އައްޑޫގެ ކަރަންޓުގެ މައްސަލައިގައި ހުށަހެޅި ކުއްލި މައްސަލަ އަށް ބަހުސްކުރަން ފުރުސަތު ނުދީ ބޭރުކޮށްލައިފި
އެ މައްސަލަ ހުށަހެޅުއްވީ ހިތަދޫ ދެކުނު ދާއިރާގެ މެމްބަރު އިބްރާޙިމް ނާޒިލް
ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
އައްޑޫސިޓީގެ ގުޅިފައިވާ ރަށްތަކުން އެ ސިޓީގެ ރައްޔިތުންގެ އަސާސީ ދިރިއުޅުމަށް ދަތިވާ ވަރަށް ކަރަންޓު ކެނޑެމުންދާތީ ހުށަހެޅި ކުއްލި މައްސަލަ ޕީއެންސީގެ މެޖޯރިޓީ ބޭނުންކޮށްގެން މަޖިލީހުން ބޭރުކޮށްލައިފިއެވެ.
އެ މައްސަލަ ހުށަހެޅުއްވީ ހިތަދޫ ދެކުނު ދާއިރާގެ މެމްބަރު އިބްރާޙިމް ނާޒިލް އެވެ.
އެ މައްސަލަ ބޭރުކޮށްލާފައި ވަނީ އެ މައްސަލަ އަށް ބަހުސްކުރަން ނުފެންނަ ކަމަށް 47 މެމްބަރުން ވޯޓު ދެއްވައިގެންނެވެ. އެ ކުއްލި މައްސަލަ އަށް ބަހުސްކުރަން ފެންނަ ކަމަށް 13 މެމްބަރަކު ވަނީ ވޯޓުދެއްވާފައެވެ.
އެ މައްސަލައިގައި ބުނެފައި ވަނީ އައްޑޫގެ ހިތަދޫ، މަރަދޫ، މަރަދޫ – ފޭދޫ އަދި ފޭދޫ އަކީ މާލެ ފިޔަވާ އެންމެ ބޮޑު އާބާދީ އެއް އޮތްތަން ކަމަށެވެ. އެހެންކަމަށް ވީ ނަމަވެސް އެ ސީޓީ އަށް ކަރަންޓުގެ ޚިދުމަތް ދިނުމުގައި ވަރަށް ބޮޑަށް އިހުމާލުވެފައިވާ ކަމަށް ނާޒިލް ވިދާޅުވިއެވެ.
ރަމަޟާން މަސް ފެށެންވާއިރަށް އައްޑޫގެ ކަރަންޓުގެ މައްސަލަ ހައްލުކޮށްދެއްވުމަކީ ރައީސް ޑރ.މުހައްމަދު މުއިއްޒުގެ ވައުދުފުޅެކެވެ. އެހެންނަމަވެސް ސަރުކާރުން އައްޑޫ ސިޓީ އަށް ކަރަންޓު ފޯރުކޮށްދިނުމުގައި އިހުމާލުވަމުންދާ ދިއުމުގެ ސަބަބުން މި ރަމަޟާން މަހު އެ ސިޓީގެ އާއްމުންގެ އަސާސީ ދިރިއުޅުމުގެ ހާލަތަށް ބޮޑެތި ދަތިތަކެއް ކުރިމަތިވެފައިވާ ކަމަށް ނާޒިލް ފާހަގަކުރެއްވިއެވެ.
އައްޑޫގެ ކަރަންޓުގެ ޚިދުމަތް އެންމެ އަސާސީ މިންވަރަށް ފޯރުކޮށްދިނުމަށް ވެސް ސަރުކާރުން ނުކުޅެދިފައިވާކަމަށް ވެސް ނާޒިލް ވިދާޅުވިއެވެ. އެގޮތުން ތަކުރާރުކޮށް، އެ ރަށްތަކުން ކަރަންޓު ކެނޑުމުގެ ސަބަބުން ބޮޑެތި ދަތިތަކެއް ދިމާވެ، އެ ރަށްރަށުގެ ގޭގެއިންނާއި، އޮފީސްތަކާއި، ފިހާރަތަކުން ދޭން ޖެހޭ ޚިދުމަތް ވެސް އާއްމުންނަށް ނުދެވޭ ކަމަށް ނާޒިލް ވިދާޅުވިއެވެ.
