ރައްޔިތުންގެ މަޖިލީހުގެ މެމްބަރުންނަށް ލިބޭ މުސަރާއި، އިނާޔަތްތަކާއި އެއްވަރަށް މަސައްކަތް ނުކުރާ ޝަކުވާ އަބަދުވެސް ބޮޑެވެ. 80،000ށް ވުރެމަތިން މުސަރާ ނަންގަވައިގެން މަޖިލީހުގެ ޖަލްސާތަކަށް ގަވާއިދުން ހާޒިރުނުވާ މެންބަރުން ވެސް އެމަޖިލީހުގައި ތިއްބަވައެވެ. ރައްޔިތުންގެ ފާޑުކިޔުންތައް އަމާޒުވި ނަމަވެސް މެމްބަރުންގެ ކަންކަން ނިންމެވުމަށް ވެސް ތިއްބެވީ މެންބަރުން ކަމަށްވާތީ، ރައްޔިތުން އެދޭ ފަދަ ހެޔޮ ބަދަލެއް މަޖިލީހަކުން ނުފެނެއެވެ.

ޚާއްސަކޮށް މިހާރު އޮތް ސަރުކާރުގެ ސުޕަރ މެޖޯރިޓީ އޮތް 20 ވަނަ ރައްޔިތުންގެ މަޖިލީހަކީ ރައްޔިތުންގެ ހައްގުގައި މަސައްކަތް ކުރާ މަޖިލީހަކަށްވުރެ، ބޮޑަށް ރައީސް ޑރ.މުހައްމަދު މުއިއްޒު ނިންމަވާ ނިންމެވުންތައް ތަންފީޒު ކުރުމަށްޓަކައި މަޖިލީހުން ކުރަންޖެހޭ މަސައްކަތްތައް އަވަސް އަރުވާލައިގެން ކުރާ މަޖިލީހެއްގެ ގޮތުގައި ވަނީ ފެނިގެން ގޮސްފައެވެ.

ކަންމިހެން އޮތްވައި، ރަމަޟާން މަހާއި ގާތްވެފައިވަނިކޮށް، 13 ފެބްރުއަރީ 2025 ގައި ޕީއެންސީގެ އަޣުލަބިއްޔަތު އޮންނަ އާންމު ކޮމިޓީން ވަނީ ރޯދަ މަހު މަޖިލިސް ބަންދު ކުރަން ފާސް ވެސް ކޮށްފައެވެ. ނަމަވެސް އެމްޑީޕީގެ މަޖިލިސް މެންބަރުން ދެކޮޅު ހައްދަވައި، އާއްމު ރައްޔިތުންގެ ބޮޑެތި ފާޑުކިޔުންތަކެއް އަމާޒުވުމާއި ގުޅިގެން އެނިންމުން ބަދަލުކުރިއެވެ. އަދި 26 ފެބްރުއަރީ 2025 ވީ ބުދަ ދުވަހު ކުރިއަށް ގެންދިޔަ ޖަލްސާގައި މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ، ރަމަޟާން މަހު ބާއްވާ ޖަލްސާތައް ހެނދުނު 10:30ން މެންދުރު 14:00ށް ކުރިއަށްގެންދާނެ ކަމަށެވެ.

އެގޮތުން 3 މާރިޗު 2025 ވީ ހޯމަ ދުވަހު މިވަނީ ރަމަޟާން މަހުގެ ފުރަތަމަ ޖަލްސާ ބާއްވާފައެވެ. 10:30 ގައި ފެށި މި ޖަލްސާ ކުރިއަށް ގެންގޮސްފައިވަނީ 30 މިނެޓާއި، 26 ސިކުންތަށެވެ. މި ޖަލްސާއަށް އެޖެންޑާގައި އޮތީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް، އިކޮނޮމިކް މިނިސްޓަރު މުހައްމަދު ސައީދާ ލިޔުމުން ޖަވާބު ހޯދުމަށް ކުރެއްވި ހަތަރު ސުވާލުގެ ޖަވާބު ތަޅުމަށް އިއްވުމާއި އަދި ގައުމުތަކަށް ނޮން-ރެޒިޑެންޓް ސަފީރުން އައްޔަނުކުރުމުގެ މަސައްކަތެވެ.

މި ހޯމަ ދުވަހުގެ ޖަލްސާގެ އެޖެންޑާގެ މަސައްކަތްތައް ނިންމާލުމަށްފަހު، މަޖިލީހުގެ ހުރިހާ މަސައްކަތެއް ވަނީ ނިންމާލާފައެވެ. މީގެ ކުރިން މަޖިލީހުގައި މަސައްކަތްތައް ކުރިއަށް ގެންދާ ގޮތަށްބަލާއިރު، އެޖެންޑާގައި ހިމެނިފައިވާ މަސައްކަތްތައް ނިމުނު ނަމަވެސް އެކިއެކި ކޮމެޓީތަކުގެ މަސައްކަތްތައް ކުރިއަށް ގެންދެއެވެ. ނަމަވެސް ހޯމަ ދުވަހު ކޮމެޓީތައް ތާވަލުކޮށްފައިނުވެއެވެ.

މިއީ ރައްޔިތުންނަށްހައްގު މިންވަރުތޯ ސުވާލުކޮށްލުން ރަނގަޅެވެ. ރޯދަ މަހަކަސް، އީދަކަސް ލިބޭ މުސާރަކޮޅު ހަލާލުވޭތޯ ދިވެހި އެތައް ބަޔަކު ގުދާރު ބިންގައިގެން ދަންދެން މަސައްކަތް ކުރަނީއެވެ. ބައެއް ޚިދުމަތްތައް ދޭ މީހުންނަށް ބަންދު ދުވަހެއް ލިބެނީ ދަމަކުން ބަޑިއެއް ޖަހާ އުސޫލުންނެވެ. އެ ވެރިންނަށް ލިބޭ މުސާރައިން ކިރިޔާ ކަތާވަރު ވަނީއެވެ. ނަމަވެސް އެއްކަލަ 82500 ރުފިޔާ ލިބިވަޑައިގަންނަވާ މެމްބަރު، ހުދު ގަމީހާއި ޓައި ކޮޅުގައި މަޖިލީސް ކުރާ ގެކޮޅަށް ހާޒިރުވެފައި، 30 މިނިޓު ފަހުން ޒިންމާއިން މިންޖުވީއެވެ. މިއީ ރައްޔިތު މީހާ އަށް ހައްގު މިންވަރުކަމަށް ދެކޭ މެމްބަރުންތަކެއް ރައްޔިތުންގެ މަންދޫބުން ކަމުގައި ތިބިއްޔާ ދެން މި ގައުމުގެ ޙާލަތު ވިސްނާލައްވާށެވެ. ދެންވެސް ކިޔަންވީ ހަމަ ރައްޔިތުންގެ މެމްބަރުންނޭތޯއެވެ؟