އާސެނަލް އިން ޗެލްސީ ބަލިކޮށްފި

އިނގިރޭސި ޕްރިމިއަރ ލީގުގައި ޗެލްސީއާ ދެކޮޅަށް ކުޅުނު މެޗުން މޮޅުވެ، އާސެނަލް އިން ލީގު ތާވަލްގެ ދެ ވަނައިގައި ލީޑު ނަގައިފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. އެއީ މެޗުގެ ފުރަތަމަ ހާފުގައި އާސެނަލް އިން ޖެހި ލަނޑުންނެވެ.

މެޗުގައި އާސެނަލް އިން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. މެޗު ފަށައިގެން ކުރީ ކޮޅު އާސެނަލްގެ ލިއާންޑްރޯ ޓްރޮސާޑް ފޮނުވާލި ބޯޅަ ދިޔައީ ގޯލުގެ ހުރަސް ދަނޑި ކައިރިން ބޭރަށެވެ.

މެޗުގެ ފުރަތަމަ ހާފުގެ 20 ވަނަ މިނެޓުގައި އާސެނަލް އިން ވަނީ ލަނޑު ޖަހައި ލީޑު ނަގައިފަ އެވެ. އާސެނަލަށް ލިބުނު ކޯނަރެއްގައި މާޓިން އޮޑެގާޑް ހުރަސްކޮށްދިން ބޯޅަ، ބޮލުން ގޯލަށް ވައްދާލައިގެން އެ ލަނޑު ޖަހައިދިނީ މިކޭލް މެރީނޯ އެވެ.

މެޗުގައި ލަނޑު ޖަހާނެ ފުރުސަތުތަކެއް ޗެލްސީން ވެސް ވަނީ ތަނަވަސްކޮށްފަ އެވެ. އެގޮތުން ޗެލްސީގެ މާކް ކުކުރެއްލާ ފޮނުވާލި ބޯޅަ އާސެނަލްގެ ގޯލު ކީޕަރު ވަނީ މަތަކޮށްފަ އެވެ.

މޮޅާ އެކު އާސެނަލް އިން ވަނީ ދެ ވަނައިގައި ހަތަރު ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 29 މެޗުން އާސެނަލަށް ލިބެނީ 58 ޕޮއިންޓެވެ. އާސެނަލް އާއި އެއް ވަަނައިގައި އޮތް ލިވަޕޫލްއާ ދެމެދު އޮތީ 12 ޕޮއިންޓުގެ ފަރަގެކެވެ.