ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ކުރީގެ ރައީސް ސެޕް ބްލެޓަރ އަދި ޔޫރަޕުގެ ފުޓުބޯޅަ އެސޯސިއޭޝަން (ޔުއެފާ)ގެ ކުރީގެ ރައީސް މިޝޭލް ޕްލެޓިނީގެ މައްޗަށް ކުރެވޭ ޚިޔާނާތާއި ކޮރަޕްޝަންގެ މައްސަލައިގެ އިސްތިއުނާފުގެ އަޑުއެހުމަށް އެ ދެ ބޭފުޅުން ކޯޓަށް ޙާޟިރު ކޮށްފި އެވެ.

ބްލެޓަރ އަަދި ޕްލެޓިނީގެ މައްޗަށް ކުރެވޭ ތުހުމަތުގައި މީގެ ކުރިން ވަނީ އެ ދެ މީހުންގެ މައްސަލައެއް ނެތް ކަމަށް ކޯޓުން ކަނޑައަޅައިފަ އެވެ. ސްވިޓްޒަލެންޑުގެ ދަށު ކޯޓަކުން އެ މައްސަލަ ބެލުމަށްފަހު، އެ ދެ މީހުންގެ މައްސަލައެއް ނެތް ކަމަށް ނިންމާފައި ވަނީ 2022 ވަނަ އަހަރު އެވެ. އެއީ ހަތް އަހަރު ދުވަހުގެ ދިގު މުއްދަތަކަށް ކުރިއަށް ގެންދިޔަ ތަހުގީގަށް ފަހު އެވެ.

ފުޓުބޯޅައިގެ ދެ ބާރުގެ ކުރީގެ ވެރިންގެ މައްޗަށް ކުރެވޭ ޚިޔާނާތުގެ ތުހުމަތަކީ 2.22 މިލިއަން އެމެރިކާ ޑޮލަރާ ގުޅުން ހުރި މައްސަލަ އެކެވެ. އެ ތުހުމަތުގައި ބުނެފައި ވަނީ ފީފާގެ ކުރީގެ ރައީސް ބްލެޓަރ، ޔުއެފާގެ ކުރީގެ ރައީސް ޕްލަޓެނީ އަށް 2.22 މިލިއަން އެމެރިކާ ޑޮލަރު ދީފައި ވަނީ، ޤަވާއިދާ ޚިލާފަށް ކަމަށެވެ.

މި ދެ މީހުންގެ މައްޗަށް އުފުލާފައިވާ ދައުވާގައި މީގެ ކުރިން 2021 ވަނަ އަހަރު ޕަބްލިކް ޕްރޮސެކިއުޓަރުން ބުނެފައި ވަނީ، އެ މުއާމަލާތުގެ ސަބަބުން ފީފާގެ މުދަލަށް ގެއްލުން ލިބިފައިވާ ކަމަށެވެ. އަދި އެކަމުގެ ސަބަބުން ޤާނޫނުތަކާއި، ޤަވާއިދުތަކާ ޚިލާފަށް ޕްލަޓެނީ އަށް މުއްސަނދި ކަމެއް ލިބިފަައިވާ ކަމަށް ވެސް ބުނެފައިވެ އެވެ.

އެ މުއާމަލާތް ހިންގާފައި ވަނީ ޞައްޙަ ގޮތުގައި ކަމަށް ސްވިޓްޒަލެންޑުގެ ދަށު ކޯޓުން ކުރި ޙުކުމް، މަތީ ކޯޓުގައި ވަނީ އިސްތިއުނާފު ކޮށްފަ އެވެ. އެ އިސްތިއުނާފުގެ އަޑު އެހުންތައް ފަށާފައިވާއިރު، ބްލެޓަރ އަދި ޕަލްޓެނީ ވަނީ ހޯމަ ދުވަހު ސްވިޒަލެންޑުގެ މަތީ ކޯޓަށް ޙާޟިރު ކޮށްފަ އެވެ.

މި މައްސަލައިގެ ދެ ވަނަ އަޑުއެހުމެއް ބުރާސްފަތި ދުވަހު ބާއްވަން ތާވަލުކޮށްފައިވެ އެވެ. ތިން ފަނޑިޔާރުން ހިމެނޭ ބެންޗަކުން ބަލަމުން އަންނަ މި އިސްތިއުނާފުގެ ޙުކުމް ކުރުން އޮންނާނީ، މާޗު މަހުގެ 25 ވަނަ ދުވަހު ކަމަށް މީޑިއާ ރިޕޯޓުތައް ބުނެ އެވެ.