ދިވެހިންނަށް ނޭގި ވެރިކަމަށް އައްޔަންކުރެވިފައި މި ހުރީ "ހިޓްލަރ" އެއް - އީސަ
1 މާރިޗު 2025 | ހޮނިހިރު 20:23ތިން ފަނޑިޔާރުން ސަސްޕެންޑްކުރުމާއި، މިނިވަން މުޢައްސަސާތަކަށް އަތްބޭނުން ފަދަ އެތައް ކަމެއް މި ސަރުކާރުގެ ކިބައިން ފެންނަ ކަމަށް އޭނާ ވަނީ ވިދާޅުވެފަ
ކެނދިކުޅުދޫ ދާއިރާގެ ކުރީގެ މެމްބަރު އަހުމަދު އީސަ ފަލަސުރުހީ ޕްރޮގްރާމްގައި ވާހަކަދައްކަވަނީ
ދިވެހިންނަށް ނޭނގި ދިވެހިރާއްޖޭގެ ވެރިކަމަށް މިހާރު އައްޔަން ކުރެވިފައި ހުރީ މި ޤައުމުގެ ހިޓްލަރ ކަމަށް ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ ކުރީގެ މެމްބަރު އަހުމަދު އީސަ ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
ސުޕްރީމް ކޯޓުގެ ތިން ފަނޑިޔާރުން ސަސްޕެންޑްކުރުމާއި، މިނިވަން މުޢައްސަސާތަކަށް އަތްބޭނުން ފަދަ އެތައް ކަމެއް މި ސަރުކާރުގެ ކިބައިން ފެންނަ ކަމަށް އޭނާ ވަނީ ވިދާޅުވެފައެވެ. ސުޕްރީމް ކޯޓުގެ ބާރުތައް ރައީސް ޑރ.މުހައްމަދު މުއިއްޒުގެ އަތް މައްޗަށް ނެންގެވުމުން މުޅި ޤައުމުގެ ބާރު އެ މަނިކުފާނަށް ލިބޭނެ ކަމަށް އީސަ ވިދާޅުވިއެވެ.
ޖަރުމަނުގައި ވެރިކަން ކުރައްވަން އެޑޮލްފް ހިޓްލަރ ވެސް ކުރެއްވި ކަމަކީ ޤާނޫނަށް ބަދަލު ގެންނަވައިގެން، ޤާނޫނަކުން ރައީސަށް ހުރިހާ ބާރެއް ލިބޭ ގޮތް ހަމަޖެއްސުން ކަމަށް އީސަ ވިދާޅުވިއެވެ. އެހެންކަމުން މިއަދު ފެންނަނީ ދިވެހިންނަށް ނޭނގި ދިވެހިންގެ ވެރިއަކަށް ހިޓްލަރ އެއް އައްޔަން ކުރެވިފައިވާ މަންޒަރު ކަމަށް ވެސް އީސަ ވަނީ ވިދާޅުވެފައެވެ.
އީސަ ވިދާޅުވި ގޮތުގައި އެއްވެސް ޤައުމެއްގައި ޚުދުމުހުތާރު ވެރިކަމެއް ޤާއިމް ވަނީ އެއް ދުވަހަކުން ނޫނެވެ. އެއީ އެކި ދުވަސްތައް މަތިން މިނިވަން މުޢައްސަސާތަކާއި އިދާރާތައް ވެރި މީހާގެ މުށުތެރެ އަށް ލުމާއި، އިދާރާތަކާއި މުއައްސަސާތަކުގެ ބާރު ކަނޑުވާލުމުގެ ތެރެއިން ރޭވިގެން ހިނގާ ކަމެއް ކަމަށް އީސަ ވިދާޅުވިއެވެ.
މީގެ އިތުރުން މިއަދު ކަރުގައި ވާ ޖަހައިގެން ސުޕްރީމް ކޯޓު ދަމަމުންދާ ކަމަށް ސިފަކުރައްވާ އޭނާ ވިދާޅުވީ މިހާރު ރާއްޖޭގައި އޮތް ސުޕްރީމް ކޯޓަކީ މުޅި ރާއްޖޭގެ އިތުރުން ބައިނަލްއަޤުވާމީ ގޮތުން ވެސް އެންމެ ބޮޑަށް ބަލައިގަތް ސުޕްރީމް ކޯޓުކަމަށް އީސަ ވަނީ ވިދާޅުވެފައެވެ.
ފަހަރަކު ބާރެއް އަތަށް ނަގަމުން ގޮސް ވެރިކަމުގެ ބާރުތަކަށް އަތް ބާނައިފި. ރައްޔިތުންގެ މަޖިލީހުގެ މެމްބަރުން ބޭނުންކޮށްގެން ރައްޔިތުންގެ މަޖިލީހުގެ ބާރުތައް ކަނޑުވާލައިފި. މިހާރު އެތިބީ އަޅުން. އެއީ މުއިއްޒުގެ އަޅުން. މެމްބަރުން ލައްވާ އެ އުޅެނީ މިނިވަން މުއައްސަސާތަކުގެ ބާރު ކަނޑުވާލަން. މިހާރަކު ނެތް މެމްބަރުން އައްޔަން ކުރި ގޮތުގެ އަސްލެއް އެތާކު (ރައްޔިތުންގެ މަޖިލީހަކު).ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ ކުރީގެ މެމްބަރު އަހުމަދު އީސާ
މެމްބަރުންގެ ބާރުތައް ކަނޑުވާލުމުން ރައްޔިތުން އަނގައިން ނުބުނުމުގެ ނަތީޖާ އަކީ ރައީސް މުއިއްޒު ބޭނުންފުޅުވާ ގޮތަށް މިނިވަން މުއައްސަސާތަކުގެ ބާރު ކަނޑުވާލުން ކަމަށް އޭނާ ވިދާޅުވިއެވެ. އެ ހިސާބުން ވެސް އަޅާ ނުލުމުން މިނިވަން މުއައްސަސާތަކަށް ރައީސް މުއިއްޒު އަތް ބޭނުއްވި ކަމަށާއި އެކަމަށް ވެސް އަޅާ ނުލުމުން ދެން ފެނިގެން ދަނީ ސުޕްރީމް ކޯޓަށް އަތްބާނާ މަންޒަރު ކަމަށް އީސަ ވަނީ ވިދާޅުވެފައެވެ. އެހެންކަމުން މިއަދު ރައީސް މުއިއްޒު ބޭނުންފުޅު ވާ ހުރިހާ ގޮތަކަށް ކަންކަން ދޫކޮށްލައިގެން ރައްޔިތުން ތިބެއްޖެ ނަމަ އޭގެ ނަތީޖާ ވަރަށް ގޯސް ވާނެ ކަމަށް އޭނާ ވިދާޅުވިއެވެ.
