ސިވިލް ސާވިސް ކޮމިޝަންގެ ނައިބު ރައީސްގެ މަޤާމުން އިބްރާހިމް ރަޝީދު އިސްތިއުފާ ދެއްވައިފި
11 މާރިޗު 2025 | އަންގާރަ 13:08ސިވިލް ސާވިސް ކޮމިޝަނުގެ ނައިބު ރައީސް، އިބްރާހިމް ރަޝީދު އެ މަގާމުން އިސްތިއުފާ ދެއްވިކަން ހާމަކުރީ ސީއެސްސީން އެކްސްގައި ކުރި ޕޯސްޓެއްގަ
ސީއެސްސީގެ ނައިބު ރައީސްގެ މަގާމުން އިސްތިއުފާ ދެއްވި އިބްރާހިމް ރަޝީދު.
ސިވިލް ސާވިސް ކޮމިޝަނުގެ ނައިބު ރައީސް، އިބްރާހިމް ރަޝީދު އެ މަގާމުން އިސްތިއުފާ ދެއްވައިފި އެވެ.
މިކަން ފާހަގަކޮށް، ސިވިލް ސާވިސް ކޮމިޝަނުން އެކްސް ގައި ކުރި ޕޯސްޓެއްގައި ބުނީ އިބްރާހިމް ރަޝީދު އެ ކޮމިޝަނަށް ކޮށްދިން ހިދުމަތް ފާހަގަކޮށް ޝުކުރު އަދާކުރާ ކަމަށެވެ.
އިބްރާހިމް ރަޝީދު މަގާމުން އިސްތިއުފާ ދެއްވާފައި މިވަނީ އޭނާ މަޤާމުން ވަކިކުރުމުގެ މަރުހަލާ ފަށަން މަޖިލިސް ތަޅުމަށް ފޮނުވުމަށް މިނިވަން މުއައްސަސާތަކާ ބެހޭ ކޮމިޓީން ހޯމަ ދުވަހު ފާސް ކޮށްފައި ވަނިކޮށެވެ.
ގިނަ ވަގުތު އަޑު ކަނޑާލައިގެން ކުރިއަށް ގެންދިޔަ ކޮމިޓީ ބައްދަލުވުމުގައި ބައިވެރިވެވަޑައިގެން މެންބަރުންގެ ތެރެއިން ގަލޮޅު ދެކުނު ދާއިރާގެ މެންބަރު، މީކާއިލް އަހުމަދު ނަސީމް ފިޔަވައި އެހެން ހުރިހާ މެންބަރުން އޭނާ ވަކި ކުރަން ފެންނަ ކަމަށް ވޯޓު ދެއްވި އެވެ.
އެކަމަކު އޭނާ ވަކިކުރުމުގެ މަަރުހަލާ ފަށަން ކޮމިޓީން ނިންމީ ސީދާ ކޮން މައްސަލައަކާ ގުޅިގެން ކަމެއް އަދި މިހާތަނަށް އެނގިފައެއް ނުވެ އެވެ.
ނަމަވެސް "ރާއްޖެ އެމްވީ" އަށް އެނގިފައިވާ ގޮތުގައި އިބްރާހިމް ރަޝީދު ވަކިކުރަން ނިންމީ ހުޅުދޫ ދާއިރާގެ މެންބަރު، މުހައްމަދު ޝާހިދު އެ ކޮމިޓީއަށް ހުށަހެޅުއްވި ސިޓީއަކާ ގުޅިގެން ކަމަށެވެ. އަދި އެ ސިޓީގައި އިބްރާހިމް ރަޝީދުއާ ގުޅޭ ގިނަ ޝަކުވާތަކެއް ހުރި ކަމަށް ވެއެވެ.
ސީއެސްސީގެ ނައިބް ރައީސް ކަމަށް ރަޝީދު އައްޔަންކުރީ 2020 ވަނަ އަހަރުގެ ސެޕްޓެމްބަރު 3 ގަ އެވެ.
