ފެންނަމުން މިދަނީ ރާއްޖެ އަށް ގެނެސްފައިވާ އިސްލާހީ ނިޒާމް ފަނުފުލުންދާ މަންޒަރު - ބިގޭ
15 މާރިޗު 2025 | ހޮނިހިރު 18:55އާޢްމު ރައްޔިތުންގެ ބާރު ރާއްޖެއިން ކެނޑެމުންދާ ކަމަށް އޭނާ ވިދާޅުވި
އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) އެމްޑީޕީގެ މުޒާހަރާގައި ވާހަކަދައްކަވަނީ - 15.03.2025
ރާއްޖެ އަށް ގެނެސްފައިވާ އިސްލާހީ ނިޒާމް މިހާރު ދަނީ ފަނު ފުލުންދާ މަންޒަރު މިހާރު ފެންނަމުންދާ ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެ އެވެ.
އޭނާ އެފަދައިން ވިދާޅުވީ ހޮނިހިރު ދުވަހުގެ ރޭ އެމްޑީޕީން ބޭއްވި މުޒާހަރާގައި ވާހަކަދައްކަވަމުންނެވެ.
ރާއްޖޭގައި ދުލާއި ގަލަމުގެ މިނިވަންކަން ހޯދާ، ބާރުތައް ވަކިވެފައިވާ ނިޒާމެއް ޤާއިމް ކުރީ ވަރަށް ގިނަ ބައެއްގެ މަސައްކަތުން ކަމަށް އޭނާ ވިދާޅުވި އެވެ. އެތައް ދުވަހެއްގެ މަސައްކަތުން އާއްމުން ހާސިލްކުރި ހައްގުތައް މިހާރު ނިގުޅައިގަންނަމުންދާ ކަމަށް ބިގޭ ވަނީ ވިދާޅުވެފައެވެ. މީގެ ކުރިން ޚިޔާލުފާޅުކުރުމުންނާއި ސަރުކާރާއި ދެކޮޅަށް ބަސްބުނުމުން އާއްމުން ޖަލަށް ލާފައިވާ ކަމަށާއި އެ އުސޫލު އަލުން އިއާދަވާން ބޭނުން ނުވާ ކަމަށް އޭނާ ވިދާޅުވި އެވެ.
ގައުމު މިހާރު ދަނީ ފަހަތަށް ކަމަށް ފާހަގަކުރައްވާ އޭނާ ވަނީ ގައުމުގެ ހާލަތާއި މެދު ކަންބޮޑުވުން ފާޅުކުރައްވާފައެވެ. އަދި އާޢްމު ރައްޔިތުންގެ ބާރު ރާއްޖެއިން ކެނޑެމުންދާ ކަމަށް އޭނާ ވިދާޅުވިއެވެ.
ރާއްޖެ ދަނީ ގަރުނެއް ފަހަތަށް. މިކަމުގަ މި މިނިވަންކަން ހޯދަން ކުރި ބުރަ މަސައްކަތް އެނގިވަޑައިގަންނަވާތޯ؟ ރާއްޖެއިން ބޭރުގައި އަރުވާލެވިގެން ތިބެގެންނާ އެ ނޫން ގޮތް ގޮތަށް ކުރި މަސައްކަތް؟އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)
އެމްޑީޕީން މަގުމައްޗަށް އެއްވެ މުޒާހަރާ ކުރަމުން ދަނީ ރާއްޖޭގައި އޮތް މިނިވަންކަން އެގޮތުގައި ދަމަހައްޓަން ކަަމަށް ވެސް ބިގޭ ވިދާޅުވިއެވެ. އަދި ޤައުމު އޮޔާ ދާތަން ބަލަން އެމްޑީޕީ އިން ނުތިބޭނެ ކަމަށް އޭނާ ވިދާޅުވި އެވެ. އެމްޑީޕީ އަކީ އެއަށް ވުރެ ބޮޑަށް ހައްގުތައް ހޯދާ ހައްގުތައް ހިމާޔަތްކުރާ ޕާޓީ އެއް ކަމަށް އޭނާ ވިދާޅުވި އެވެ.
ބިގޭ ވަނީ މިއަދު ރާއްޖޭގެ ހުރިހާ ސިނާއަތެއް ފުނޑާލާ، މުޅި ގައުމުގެ ހުރިހާ މުއައްސަސާއަކަށް ރައީސްގެ ނުފޫޒު ފޯރުވާފައިވާ ކަމަށެވެ. އެކަމުގެ ސަބަބުން އާއްމުން ތިބީ ނިކަމެތިވެފައި ކަމަށް އޭނާ ވަނީ ވިދާޅުވެފަ އެވެ.
