ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ލިވަޕޫލް އާއި ޕެރިސް ސެއިންޓް ޖާމަން (ޕީއެސްޖީ) ބައްދަލު ކުރާއިރު، އެ މެޗުން މޮޅުވެ އަނެއް ބުރަށް ދާ ޓީމެއް، މިއަހަރުގެ ފައިނަލްގައި ކުޅޭނެ ކަމަށް ޕީއެސްޖީގެ ކޯޗު ލުއިސް އެންރީކޭ އަންދާޒާ ކޮށްފި އެވެ.

ގަދަ 16 ވަނަ ބުރުގެ ފުރަތަމަ ލެގުގައި ޕީއެސްޖީގެ އަމިއްލަ ދަނޑުގައި މި ދެ ޓީމު ބައްދަލު ކުރި މެޗު 1-0 އިން ކާމިޔާބު ކުރީ ލިވަޕޫލް އިންނެވެ. އެ މެޗުގައި ޕީއެސްޖީން ވަނީ މޮޅަށް ކުޅެފަ އެވެ.

ލިވަޕޫލްގެ އަމިއްލަ ދަނޑު، އެންފީލްޑުގައި ކުޅޭ ދެ ވަނަ ލެގުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން އެންރީކޭ ބުނީ، މުބާރާތުގެ ފައިނަލްގައި ދެ ޓީމު ބައްދަލު ކުރާއިރު، ލިވަޕޫލް އާއި ޕީއެސްޖީގެ މެޗުން ކުރި ހޯދާ ޓީމެއް އެއްކޮޅުން ފައިނަލްގައި ކުޅޭނެ ކަމަށެވެ.

މީގެ އިތުރުން އެންރީކޭ ބުނީ، ޕީއެސްޖީގެ އަމިއްލަ ދަނޑުގައި ދެއްކި ފަދަ މޮޅު ކުޅުމެއް ދެ ވަނަ ލެގުގައި ފެންނާނެ ކަމަށް އުންމީދު ކުރާ ކަމަށެވެ. ފުރަތަމަ ލެގުގައި ޕީއެސްޖީން ލިވަޕޫލްގެ ގޯލާ އަމާޒުކޮށް ގިނަ ހަމަލާތަކެއް ފޮނުވާލިއިރު، އެ ހަމަލާތަކަށް ހުރަސް އެޅީ ލިވަޕޫލްގެ ގޯލު ކީޕަރު އެލިސަން ބެކާ އެވެ.

އެންރީކޭ ބުނީ ލިވަޕޫލްގެ އެންފީލްޑުގައި ކުޅޭ މެޗު އުނދަގޫ ވާނެ ކަމަށާއި، އެ ޓީމާ ދެކޮޅަށް ކުޅުމުގައި ސަމާލުކަން ދޭން ޖެހޭ ގިނަ ކަންކަން ހުންނާނެ ކަމަށެވެ. ފުރަތަމަ މެޗުގެ ނަތީޖާ ނިކުތް ގޮތުން، ޕީއެސްޖީ އަށް މިހާރު އިތުރު ޗޮއިސް އެއް ނެތް ކަމަށް ވެސް އެންރީކޭ ބުންޏެވެ.

އޭނާ ބުނީ މޮޅުވުން ނޫން އެހެން ގޮތެއް ނެތް ކަމަށާއި، އޭނާ އާއި ޕީއެސްޖީގެ ކުޅުންތެރިން ތިބީ ދެ ވަނަ ލެގުން މޮޅެއް ހޯދައި، މުބާރާތުގެ އަނެއް ބުރަށް ދިޔުމަށް ކުރަން ޖެހޭ ކަންކަން ކުރުމަށް ތައްޔާރަށް ކަމަށެވެ. ދެ ވަނަ ލެގުގެ ކުރިން ޕީއެސްޖީން ކުރިއަަށް ގެންދިޔަ ފަރިތަކުރުންތަކާ މެދު ވެސް އެންރީކޭ ހުރީ ހިތްހަމަ ޖެހިފަ އެވެ.

ޕީއެސްޖީގެ އަމިއްލަ ދަނޑުގައި މި ދެ ޓީމު ބައްދަލު ކުރާ މެޗު ފަށާނީ އަންގާރަ ދުވަހުގެ ރޭ ދަންވަރު، ރާއްޖެ ގަޑިން އެކެއް ޖަހާއިރު އެވެ.