ދިއްދޫ ފުޓުބޯޅަ ދަނޑުގައި ޒުވާނުން ކުޅުމަށް ހުރަސް އަޅައި، ކަރަންޓު ބޯޑު ނަގައިފި
އާދީއްތަ ދުވަހުގެ ވަގުތެއްގައި ދިއްދޫ ފެނަކަ ބްރާންޗުގައި މަސައްކަތް ކުރާ މުވައްޒަފުންތަކެއް ވަނީ ދަނޑުގައި ހުރި ކަރަންޓު ބޯޑު ނައްޓާލައިފައި
ދިއްދޫ ފުޓުބޯޅަ ދަނޑުގައި ހުރި ކަރަންޓު ބޯޑު ނައްޓާލުމުގެ މަސައްކަތް ކުރިއަށް ގެންދިޔަ ވަގުތު އެ ސަރަހައްދުގައި އެ ރަށުގެ ޒުވާނުން އެއްވެފައި
ހއ.ދިއްދޫ ގައި ޤާއިމުކޮށްފައިވާ ބޮޑު ފުޓުބޯޅަ ދަނޑުގައި، ރޭގަނޑު ޒުވާނުން ކުޅުމަށް ހުރަސް އަޅައި، އެ ރަށު ކައުންސިލް ރައީސްގެ އެންގުމަށް ދަނޑުގައި ހުރި ކަރަންޓު ބޯޑު ނަގައިފި އެވެ.
ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން ރާއްޖޭގެ އެކި ކަންކޮޅުތަކުގައި ބޮަޑު ފުޓުބޯޅަ ދަނޑު ޤާއިމު ކުރުމުގެ މަޝްރޫއު ކުރިއަށް ގެންދިޔައިރު، ދިއްދޫ ގައި ވެސް ވަނީ ދަނޑެއް ޤާއިމު ކޮށްފަ އެވެ. އަދި ރޭގަނޑުގެ ވަގުތުގައި ކުޅެވޭ ގޮތަށް ދަނޑުގައި ލައިޓް ޖެހުމުގެ މަސައްކަތް ވެސް ކުރީ ސަރުކާރުގައި އޮތީ ނިންމައިފަ އެވެ.
އެހެންކަމުން ޒުވާނުން ރޭގަނޑުގެ ވަގުތުގައި ކުޅެން ބޭނުންވާއިރު، އެ ރަށު ކައުންސިލުން އެކަމަށް ހުރަސްއަޅާ ކަމަށް ދިއްދޫގެ ކުޅިވަރު ޖަމިއްޔާތަކުން ބުނެ އެވެ. އެގޮތުން ރޭގަނޑުގެ ވަގުތުގައި ދަނޑުގެ ލައިޓުތައް ޖެއްސުމުން ކަރަންޓު ޚަރަދު ބޮޑުވާ ކަމަށާއި، ކަރަންޓު ބިލަށް ފައިސާ ދައްކާނެ ބަޖެޓު ކައުންސިލްގައި ނެތް ކަމަށް ވެސް ކައުންސިލުން ބުނެފައިވާ ކަމަށް އެ ޖަމިއްޔާތަކުން ބުނެ އެވެ.
އެހެން ނަމަވެސް، މިއަހަރުގެ ތެރޭގައި ކުޅިވަރު ވަޒީރު ޢަބްދުﷲ ރާފިޢު ދިއްދޫ އަށް ވަޑައިގެންނެވި ދަތުރެއްގައި ޒުވާނުން ވަނީ އެކަމުގެ ކަންބޮޑުވުން ވަޒީރާ ވެސް ހިއްސާކޮށްފަ އެވެ. އެއާއެކު، މި ރަމަޟާން މަހުގެ ތެރޭ ރޭގަނޑުގެ ވަގުތުގައި ވެސް ދަނޑުގައި ކުޅެވޭނެ އިންތިޒާމު ހަމަޖައްސައި ދެއްވާނެ ކަމަށް ވަޒީރު ވިދާޅުވި ކަމަށް ޖަމިއްޔާތަކުން ބުނެ އެވެ. އަދި ވަޒީރު އެހެން ވިދާޅުވީ ކައުންސިލްގެ ރައީސްގެ ވެސް ޙާޟިރުގައިކަން އެ ފަރާތްތަކުން ފާހަގަ ކުރެ އެވެ.
ރޭގަނޑުގެ ވަގުތުގައި ޒުވާނުން ދަނޑުގައި ކުޅެން ބޭނުންވި ނަމަވެސް، ކައުންސިލުން ވަނީ އެކަމަށް ހުރަސް އަޅައިފަ އެވެ. އެގޮތުން އާދީއްތަ ދުވަހުގެ ވަގުތެއްގައި ދިއްދޫ ފެނަކަ ބްރާންޗުގައި މަސައްކަތް ކުރާ މުވައްޒަފުންތަކެއް ވަނީ ދަނޑުގައި ހުރި ކަރަންޓު ބޯޑު ނައްޓާލައިފަ އެވެ. ފެނަކަ މުވައްޒަފުން އެކަން ކޮށްފައި ވަނީ އެ ރަށު ކައުންސިލް ރައީސްގެ އެންގުމުގެ މަތިން ކަމަށް ކުޅިވަރު ޖަމިއްޔާތަކުން ވަނީ ބުނެފަ އެވެ.
ކަރަންޓު ބޯޑު ނެގުމާ ދެކޮޅު ހެދުމުގެ ގޮތުން ދިއްދޫގެ ޒުވާނުން ވަނީ ދަނޑު ސަރަހައްދުގައި އިހުތިޖާޖު ވެސް ކޮށްފަ އެވެ. އަދި އެ ސަރަހައްދަށް ފުލުހުން ވެސް އައިސްފައިވާއިރު، ދިއްދޫގެ ޒުވާނުންނާއި ފުލުހުންނާ ދެމެދު ކުރިމަތިލުން ތަކެއް ހިނގި ކަމުގެ މައުލޫމާތު ވެސް ލިބިފައިވެ އެވެ.
