މިފްކޯގެ ސީއީއޯގެ މަޤާމް ގެއްލުނީ ކޮރަޕްޝަނާ ދެކޮޅަށް އޭނާ ފެށި މަސައްކަތުން: ޔައުޤޫބް
މިފްކޯގެ ކޮރަޕްޝަން މުލުން ލުހެލާނެ ކަމަށް ރައީސް މުއިއްޒު ވިދާޅުވި
ދާންދޫ ދާއިރާގެ ކުރީގެ މެންބަރު ޔައުގޫބް އަބްދުﷲ
މިދިޔަ އަހަރުގެ ޑިސެންބަރު މަހުގެ 10 ވަނަ ދުވަހު މިފްކޯގެ ސީއީއޯގެ މަޤާމަށް އައްޔަނުކުރި ޑރ. ވިޓާލީ ލިއުބިމޮވްގެ މަޤާމް 3 މަސްތެރޭގައި ގެއްލިގެންދިޔައީ މިފްކޯގެ އެތެރޭގައި އޮތް ކޮރަޕްޝަން ނައްތާލުމަށް އޭނާ ކުރަންފެށި މަސައްކަތާ ދެކޮޅަށް ސިޔާސީ ނުފޫޒު އޮތް ބަޔަކު ތެދުވުމުން ކަމަށް ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެމްބަރު ޔައުޤޫބު އަބުދުﷲ ވިދާޅުވެއްޖެއެވެ. އޭނާ އެހެން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުންނެވެ.
ޔައުޤޫބު ވިދާޅުވީ އޭނާއަށް އެނގިފައިވާ ގޮތުގައި ފަހަކަށް އައިސް މިފްކޯގެ ބޯޑު ބައްދަލުވުންތަކުގައި ސީއީއޯގެ ނިންމުންތަކަށް ދިޔައީ ހުއްޓުމެއްނެތި ފާޑު ކިޔެމުން ކަމަށެވެ. އަދި ވަރަށް ފަހުން ވަކިކުރި މިފްކޯގެ 3 ޖެނެރަލް މެނޭޖަރުން ވަކިކުރި ފަހުން އެކުންފުނީގެ ބޯޑު ބައްދަލުވުންތައް އިތުރަށް ދިޔައީ ހޫނުވަމުން ކަމަށް ވިދާޅުވިއެވެ.
މިފްކޯގެ ސީއީއޯ މިމަހުގެ 3 ވަނަ ދުވަހު އެމަޤާމުން ވަކިކުރުމުގެ ކުރިން އޮތް ބޯޑު ބައްދަލުވުމެއްގައި ސީއީއޯގެ ހިތްހަމަނުޖެހުން ބޮޑުވެގެން ގޮސް ކަރުދާސްތަކެއް ވީދާލިކަމަށް ވެސް އެނގިފައިވާ ކަމަށް ޔައުޤޫބު ވިދާޅުވިއެވެ.
ޔައުޤޫބު ވިދާޅުވީ ސީއީއޯގެ މަޤާމާ ޑރ. ވިޓާލީ ހަވާލުވެލެއްވުމަށް ފަހު އޭނާ ކޮރަޕްޝަނާ ދެކޮޅަށް ކުރައްވާ މަސައްކަތަށް ހުރަސް އެޅުމަށް ނުވަތަ ނުފޫޒު ފޯރުވަން މަސައްކަތްކުރާ ފަރާތްތަކެއް ތިބި ނަމަ އެފަރާތްތަކެއްގެ ނަން ހާމަ ކުރައްވާނެ ކަމަށް ވިދާޅުވުމުން އޭރު ކޮންމެސް ވަރެއްގެ ހިންހަމަޖެހުމެއް ލިބިލެއްވި ކަމަށެވެ.
އިސްލާހީ ފިޔަވަޅުގެ ދަށުންކަމަށް ބުނެ މިފްކޯގެ 3 ޖެނެރަލް މެނޭޖަރުން މަޤާމުން ވަކިކޮށްފައިވަނީ މިދިޔަ ފެބްރުއަރީމަހުގެ 18 ވަނަ ދުވަހުއެވެ.
ޑރ، ވިޓާލީ ސީއީއޯގެ މަޤާމަށް އައްޔަނު ކުރެވުނު ފަހުން ރައީސް މުޢިއްޒު ވިދާޅުވެފައިވަނީ މިފްކޯގެ ކޮރަޕްޝަން މުލުން ލުހެލާނެ ކަމަށެވެ.
