މިދިޔަ އަހަރުގެ ޖެނުއަރީމަހު 373 މިލިޔަން ރުފިޔާގެ އާމްދަނީއެއް ކަސްޓަމްސްއަށް ލިބިފައިވާއިރު މިއަހަރުގެ ޖެނުއަރީ މަހު ކަސްޓަމްސްގެ ތަފާސްހިސާބުތަކުން ދައްކާގޮތުން އާމްދަނީގެ ގޮތުގައި ލިބިފައިވަނީ 287 މިލިޔަން ރުފިޔާ އެވެ.

އެހެން ކަމުން އާމްދަނީގެ މިންވަރު ވަނީ 86 މިލިއަން ރުފިޔާ ދަށަށް ގޮސްފައެވެ.

މިއަހަރުގެ ޖަނަވަރީ މަހުގެ ފުރަތަމަ ދުވަހުން ފެށިގެން ޗައިނާ އާ އެކު ސޮއި ކުރި މިނިވަން ވިޔަފާރީގެ އެއްބަސްވުމުގެ ދަށުން ރާއްޖެއަށް އެންމެ ގިނަައިން މުދާ ގެންނަ އެއް ގައުމު ކަމުގައިވާ ޗައިނާ އިން އެތެރެ ކުރާ ގިނަ ބާވަތްތަކުގެ މުދަލަށް އިމްޕޯޓް ޑިއުޓީ އެއް ރާއްޖެއިން ނުނަގައެވެ.

ޗައިނާ އިން ޖަނަވަރީ މަހުގެ ތެރޭގައި ރާއްޖެ އަށް 1043 މިލިއަން ރުފިޔާގެ މުދާ ވަނީ އެތެރެކޮށްފައެވެ.

އިމްޕޯޓް އެކްސްޕޯޓްގެ ތަފާސްހިސާބުތަކުން ދައްކާގޮތުން ޖަނަވަރީ މަހު ރާއްޖެއަށް 5.2 ބިލިޔަން ރުފިޔާގެ މުދާ އެތެރެކޮށްފައިވެއެވެ.

ކަސްޓަމްސްގެ ތަފާސްހިސާބުތަކުން ދައްކާގޮތުން މިދިޔަ ޖެނުއަރީމަހު ރާއްޖެ އަށް އެތެރެ ކުރި މުދަލުގެ އަގު އޭގެ ކުރީ ޖެނުއަރީގައި އެތެެރެ ކުރި މިންވަރަށް ވުރެ މައްޗަށް ގޮސްފައިވެއެވެ. މިދިޔަ ޖެނުއަރީމަހު 5.2 ބިލިޔަން ރުފިޔާގެ މުދާ އެތެރެކޮށްފައިވާއިރު، މިދިޔަ އަހަރުގެ ޖެނުއަރީމަހު އެތެރެކޮށްފައިވަނީ 5.1 ބިލިޔަން ރުފިޔާގެ މުދަލެވެ.

އަނެއްކޮޅުން ކުރީ އަހަރުގެ ޖެނުއަރީ މަހު ރާއްޖެއިން އެކްސްޕޯޓް ކުރި މުދަލުގެ އަގަށް ވުރެ މިއަހަރުގެ ޖެނުއަރީ މަހު އެކްސްޕޯޓް ކުރި މުދަލުގެ އަގު ވަނީ 29 މިލިއަން ރުފިޔާ ދަށް ވެފައެވެ. މިދިޔަ ޖެނުއަރީމަހު 144 މިލިޔަން ރުފިޔާގެ މުދާ އެކްސްޕޯޓް ކޮށްފައިވާއިރު، ކުރީ އަހަރުގެ ޖެނުއަރީމަހު 173 މިލިޔަން ރުފިޔާގެ މުދާ ވަނީ އެކްސްޕޯޓްކޮށްފައެވެ.