ޔޫއެންގައި ޔުކްރެއިންގެ މައްސަލައިގައި ދިވެހިރާއްޖެއިން ވޯޓު ދިން ގޮތާ ބެހޭ ގޮތުން ކުރީގެ ރައީސް ނަޝީދު އާ ރާއްޖެ އަށް ރަޝިއާ އިން ކަނޑައަޅާފައި ހުންނަވާ ސަފީރު ލިވާން ޖުގޭރިއަން އާ ދެމެދު ބަހުގެ ހަމަލާތަކެއް ހިނގައިފިއެވެ.ފެބްރުއަރީ 24 ވަނަ ދުވަހު ބޭއްވުނު އދ. ގެ އާންމު މަޖިލިހުގެ ޖަލްސާގައި "އެޑްވާންސިންގ އަ ކޮމްޕްރިހެންސިވް، ޖަސްޓް، އެންޑް ލާސްޓިންގ ޕީސް އިން ޔުކްރެއިން" ނަމުގައި ހުށަހެޅި ގަރާރަށް ދިވެހިރާއްޖެއިން ޔުކްރެއިން ކޮޅަށް ވޯޓު ދިނުމާ ގުޅިގެން ކުރީގެ ރައީސް ނަޝީދު ވަނީ މުއިއްޒުގެ ސަރުކާރަށް މަރުހަބާ ވިދާޅުވެ ސޯޝަލް މީޑިއާ ގައި ޕޯސްޓެއް ކުރައްވާފައެވެ.

އެކްސް ގައި ނަޝީދު ކުރެއްވި ޕޯސްޓުގައި ހޯމަ ދުވަހު އޮތް ވޯޓުގައި ރާއްޖެއިން ޔުކްރެއިން ކޮޅަށް ވޯޓު ދިނުމުން އެކަމާ ފަޚުރުވެރިވާ ކަމަށް ވިދާޅުވިއެވެ. އެއާއެކު އެމެރިކާ އިން ރަޝިއާ އާއި އުތުރު ކޮރެއާ ކޮޅަށް ޖެހިފައިވާ މަންޒަރު ފެނުމުން ހައިރާންކަން ލިބިވަޑައިގެންނެވި ކަމަށްވެސް ނަޝީދު ވިދާޅުވިއެވެ.

އަދި ރާއްޖެއިން ޔޫރަޕްގެ ގައުމުތަކުން ވޯޓު ލީ ގޮޮތައް ވޯޓުލުމަށް ހިތްވަރު ލިބުނު ކަމަށްޓަކައި އުފާކުރައްވާ ކަމަށް ވެސް ނަޝީދު ވިދާޅުވިއެވެ.

ކުރީގެ ރައީސް ނަޝީދު ފާޅުކުރެއްވި ޚިޔާލުފުޅުތަކާމެދު ރަޝިއާގެ ސަފީރު ވަނީ ކަންބޮޑުވުން ފާޅުކުރައްވާފައެވެ.ރައީސް ނަޝީދުގެ ޕޯސްޓާ ގުޅިގެން ރަޝިއާ ސަފީރު ވިދާޅުވީ، 24 ފެބްރުއަރީ ގައި ނެގި ވޯޓުގައި ރާއްޖެއިން ވޯޓު ދިން ގޮތާ މެދު ފަޚުރުވެރިވާ ކަމަށް ނަޝީދު ވިދާޅުވެ ކުރެއްވި ޕޯސްޓު ފެނިވަޑައިގަތުމުން ވަރަށް ބޮޑަށް ހައިރާންވި ކަމަށެވެ. އަދި ނަޝީދު ފަދަ ތަޖުރިބާކާރު ސިޔާސީ ލީޑަރަކަށް ޔުކްރެއިން މައްސަލަ އަށް ސުލްހަވެރި ހައްލެއް ހޯދުމަށް މަސައްކަތް ކުރެވެމުންދާ ގޮތައް އައި ބަދަލު ފެނިވަޑައިނުގަތުމުން ސުވާލު އުފެދޭ ކަމުގައި ވިދާޅުވިއެވެ. އެމެރިކާއިން މި މައްސަލައިގައި މިހާރު ގެންގުޅެނީ މާ ބުއްދިވެރި އަދި ހަގީގަތާ އެއްގޮތް ސިޔާސަތެއް ކަމަށް ސަފީރު ވިދާޅުވިއެވެ. އެހެން ނަމަވެސް ނަޝީދު އިޚްތިޔާރު ކުރެއްވީ، ޔޫރަޕުން ގެންގުޅެމުންދާ ހަރުކަށި އަދި އަސްކަރީ ވިސްނުން ކަމަށް ވެސް ސަފީރު ވިދާޅުވިއެވެ.

