ހއ. ދިއްދޫ އެއަރޕޯޓް ތަރައްގީ ކުރަން ކޮންޓްރެކްޓަރ ފައިނޭންސް އުސޫލުން އެއްވެސް ބަޔަކާ ހަވާލު ކުރެވިފައި ނުވާކަމަށް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ މިނިސްޓަރ އަބްދުﷲ މުއްތަލިބު ވިދާޅުވެއްޖެއެވެ.

ރައްޔިތުން މަޖިލިހަށް 24 ފެބްރުއަރީ 2025 ގެ ތާރީޚުގައި ފޮނުއްވި ސިޓީ އެއްގައި މުއްތަލިބު އިތުރަށް ވިދާޅުވީ، ދިއްދޫ އެއަރޕޯޓުގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަސައްކަތް އެމްޓީސީސީ އާ 19 އޭޕްރީލް 2024 ގައި ހަވާލު ކުރެވިފައިވާ ކަމަށާއި އެހެން ނަމަވެސް އެކަމުގެ އަމަލީ މަސައްކަތް ފެށިފައި ނުވާ ކަމުގައެވެ.

ބިންހިއްކުމާއި ތޮށިލުމުގެ މަސައްކަތް އެމްޓީސީސީ އާ ހަވާލު ކުރެވިފައިވީ ނަމަވެސް މި މަޝްރޫއުގެ ފީސިބިލިޓީ ސްޓަޑީ އެއް ހަދާފައި ނުވާ ކަމަށް ވެސް މުއްތަލިބު ވިދާޅުވިއެވެ.

ދިއްދޫ އެއަރޕޯޓް ތަރައްގީ ކުރަން ކޮންޓްރެކްޓަރ ފައިނޭންސް އުސޫލުން އެއްވެސް ބަޔަކާ ހަވާލު ކުރެވިފައި ނުވާކަމަށް ވިދާޅުވެ މުއްތަލިބު ރައްޔިތުންގެ މަޖިލިހަށް މައުލޫމާތު ދެއްވި އިރު އެއީ ކަނޑައެޅިގެން އިތުރުފުޅެކެވެ.

ހއ. ދިއްދޫ އެއަރޕޯޓް ޕްރޮޖެކްޓުގެ ފްރޭމްވޯކް އެއްބަސްވުމުގައި ޗައިނާގެ ކުންފުންޏަކާއެކު މޯލްޑިވްސް އެއަރޕޯޓްސް ކުންފުނިން ވަނީ ސޮއިކޮށްފައެވެ. ސޮއިކުރި އިވެންޓްގެ ފޮޓޯތައް ގިނަ ބަޔަކަށް ވަނީ ފެނިފައެވެ.

ސޮއި ކުރުމަށް އެއަރޕޯޓު ކުންފުނީގައި ބޭއްވި ރަސްމިއްޔާތުގައި ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު ވެސް ބައިވެރިވެވަޑައިގެންފައިވެއެވެ.

އެ އެއްބަސްވުމުގައި އެއަރޕޯޓްސް ކުންފުނީގެ ފަރާތުން ސޮއި ކުރެއްވީ، ކުންފުނީގެ ޗީފް އެގްޒެކެޓިވް އޮފިސަރު އިބްރާހީމް ޝަރީފް މުހައްމަދު އެވެ.

ފްރޭމްވޯކް އެއްބަސްވުމާ ބެހޭ އެއްވެސް ތަފްސީލެއް ސަރުކާރުން ހާމަކޮށްފައެއް ނުވެއެވެ.

އަޑި ނޭގޭ ގޮތައް ހަވާލު ކުރި މި މަޝްރޫއުގައި އެތައް މިލިއަން ޑޮލަރުގެ ކަރަޕްޝަން އެކުލެވޭ ކަމުގެ ވާހަކަތައް ވަނީ ފެންމަތިވެފައެވެ.

ދިއްދޫ އަށް ރައީސް މުއިއްޒު މި އަހަރުގެ ޖަނަވަރީ މަހުގެ ފަހުކޮޅު ކުރެއްވި ދަތުރުފުޅުގައި ވެސް އެރަށުގެ ރައްޔިތުންނާ އެކު ބޭއްވެވި ބައްދަލުވުމުގައި ބޭރުގެ ބަޔަކާ އެކު ފްރޭމްވޯކް އެއްބަސްވުމެއްގައި ސޮއިކޮށްފައިވާ ކަމަށް ވިދާޅުވިއެވެ.

އެ ބައްދަލުވުމުގައި ދިއްދޫއަށް ދެން ވަޑައިގަންނަވާނީ، އެ ރަށުގެ އެއަރޕޯޓަށް ޖައްސާ މަތިންދާ ބޯޓުގައި، އެ އެއަރޕޯޓް ހުޅުވައިދެއްވުމަށް ކަމަށް ވެސް މުއިއްޒު ވިދާޅުވިއެވެ.

އަދުގެ ސަރުކާރުން ގެންގުޅޭ ސަރަޙައްދީ ތަރައްޤީގެ ވިސްނުމުގައި، ހއ. ދިއްދޫގައި އެއަރޕޯރޓެއް އެޅުމަކީ ކޮންމެހެން ކުރަންޖެހޭ ކަމެއް ކަމަށާއި، އެކަން ކޮށްދެއްވާނެ ކަމުގެ ޔަޤީންކަން، އެ ދަތުރުފުޅުގައި ވެސް މުޢިއްޒު ދެއްވިއެވެ.

މި މޭރުމުން ވާހަކަފުޅުދައްވަމުން މުއިއްޒު ވިދާޅުވީ، ހއ. ދިއްދޫގައި އެއަރޕޯޓް ތަރައްޤީ ކުރުމުގެ ޢަމަލީ މަސައްކަތްތައް ފެށުމަށް މިހާރުވެސް ގިނަ މަސައްކަތްތަކެއް ތަރުތީބުކުރެވިފައިވާ ކަމަށެވެ. އެގޮތުން، އެމް.ޓީ.ސީ.ސީއާއި، ބޭރުގެ ފަރާތަކާއެކު ފްރޭމްވަރކް އެއްބަސްވުމެއް އެކުލަވައިލެވި، ޢަމަލީ މަސައްކަތްތައް ފެށުމާ ހަމައަށް މިހާރު ދަތުރުކުރެވިފައިވާ ކަމަށެވެ.