މާޒިޔާއާއި ތިނަދޫ އެއްވަރުވެއްޖެ

އުރީދޫ ޕްރިމިއާ ލީގުގައި މާޒިޔާއާއި ތިނަދޫ ބައްދަލުކުރި މެޗު އެއްވަރުވެގެން ނިމިއްޖެއެވެ.

ބުދަ ދުވަހުގެ ރޭ މާޒިޔާއާއި ތިނަދޫ ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ވެސް ފެނިގެން ދިޔައީ ހަމަހަމަ ކުޅުމެކެވެ.

ފުރަތަމަ ހާފުގައި ލަނޑު ޖަހާނެ އެންމެ ރަނގަޅު ފުރުސަތު ލިބިފައި ވަނީ މާޒިޔާގެ އިސްމާއިލް އީސަ (މެސީ) އަށެވެ. އުމައިރު ނަގައިދިން ކޯނަރަކުން އޭރިއާތެރެއިން ހުސްކޮށް ބޯޅަ ލިބުމުން މެސީ ފޮނުވާލި ހަމަލާ ދިޔައީ އަރިމަތިން ބޭރަށެވެ.

މެޗުގެ ފުރަތަމަ ހާފު ނިމިގެން ދިޔައީ 0-0 ގެ ނަތީޖާއަކުން ދެ ޓީމު އެއްވަރުވެގެންނެވެ.

ދެވަނަ ހާފު ފެށިގެން ތިނަދޫއިން ވަނީ މާޒިޔާގެ ހާފުގައި ބޯޅަ ހިފަހައްޓައި މޮޅު ކުޅުމެއް ދައްކާފައެވެ. އެގޮތުން މުޅި މެޗުގައިވެސް މޮޅު ކުޅުމެއް ދެއްކި ތިނަދޫގެ އަހުމަދު ރިޒުވާން (ރިޒޭ) ފޮނުވާލި ދެ ހަމަލާގެވެސް ހުރަކަށްވީ މާޒިޔާގެ ކީޕަރު މަހްމޫދެވެ.

މެޗުގެ 82 ވަނަ މިނުޓުގައި ތިނަދޫއަށް ލީޑު ނަގައިދިނީ ތަޖުރިބާކާރު މިޑްފީލްޑާ އަހުމަދު ނިޔާޒް (ނިޔާ) އެވެ. މި ގޯލު އޭނާ ކާމިޔާބުކޮށްދީފައި ވަނީ ރިޒޭ ތަނަވަސްކޮށްދިން ފުރުސަތަކުންނެވެ. މި ލަނޑަކީ ލީގުގައި މާޒިޔާ ކޮޅަށް ވަން ފުރަތަމަ ލަނޑެވެ. މި ލަނޑާއި އެކު މާޒިޔާ ޕްރެޝަރަށް ވެއްޓިގެން ދިޔައިރު މެޗުގެ 84 ވަނަ މިނުޓުގައި ތިނަދޫގެ ބިދޭސީ ކުޅުންތެރިޔާ އެލެކްޒެންޑާ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއާއިއެވެ.

މެޗުގެ އިތުރު ވަގުތުގައި މާޒިޔާއަށް މެޗުގެ ނަތީޖާ ހަމަހަމަ ކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެން ނުކުތް ހުސައިން ނިޔާޒް (ބޮކުރީ) އެވެ.

މެޗަށް ފަހު ވާހަކަ ދައްކަމުން މާޒިޔާގެ ކޯޗު ބުނީ މެޗަށް ނުކުތީ މޮޅުވާން ކަމަށާއި އެހެން ނަމަވެސް ޕޮއިންޓެއް ލިބުމުން ވެސް ހިތްހަމަޖެހޭކަމަށެވެ. އޭނާ އިތުރަށް ބުނެފައިވަނީ މެޗުގައި ޓީމުގެ ފަރާތުން އެދެވޭ ކުޅުމެއް ދެއްކިފައި ނުވާ ކަމަށާއި އަނިޔާގެ ސަބަބުން މެޗުގައި ނުކުޅެވުނު އަސަދުﷲ ނެތްތަން އެޓޭކުން ދެއްކި ކަމަށެވެ.

މެޗަށް ފަހު ވާހަކަ ދައްކަމުން ތިނަދޫގެ ކޯޗު ބުނެފައިވަނީ މެޗުގައި ޓީމުގެ ފަރާތުން މޮޅު ކުޅުމެއް ފެނުމުން އުފާވާ ކަމަށާއި އެހެން ނަމަވެސް ތިން ޕޮއިންޓު ނުލިބުމުން ވަރަށް ދެރަވާ ކަމަށެވެ. އަދި ކުރިޔަށް ހުރި މެޗުތަކުގައި ތިނަދޫއަށް ނަތީޖާ ނެރެވޭނެ ކަމަށާއި އެހެން ޓީމުތަކާއި ވާދަކުރުމުގެ ފެންވަރު ތިނަދޫގައި ހުރިކަން މެޗަށް ފަހު އެންމެންނަށްވެސް އެގިގެން ގޮސްފިކަމަށް ތިނަދޫގެ ކޯޗު ބުނެފައިވެއެވެ.

މާޒިޔާ އޮތީ ކުޅުނު ހަތަރު މެޗުން ލިބުނު ލިބުނު 10 ޕޮއިންޓާއިއެކު ތާވަލުގެ އެއްވަނައިގައެވެ. ތިނަދޫ އޮތީ ކުޅުނު ހަތަރު މެޗުން ލިބުނު ހަތަރު ޕޮއިންޓާއިއެކު ތާވަލުގެ ފަސް ވަނައިގައެވެ.