ޔުކްރެއިން އަށް ތިން ބިލިއަން ޔޫރޯގެ އެހީ ދިނުމަށް ޖަރުމަނުން ފާސްކޮށްފި

ރަޝިޔާ އިން ޔުކްރެއިން އަށް ދެމުން އަންނަ ހަމަލާތަކާ ގުޅިގެން، ޔުކްރެއިން އަށް ތިން ބިލިއަން ޔޫރޯ ނުވަތަ 3.25 ބިލިއަން ޑޮލަރުގެ އެހީތެރިކަމެއް ދިނުމަށް ޖަރުމަނުން ފާސްކޮށްފި އެވެ.

މިއީ އެމެރިކާގެ މެދުވެރި ކަމާއެކު ރަޝިޔާ އަދި ޔުކްރެއިންއާ ދެމެދު ހަނގުރާމަ ވަގުތީ ގޮތުން ހުއްޓާލުމާ ގުޅޭ މަޝްވަރާތައް ފެށުމުގެ ކުރިން ދޭ އެހީއެކެވެ.

މި އެހީގެ ދަށުން ޔުކްރެއިން އަށް ހަނގުރާމައިގެ ހަތިޔާރާއި، ޑްރޯން އަދި ވައިގެ ދިފާއީ ނިޒާމުތައް ހޯދައި ދެވޭނެ އެވެ. މިއީ، މީގެ ކުރިން ޖަރުމަނުގެ ކޯލިޝަން ސަރުކާރުގެ ތެރޭގައި އުފެދުނު ޚިޔާލު ތަފާތުވުން ތަކެއްގެ ސަބަބުން މަޑުޖެހިފައިވާ އެހީއެކެވެ.

ޔުކްރެއިންގެ ރައީސް ވުލެޑިމިއަރ ޒެލެންސްކީ ވަނީ، މި އެހީއަށްޓަކައި ޖަރުމަނަށް ޝުކުރު އަދާ ކުރައްވާފައި އެވެ. ޒެލެންސްކީ ވިދާޅުވީ، މިއީ ޔުކްރެއިން އަށް އެންމެ ބޭނުން ވެފައިވާ އެހީ ކަމަށާއި، މީގެ ސަބަބުން ޔުކްރެއިންގެ ރައްޔިތުންގެ ފުރާނަ ސަލާމަތް ކުރެވޭނެ ކަމަށެވެ.

މި އެހީ އަކީ، ޖަރުމަނުން 2025 ވަނަ އަހަރަށް ރޭވިފައިވާ ހަތަރު ބިލިއަން ޔޫރޯގެ އެހީގެ އިތުރުން ދެވޭ އެހީއެކެވެ. އަދި 2026 ވަނަ އަހަރުން، 2029 ވަނަ އަހަރަށް އިތުރު 8.3 ބިލިއަން ޔޫރޯ ދިނުމަށް ވެސް ވަނީ ރޭވިފައި އެވެ.

ޖަރުމަނަކީ އެމެރިކާ ފިޔަވައި، ޔުކްރެއިން އަށްއެންމެ ގިނަ އަސްކަރީ އެހީ ދޭ ޤައުމެވެ. ރަޝިޔާގެ ހަނގުރާމަ ފެށުނީއްސުރެ، ޖަރުމަނުން ވަނީ 28 ބިލިއަން ޔޫރޯގެ އެހީ ޔުކްރެއިން އަށް ދީފައި އެވެ.

ޖަރުމަނުގެ އައު ޗާންސެލަރ ފްރީޑްރިޗް މެރްޒް ވަނީ، ޔުކްރެއިން އަށް އެހީތެރިވުމަށް އިތުރު ސަތޭކަ ބިލިއަން ޔޫރޯގެ ޕެކޭޖެއް ހުށަހަޅުއްވާފައި އެވެ. އަދި މިހާރުގެ ޗާންސެލަރ އޯލަފް ޝޮލްޒް ވެސް ވަނީ ޔުކްރެއިން އަށް އެހީތެރިވަމުން ގެންދާނެ ކަމުގެ ޔަގީންކަން ދެއްވާފައި އެވެ.