ޣައްޒާ އިން ކަރަންޓު ކަނޑާލުމަށް އިސްރާއީލުން ނިންމައިފި

ޣައްޒާ އިން ކަރަންޓު ކަނޑާލުމަށް، ހައްދުފަހަނަ އެޅި އިސްރާއީލްގެ އެނަރޖީ މިނިސްޓަރު އެލީ ކޯހެން އަމުރު ކުރައްވައިފި އެވެ.

 މިއީ އިސްރާއީލުން ޣައްޒާ އަށް އެހީ ފޯރުކޮށްދިނުން ހުއްޓާލިތާ ހަފްތާއެއް ފަހުން ނިންމި ނިންމުމެކެވެ. މި ނިންމުމަކީ 2023 ވަނަ އަހަރުގެއޮކްޓޯބަރު މަހުގެ ހަތެއް ގައި، ހަމާސްގެ ހަމަލާ އަށް ފަހު އިސްރާއީލުން ޣައްޒާ އަށް ގެނައި "ފުރިހަމަ ބްލޮކޭޑް" އާ އެއްގޮތް ފިޔަވަޅެކެވެ.

އެ ބްލޮކޭޑްގައި ކަރަންޓު، ފެން އަދި ކާބޯތަކެތި ކަނޑާލުން ހިމެނެ އެވެ. ކޯހެންގެ ވީޑިއޯ މެސެޖެއްގައި އޭނާ ވިދާޅުވީ، "ޣައްޒާ އަށް ކަރަންޓު ފޯރުކޮށްދިނުން ވަގުތުން ހުއްޓާލުމަށް އަމުރުކޮށް، ސޮއިކޮށްފިން" ކަމަށެވެ. 

 "އަޅުގަނޑުމެން ރަހީނުން އަނބުރާ ގެނައުމަށް، އަދި ހަނގުރާމައަށް ފަހު ގައްޒާގައި ހަމާސް އަށް ނޫޅެވޭނެކަން ކަށަވަރު ކުރުމަށް އަޅުގަނޑުމެންގެ އަތުގައި ހުރި ހުރިހާ ވަސީލަތެއް ބޭނުން ކުރާނަން." ކޯހެން ވިދާޅުވި އެވެ.

ހަމާސްއިން ވަނީ އިސްރާއީލުން އެހީ ހުއްޓާލުމަކީ "ހަނގުރާމައިގެ ކުށެއް" ކަމަށް ބުނެފަ އެވެ. މި ފިޔަވަޅުން ޣައްޒާ ގައި ތިބި އިސްރާއީލްގެ ރަހީނުންނަށް އަސަރު ކުރާނެ ކަމަށް ހަމާސްއިން ބުނެ އެވެ.

އިސްރާއީލުގެ ބޮޑު ވަޒީރު ބެންޖަމިން ނެތަންޔާހޫ ވަނީ، ރަހީނުން ދޫނުކޮށްފިނަމަ ހަމާސް އަށް "ހިޔާލު ނުކުރެވޭ ވަރުގެ" ނަތީޖާއެއް ކުރިމަތި ވާނެކަމަށް ވިދާޅުވެ އިންޒާރު ދެއްވައިފަ އެވެ.

އިސްރާއީލްގެ މީޑިއާ ތަކުން ރިޕޯޓުކުރާ ގޮތުގައި، ނަތަންޔާހޫ ވަނީ "ހެލް ޕްލޭން" ގެ ނަމުގައި ހަމާސް އަށް ފިއްތުން އިތުރު ކުރުމުގެ ރޭވުމެއް އެކުލަވާލައިފަ އެވެ.

މިހާރު ޣައްޒާ ގައި އަދިވެސް އިސްރާއީލްގެ 50 ރަހީނުން ތިބި ކަމަށް ރިޕޯޓުކޮށްފައިވެ އެވެ.  އޭގެ ތެރެއިން 34 މީހުން މަރުވެފައިވާކަން އިސްރާއީލްގެ މިލިޓަރީން ވަނީ ކަށަވަރު ކޮށްފަ އެވެ.