އައި.ޓީ.ބީ ބަރލިން 2025: ރާއްޖެ ޕްރޮމޯޓްކުރުމަށް ސަރުކާރުން އެކަށީގެންވާ މަސައްކަތެއް ނުކުރޭ

ދިވެހިރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުން އައި.ޓީ.ބީ ބަރލިން 2025 ގައި ރާއްޖެ އިޝްތިހާރު ކުރުމަށް އެކަށީގެންވާ މަސައްކަތެއް ކޮށްފައިނުވާ ކަމަށް ބުނެ، ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކުން ކަންބޮޑުވުން ފާޅުކޮށްފިއެވެ. 

މޯލްޑިވްސް މާރކެޓިން އެންޑް ޕަބްލިކް ރިލޭޝަންސް (އެމް.އެމް.ޕީ.އާރް.ސީ) އިން މިފަދަ ފެއަރއެއްގައި ބައިވެރިވެ ރާއްޖެ އިޝްތިހާރު ކުރުމަށް ގެންގުޅެފައިވާ، މާކެޓިންގ ސްޓްރެޓެޖީއާއި މި ފެއަރގައި ބައިވެރިވެ ރާއްޖެއަށް ލިބުނު ފާއިދާ ކުޑަކަމަށް މިދާއިރާގައި ހަރަކާތްތެރިވާ ފަރާތްތަކުން ވަނީ ބުނެފައެވެ. 

ފަތުރުވެރިކަމުގެ ދާއިރާގެ ފަންނީ ތަޖުރިބާކާރެއް ކަމުގައިވާ މުހައްމަދު ފިރާޤު ވިދާޅުވެފައިވަނީ އައި.ޓީ.ބީ ގައި ދިވެހިރާއްޖޭގެ ހަޤީޤީ ރޫހު ގެއްލެމުންދާކަމަށެވެ. އެގޮތުން މީގެ ކުރިން މިފަދަ ފެއަރތަކުގައި ރާއްޖެ ތަމްސީލް ކުރަނީ އެންމެ މަތީ ފަންތީގައި ކަމަށާއި ރާއްޖޭގެ ސްޓޭންޓަށް ފެއަރއަށް ޒިޔާރަތްކުރާ ފަރާތްތަކުގެ ބޮޑު ތަރުހީބެއް ލިބެމުންދާ ކަމަށެވެ. 

ކުދި އަދި މެދު ފަންތީގެ ވިޔަފާރިތަކަށް މި ފެއަރގައި ބައިވެރިވުމުގެ ޚަރަދު ބޮޑުވެ، އޭގެ ފައިދާ ކުޑަވަމުންދާކަމަށް މިފެއަރގައި ބައިވެރިވި ބައެއް ފަރާތްތަކުން ވަނީ ބުނެފައެވެ. 

މިއެގްޒިބިޝަންގައި ދިވެހިރާއްޖެއިން މަސައްކަތްކުރާނީ، ފަތުރުވެރިކަމުގެ ދާއިރާގައި ރާއްޖެއަކީ ލީޑިންގ ޑެސްޓިނޭޝަންގެ ގޮތުގައި ޕްރޮމޯޓްކޮށް، ފަތުރުވެރިންގެ މެދުގައި މަގްބޫލު މަންޒިލެއްގެ ގޮތުގައި ރާއްޖެ ޕްރޮމޯޓްކުރުމަށް ކަމަށް ކުރިން ބުނެފައިވީ ނަމަވެސް، ޖަރުމަނުވިލާތުގައި ރާއްޖޭގެ  ފަތުރުވެރިކަން އިޝްތިހާރުކުުރުމަށް، ޓެކްސީތައް ބޭނުންކުރުމަކީ ލަގްޒަރީ މަންޒިލެއްގެ ގޮތުގައި ރާއްޖެ އިޝްތިހާރުކުރުމަށް އެކަށީގެންވާ ގޮތެއްތޯ މިފެއަރގައި ބައިވެރިވި ބައެއް ފަރާތްތަކުން ވަނީ ސުވާލު އުފައްދާފައެވެ.

އެހެންކަމުން މިފަހަރުގެ ފެއަރގައި އެމް.އެމް.ޕީ.އާރް.ސީގެ މާކެޓިންގ ސްޓްރެޓެޖީއާއި ޚަރަދުތަކާމެދު ވަނީ ފާޑުކިޔުންތައް އިތުރުވެފައެވެ. އައިޓީބީ ބަރލިން ކޮންވެންޝަން އޮންނާނީ އައިޓީބީ ބަރލިންގެ ބައެއްގެ ގޮތުގައި 4ން 6 މާރޗް 2025 އަށް ބަރލިން އެގްޒިބިޝަން ގްރައުންޑްސްގައެވެ. 

އައިޓީބީ (އިންޓަނޭޝަނަލް ޓޫރިޒަމް ބަރލިން) އަކީ ޔޫރަޕްގެ ސަރަޙައްދުގައި، ބާއްވާ ދުނިޔޭގެ އެންމެ ކުރީ ސަފުގެ ދަތުރުފަތުރުގެ ވިޔަފާރީގެ ޝޯއެވެ.އައިޓީބީ ބަރލިން އިވެންޓަކީ ދަތުރުފަތުރުގެ ދާއިރާގައި މަސައްކަތްކުރައްވާ ފަރާތްތާއި، އެކި އުފެންދުންތެރިން ދުނިޔޭގެ އެކި ކަންކޮޅުތަކުން އެއްތަނަކަށް އެއްވެ، ފަތުރުވެރިކަމުގެ ޕްރޮފެޝަނަލުންނާއި އެއްތަނަކުން ބައްދަލުވެ، މަޝްވަރާކޮށް ވިޔަފާރީގެ އެކި ކަންކަމުގައި ގުޅުންބަދަލިވެގެންދާ ވަރަށް ރަނގަޅު ޕްލެޓްފޯމެކެވެ.

2024 ވަނަ އަހަރު، މި ކޮންވެންޝަނަށް 24,000 އަށް ވުރެ ގިނަ މީހުން ޒިޔާރަތްކުރިއެވެ. ދުނިޔޭގެ ފަތުރުވެރިކަމުގެ އެންމެބޮޑު މައުރަޒު އައިޓީބީ ބާލިން ފެއާގައި ދިވެހިރާއްޖެއިން އެންމެ ފުރަތަމަ ބައިވެރިވީ މީގެ 37 އަހަރުކުރިން 1986ގައެވެ.