްގެ އިންވެސްޓަރުން ނުހަނު ކަންބޮޑުވުން ފާޅުކުރަމުންދާ ކަމެކެވެ.
ނަން ނުޖެހުމަށް ޝަރުތުކޮށް ރާއްޖެއެމްވީ އާއި ވާހަކަދެއްކި ބައެއް އިންވެސްޓަރުން ބުނެފައިވަނީ މިފަދަ ގޮތަކަށް ސަރުކާރުގެ ނުފޫޒު ބީއެމްއެލްއަށް ފޯރުމުން މިއީ އިންވެސްޓަރުންނަށް ލިބޭ ވަރަށް ބޮޑު ގެއްލުމެއް ކަމަށެވެ.
ސްޓޮކް މާރކެޓް އެކްސްޗޭންޖްގެ ތަފާސް ހިސާބުތަކަށްބަލާއިރު، ނިމިދިޔަ އެމްޑީޕީ ސަރުކާރުގައި އެވްރެޖްކޮށް 750ރ. އިން މަތީގައި ހުރި ހިއްސާގެ އަގުތައް މިސަރުކާރު އައި ހިސާބުން، ހިއްސާގެ މޫނު މަތީ އަގު ދުވަހަކަށްވުރެ ދުވަހެއް ދަށްވަމުންގޮސް މިހާރު ހުރީ 670ރ. އަށް ދަށަށް ގޮސްފައެވެ. އެހެންކަމުން މިއީ ހިއްސާދާރުންގެ ކަންބޮޑުވުން އޮތް ކަމެއް ކަމަށް ގިނަ ހިއްސާދާރުންދަނީ ބުނަމުންނެވެ.
2023 އަހަރަކީ ބޭންކަށް އެންމެ ރަނގަޅު މާލީ ނަތީޖާއެއް ހޯދުނު އަހަރު ކަމުން އެއަހަރު ހިއްސާދާރުންނަށް ހިއްސާ އަކަށް 50ރ. ބަހަން ވަނީ ނިންމާފަ އެވެ.
2023 އަހަރު ޓެކުހަށް ކެނޑުމަށް ފަހު ބީއެމްއެލްގެ ފައިދާގެ ގޮތުގައި 2.07 ބިލިއަން ރުފިޔާ ލިބިފައިވެ އެވެ. މިއާ އެކު ހިއްސާ އަކަށް ބަހަން ކަނޑައެޅި 50ރ. އަކީ މިހާތަނަށް އެ ބޭންކުން ހިއްސާ ދާރުންނަށް ފައިދާގެ ގޮތުގައި ބަހާ އެންމެ ބޮޑު އަދަދު ކަމަށް ބޭންކުން ވަނީ ބުނެފަ އެވެ.
ބޭންކުގެ އެންމެ ބޮޑު ހިއްސާދާރަކީ ސަރުކާރު ކަމަށާއި މި ނަތީޖާއާ އެކު ހިއްސާގެ ފައިދާގެ ގޮތުގައި 136.6 މިލިއަން ރުފިޔާ އަދި 2023 ވަނަ އަހަރުގެ ޓެކުހުގެ ގޮތުގައި އިތުރު 628 މިލިއަން ރުފިޔާ ބޭންކުން ސަރުކާރަށް ދައްކާފައިވެ އެވެ.
މިނަތީޖާ މިހެން އޮތް އިރު، 2024 ވަނަ އަހަރުގެ ބޭންކްގެ ހިއްސާ ދަށްވުމާއި ގުޅިގެން ހިއްސާއަކަށް ޖެހޭނެ މިންވަރު އަދި އަންދާޒާކޮށް ބުނަންވެސް ވަނީ ދަތިވެފައެވެ.
