ދެކުނު ޣައްޒާގައި ހަމާސްގެ އިސްވެރިޔަކު ޝަހީދު ކޮށްލައިފި 

ދެކުނު ޣައްޒާ ސަރަހައްދުގައި ހަމާސް ޖަމާއަތުގެ އިސްވެރިޔަކު ޝަހީދު ކޮށްލާފައިވާ ކަމަށް، އިސްރާއީލްގެ އަސްކަރިއްޔާ އިން ހާމަކޮށްފި އެވެ. 

އިސްރާއީލްް އިން ހާމަކޮށްފައިވާ ގޮތުގައި، ބުރާސްފަތި ދުވަހު ދެކުނު ޣައްޒާ ގައި ވަނީ ހަމާސްގެ މިލިޓަރީ އިންޓެލިޖެންސްގެ އިސްވެރިޔާ އުސާމާ ތަބާޝް ވަނީ ޝަހީދު ކޮށްލައިފަ އެވެ. 

ހުކުރު ދުވަހު އިސްރާއީލްގެ އަސްކަރިއްޔާ އިން ބުނެފައިވާ ގޮތުގައި، ތަބާޝް އަކީ ހަމާސްގެ ސަވެއިލަންސް އަދި ޓާގެޓިންގ ޔުނިޓްގެ އިސްވެރިޔާގެ ގޮތުގައި ވެސް ހުންނެވި ފަރާތް ކަމަށެވެ.

މިކަމާ ގުޅޭ ގޮތުން ހަމާސް އިން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.

ހަނގުރާމައިގެ އަމަލުތައް އަލުން ފެށުމާ އެކު، ތުރުކީ އިން އިމާރާތް ކޮށްފައިވާ ހޮސްޕިޓަލަކަށް އިސްރާއީލުން ހަމަލާދިނުމާ ގުޅިގެން، ތުރުކީގެ ޚާރިޖީ ވުޒާރާ އިން ވަނީ އިސްރާއީލްގެ އެ އަމަލު ކުށްވެރި ކޮށްފައި އެވެ.

އެހެން ނަމަވެސް، އިސްރާއީލް ސިފައިންގެ ފަރާތުން ބުނެފައި ވަނީ އެތަނަކީ ކުރިން ހޮސްޕިޓަލެއްގެ ގޮތުގައި ބޭނުންކުރި، އަދި މިހާރު ހަމާސްގެ ޓެރަރިސްޓް އިންފްރާސްޓްރަކްޗަރ ސައިޓެއްގެ ގޮތުގައި ބޭނުން ކުރަމުން އަންނަ ތަނެއް ކަމަށެވެ.

ޣައްޒާގެ ސިއްހީ ވުޒާރާ އިން ބުނެފައި ވަނީ، އެއީ ކެންސަރު ބަލީގެ ފަރުވާދޭ ހަމައެކަނި ހޮސްޕިޓަލް ކަމަށާއި، އިސްރާއީލްގެ މި ހަމަލާއަކީ "ހަނގުރާމައިގެ ކުށެއް" ކަމަށެވެ.

އިސްރާއީލްގެ ރައީސް އައިސާކް ހަޒޮގް ވިދާޅުވެފައ ިވަނީ، ހަނގުރާމަ އަލުން ފެށުމަކީ ހިފެހެއްޓިފައިވާ މީހުން ސަލާމަތް ކުރުމުގެ މަސައްކަތަށް ބުރޫ އަރާނެ ކަމެއް ކަމަށެވެ. އަދި އެތައް ހާސް ބަޔަކު ޖެރޫސަލަމްގައި މުޒާހަރާކޮށް، ބަންދުގައި ތިބި މީހުންގެ ރައްކާތެރިކަމަށް ނުބަލައި ހަނގުރާމަ އަލުން ފެށުމާ މެދު ބަހުސް ކުރަމުންދެ އެވެ.

2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު ހަމާސް އިން ދިން ހަމަލާގައި ހިފެހެއްޓި 251 މީހުންގެ ތެރެއިން 58 މީހަކު އަދި ވެސް ތިބީ ބަންދުގަ އެވެ. އޭގެ ތެރެއިން 34 މީހުން މަރުވެފައިވާ ކަމަށް އިސްރާއީލް ސިފައިން ބުނެ އެވެ.