ކުޑަހުވަދޫއާ ދެކޮޅަށް ކުޅޭ މެޗު ފަސޭހަނުވާނެ ކަމަށާއި، ކުޅުންތެރިންގެ އަސްލު ފޯމު ދައްކައިފިނަމަ މޮޅުވާނެ ކަމަށް ކްލަބް ގްރީން ސްޓްރީޓްގެ ކޯޗު ސޮބާހް މުހައްމަދު (ސޮބާ) ބުނެފި އެވެ.
އުރީދޫ ދިވެހި ޕްރިމިއާ ލީގުގައި ކުޑަހުވަދޫއާ ދެކޮޅަށް ނިކުތުމުގެ ކުރިން ނޫސްވެރިންނަށް މައުލޫމާތު ދެމުން ސޮބާ ބުނީ ކުޑަހުވަދޫ ޓީމު އަންނަނީ ޝިޔާޒް މުހައްމަދު (މޯހަން) ގެ އިރުޝާދުގެ ދަށުން ރަނގަޅު ފުޓުބޯޅައެއް ކުޅެމުން ކަމަށާއި، އެޓީމު މެޗަކަށްފަހު މެޗެއް ރަނގަޅުކުރަމުން އަންނަ ކަމަށެވެ.
ސޮބާ ބުނީ ކުޑަހުވަދޫ މެޗަކީ ފަސޭހަ މެޗަކަށްވެގެންނުދާނެ ކަމަށާއި، ފުޓުބޯޅައިގައި ކޮންމެފަދަ ނަތީޖާއެއްވެސް ނިކުމެދާނެ ކަމަށް ގަބޫލުކުރާ ކަމަށެވެ. އެގޮތުން ކުޑަހުވަދޫއަށް ފުރިހަމައަށް އިހުތިރާމްކުރާނެ ކަމަށާއި، އެޓީމު ވަރަށް ސީރިއަސްކޮށް ނަގާނެ ކަމަށްވެސް އޭނާ ވަނީ ބުނެފައެވެ.
މީގެއިތުރުން ސޮބާ ބުނީ ޓީމުގެ ކުޅުންތެރިންގެ އަސްލު ފޯމު ދައްކައިފިނަމަ ކުޑަހުވަދޫއާ ދެކޮޅަށް ކުޅޭ މެޗު ކާމިޔާބުކުރެވޭނެ ކަމަށެވެ. އެގޮތުން އޭނާ ބުނީ ސީޒަން ރަނގަޅު ހިސާބެއްގައި ނިންމާލަން ކުޑަ ހުވަދޫ މެޗުގެ ތިން ޕޮއިންޓު ވަރަށް މުހިންމު ކަމަށެވެ.
ސޮބާ ލީގުގެ ހުރިހާ މެޗެއް ވެސް ބަލަމުން އަންނަ ކަމަށާއި، އެހެން ނަމަވެސް ކުޑަހުވަދޫގެ އެއްވެސް ކުޅުންތެރިޔަކު ޕާސަނެލްކޮށް ނުދަންނަ ކަމަށެވެ. އެގޮތުން އޭނާ ބުނީ ކުޑަހުވަދޫގެ ނަމްބަރު ހަތެއް ވަރަށް ހުނަރުވެރިކަމަށާއި، އެޓީމުގައި ތިބޭ ތިން އެފްރިކާ ކުޅުންތެރިންނަކީ ވެސް ފިޒިކަލް ރަނގަޅު ކުޅުންތެރިން ކަމަށެވެ.
ފުރަތަމަ ޑިވިޝަނަށް އަލަށް އައި ޓީމުތަކުގެ ކުޅުން ފެނިފައިވާކަން ފާހަގަކުރަމުން ސޮބާ ބުނީ އެ ޓީމުތައް ރަނގަޅަށް ކުޅެމުން އަންނަ ކަމަށެވެ.
ލީގުގައި ކުޑަހުވަދޫ ކުޅުނު ތިން މެޗުގެ ތެރެއިން ދެ މެޗުން އެޓީމު ބަލިވެފައިވާއިރު، އެއް މެޗު ވަނީ އެއްވަރުވެފައެވެ. ގްރީން ސްޓްރީޓް ކުޅުނު ތިން މެޗުގެ ތެރެއިން ދެ މެޗުން މޮޅުވެފައިވާއިރު، އެއް މެޗުން ވަނީ އެޓީމު ބަލިވެފައެވެ.
