ސެމީ ފައިނަލްގައި ވިލިމާލެ އާއި ޕޮލިސް އަދި މުއިވެޔޮ އާއި ހުޅުމާލެ
ފުރަތަމަ ސެމީ ފައިނަލް މެޗު އޮތީ ހޯމަ ދުވަހުގެ ހަވީރު އެވެ. އަދި ދެ ވަނަ ސެމީ ފައިނަލް މެޗު އޮތީ އަންގާރަ ދުވަހުގެ ހަވީރު އެވެ.
އެފްއޭއެމް ވެޓަރަންސް ލީގުގައި މުއިވެޔޮ އަދި ޕޮލިސް ކުލަބު ބައްދަލު ކުރި މެޗުގެ ތެރެއިން
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ވެޓަރަންސް ލީގުގެ ސެމީ ފައިނަލްގައި ވިލިމާލެ ޔުނައިޓެޑާއި ޕޮލިސް ކުލަބު ބައްދަލު ކުރަން ޖެހުނުއިރު، އަނެއް ސެމީ ފައިނަލްގައި މުއިވެޔޮ އާއި ހުޅުމާލެ ވެޓަރަންސް ބައްދަލު ކުރަން ޖެހިއްޖެ އެވެ.
މިއަހަރުގެ ވެޓަރަންސް ލީގު ކުރިއަށް ދާނީ މި މަހުގެ 27 ވަނަ ދުވަހުގެ ނިޔަލަށެވެ. މިއަހަރުގެ މުބާރާތުގައި ޖުމުލަ 10 ޓީމަކުން ބައިވެރިވެ އެވެ.
މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕު އޭގައި އޮތީ ދިވެހި ސިފައިންގެ ކުލަބު، ވިލިމާލެ ޔުނައިޓެޑު، ހުޅުމާލޭ ވެޓަރަންސް ކުލަބު، ޒެލޮޓް އަދި ހުއްރިއްޔާ އެވެ. ގުރޫޕު ބީ ގައި ހިމެނެނީ ޕޮލިސް ކުލަބު، ސްޓެލްކޯ، ކުލަބު އީގަލްސް، މުއިވެޔޮ އަދި ދަ ގްރާންޑޭ އެވެ.
މުބާރާތުގެ ގުރޫޕު ސްޓޭޖުގެ ކުޅުން ނިމުނުއިރު، ގުރޫޕު އޭގެ އެއް ވަނައިގައި ސެމީ ފައިނަލްގެ ފުރުސަތު ހޯދީ ވިލިމާލެ ޔުނައިޓެޑެވެ. ސެމީ ފައިނަލްގައި އެ ޓީމު ނިކުންނަނީ ގުރޫޕު ބީގެ ދެ ވަނަ ޕޮލިސް ކުލަބާ ދެކޮޅަށެވެ. މި މެޗު އޮތީ ހޯމަ ދުވަހުގެ ހަވީރު އެވެ.
ގުރޫޕު ބީގެ އެއް ވަނައިގައި ސެމީ ފައިނަލްގެ ފުރުސަތު ހޯދީ މުއިވެޔޮ އެވެ. ސެމީ ފައިނަލްގައި އެ ޓީމު ބައްދަލު ކުރާނީ ގުރޫޕު އޭގެ ދެ ވަނަ ހުޅުމާލެ ވަޓަރަންސްްއާ އެވެ. މި މެޗު އޮތީ އަންގާރަ ދުވަހުގެ ހަވީރު އެވެ.
މާފަންު ޓާފު ދަނޑުގައި ކުރިއަށް ދާ މުބާރާތުގެ ފައިނަލް މެޗު އޮތީ ބުރާސްފަތި ދުވަހުގެ ހަވީރު އެވެ.