މީގެ އިތުރުން ކަރަންޓު ކެނޑުމުގެ ސަބަބުން، ޓީވީ، އޭސީ، ފްރިޖްފަދަ އަގުބޮޑު ސާމާނުތައް ހަލާކުވަމުންދާ ކަމަށް ވެސް ނާޒިލް ވިދާޅުވިއެވެ. މި މައްސަލަ އަށް ސަރުކާރުން އެއްވެސް ހައްލެއް ހޯދާ ނުދިނުމުން އައްޑޫގެ ރައްޔިތުން ދިރިއުޅެމުން ދަނީ ހާސްކަމާއި އުނދަގުލުގައި ކަމަށް އޭނާ ފާހަގަކުރެއްވިއެވެ.
އެކަންކަން ބަލައި ނުގަނެވޭ ކަމަށް ފާހަގަކޮށް ނާޒިލް ވަނީ މި މައްސަލައިގައި ހުރި ކަންބޮޑުވުންތައް ކުއްލި މައްސަލައިގައި ހިއްސާކުރައްވާފައެވެ. އެގޮތުން ކަރަންޓުގެ މައްސަލަ ދިމާ ވަނީ އައްޑޫގެ ސެންޓްރަލް ޕަވަރ ސްޓޭޝަންގައި ހުރި 3 ޖެނެރޭޓަރ ސެޓް މަރާމާތު ނުކުރެވިގެން ކަމަށް ވެސް ނާޒިލް ވިދާޅުވިއެވެ. އެ ސެޓްތައް މަރާމާތު ނުކުރެވޭ ސަބަބަކީ މަރާމާތުކުރަން ބޭނުންވާ ސްޕަރ ޕާރޓްސް ފެނަކައިގެ މާލޭ ހެޑް އޮފީހުން ފޮނުވާ ނުދީގެން ކަމަށް ނާޒިލް ވަނީ ވިދާޅުވެފައެވެ.
އެ ކުއްލި މައްސަލައިގައި ނާޒިލް އިތުރަށް ވިދާޅުވީ މި މައްސަލަ ވަގުތީގޮތުން ހައްލުކުރުމަށް މި ވަގުތަށް ވެސް 3 މެގަވޯޓްގެ ދެ ޖެނެރޭޓަރ ސެޓް ބޭނުންވާ ކަމަށެވެ. އެކަން އައްޑޫ ސެންޓްރަލް ޕަވަރ ސްޓޭޝަނުން ފާހަގަކުރަމުން ދަނިކޮށް އައްޑޫ އަށް ގެންދިޔައީ 1.8 މެގަވޯޓްގެ އެންމެ ޖެނެރޭޓަރ ސެޓެއް ކަމަށް އެ މައްސަލައިގައިވެއެވެ. އެއީ އައްޑޫގެ ކަރަންޓުގެ މައްސަލަ ހައްލުކުރުމަށް އެކަށީގެންވާ ކެޕޭސިޓީ އެއް ނޫން ކަމަށް ވެސް ނާޒިލް ވަނީ ވިދާޅުވެފައެވެ.
ޔުޓިލިޓީ ރެގިއުލޭޓްރީ އޮތޯރިޓީގެ ޤާނޫނު ބުނާގޮތުން އާއްމު ބޭނުންތަކާއި ޚިދުމަތްތަކަކީ ރާއްޖޭގެ އެންމެންނަށް ހަރުދަނާ ކަމާއި އެކު ދޭން ޖެހޭ އިތުބާރު ހުރި ޚިދުމަތަކަށް ސަރުކާރުން ހަދަން ޖެހޭ ކަމަށާއި އެ މަހްފޫމާއި އެއްގޮތަށް ސަރުކާރުން އަމަލު ނުކުރާ ކަމަށް ނާޒިލް ވިދާޅުވިއެވެ. އެހެންކަމުން އައްޑޫގެ ކަރަންޓުގެ މައްސަލަ ހައްލުކުރުމަށް އަދާކުރުމަށް އެ ކުއްލި މައްސަލައިގައި ގޮވާލާފައިވެއެވެ.
