ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި ބެންފީކާއާ ދެކޮޅަށް ކުޅުނު މެޗުން ބާސެލޯނާ މޮޅުވެއްޖެ އެވެ.

ބެންފީކާގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗު ބާސެލޯނާ އިން ކާމިޔާބު ކުރީ 1-0 އިންނެވެ. މެޗުގައި ބާސެލޯނާ އިން ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ.

އައު ފޯމެޓުގެ ދަށުން މިފަހަރުގެ ޗެމްޕިއަންސް ލީގު ކުޅެމުން އަންނައިރު، މުބާރާތުގެ ލީގު ބުރުގައި ވެސް މި ދެ ޓީމު ވަނީ ބައްދަލުކޮށްފަ އެވެ. އެ މެޗު ބާސެލޯނާ އިން ކާމިޔާބު ކުރީ 5-4 ގެ ނަތީޖާ އަކުންނެވެ.

ބާސެލޯނާއާ ދެކޮޅަށް ކުޅުނު މެޗުގައި ބެންފީކާ އިން ވަނީ ރަނގަޅު ކުޅުމެއް ދައްކައިފަ އެވެ. މެޗު ފަށައިގެން ބާސެލޯނާ އަށް ރަނގަޅަށް ނުކުޅެވި ދިޔައިރު، ބެންފީކާ އިން ވަނީ ނުރައްކާތެރި ހަމަލާތަކެއް އުފައްދައިފަ އެވެ. ނަމަވެސް އެ ޓީމުގެ ހަމަލާތައް ދިފާއު ކުރުމުގައި ބާސެލޯނާގެ ގޯލު ކީޕަރު ވޮޒްޝިއޭ ޝެޒްނީ ވަނީ މޮޅު ކުޅުމެއް ދައްކައިފަ އެވެ.

މެޗުގައި ލަނޑު ޖެހުމަށް ބާސެލޯނާ އިން މަސައްކަތް ކުރަމުން ދަނިކޮށް އެ ޓީމަށް އެންމެ ބޮޑު ގެއްލުމެއް ދެއްކީ، މެޗުގެ 22 ވަނަ މިނެޓުގައި ޕައު ސުބާސީ އަށް ސީދާ ރަތް ކާޑު ދެއްކުމުންނެވެ. އެއީ ބާސެލޯނާގެ ގޯލު އޭރިޔާ ކައިރިން ބެންފީކާގެ ކުޅުންތެރިޔަކަށް އޭނާ ކުރި ފައުލަކާ ގުޅިގެންނެވެ.

އެއް ކުޅުންތެރިޔަކު މަދުން ނަމަވެސް، މެޗުގެ ދެ ވަނަ ހާފުގައި ބާސެލޯނާ އިން ރަނގަޅަށް ކުޅުނުއިރު، އެ ޓީމުން ވަނީ ލަަނޑު ޖަހައި ލީޑު ނަގައިފަ އެވެ. މެޗުގެ 61 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ރަފީނިއާ އެވެ.

ފުރަތަމަ ލެގުގައި ބެންފީކާ ބަލިކޮށް ބާސެލޯނާ އިން ކުއާޓާ ފައިނަލްގެ އުންމީދު ހޯދާފައިވާއިރު، މި ދެ ޓީމު ބައްދަލު ކުރާ ދެ ވަނަ ލެގު އޮންނާނީ ބާސެލޯނާގެ އަމިއްލަ ދަނޑުގަ އެވެ. އެ މެޗު އޮތީ މާޗު މަހުގެ 11 ވަނަ ދުވަހު އެވެ.