"އަޅުގަނޑު ބޭނުން ނަޝީދަށް ހަނދާން ކޮށްދޭން، ރާއްޖޭގެ ރީތި ރަށްތަކުގައި ވަގުތު ހޭދަކުރުމުގެ ތެރެއިން ރާއްޖޭގެ ބަޖެޓަށް ހިއްސާ ވަނީ ރަޝިއާ ފަތުުވެރިންކަން، (ޔުކްރެއިން މީހުންނެއްނޫން) ރާއްޖެއަށް ދޭ މި އެހީތެރިކަމަށް ނަޝީދު ޝުކުރުވެރިވުމަށް ވަރަށް އިހްތިރާމް އާ އެކު އެދެން؛" ސަފީރު ވިދާޅުވިއެވެ.

ސަފީރުގެ ހިތްހަމަނުޖެހުމާ ގުޅިގެން ރައީސް ނަޝީދު ވިދާޅުވެފައިވަނީ ދިވެހިރާއްޖެއިން ނަގާފައިވާ މި ސްޓޭންޑަކީ ރަޝިއާއާ ދެކޮޅަށް ނަގާފައިވާ ސްޓޭންޑެއް ނޫން ކަމަށެވެ. ރަޝިއާ އިން ބޭނުންވާ ފަދައިން ރާއްޖެއިން ވެސް ސުލްހަ ބޭނުންވާ ކަމަށް ނަޝީދު ވިދާޅުވިއެވެ. ދިވެހިރާއްޖެއަކީ ކުޑަ ޤައުމަކަށްވާތީ ބަދަލުވަމުންދާ ޖިއޯ ޕޮލިޓިކްސްގައި ރާއްޖެއިން ތާށިވާން ބޭނުން ނުވާ ކަމަށް ނަޝީދު ވިދާޅުވިއެވެ. އަދި ރާއްޖެ އިން މި މައްސަލައިގައި ނެގި ފޮސިޝަން އަކީ ކުޑަ ޖަޒީރާ ގައުމެއްގެ ހައިސިއްޔަތުން އަބަދުވެސް ނަގާ ސްޓޭންޑް ކަމަށް ވެސް ވިދާޅުވިއެވެ. އަދި ރާއްޖެއަށް ފާހަގަ ކުރެވޭ މިންވަރަކަށް ރަޝިއާ ގެ ފަތުރުވެރިން އަންނަ ކަމަށާއި، ރާއްޖޭގެ އިގްތިސާދަށް ރަޝިއާ އިން ދޭ ހިއްސާ ގެ އަގު ވަޒަން ކުރައްވާ ކަމަށްވެސް ނަޝީދު އެކްސް ގައި، ސަފީރަށް ރައްދު ދެއްވަމުން ވިދާޅުވިއެވެ. އަދި ރަމަޟާން މަހުގެ މުބާރިކްބާދީ ސަފީރަށާއި ރައީސް ޕުޓިން އަށް ފޮނުއްވާ ކަމަށް ވެސް ނަޝީދު ވިދާޅުވިއެވެ.

މި އަހަރުގެ ޖެނުއަރީ މަހުގެ މެދުތެރޭގައި ރައީސް މުއިއްޒު އެސްޓޯނިއާ އަށް ކުރެއްވި ދަތުރުފުޅުގައި އެ ގައުމުގެ ގާނޫނު ހަދާ މަޖިލީހުގެ ރައީސް އާ ބައްދަލު ކުރައްވާ، ރާއްޖެއިން ރަޝިއާ-ޔުކްރެއިން ހަނގުރާމައިގައި ޔުކްރެއިން އަށް ތާއީދު ކުރައްވާނެ ކަމަށް ވަނީ ވިދާޅުވެފައެވެ. އަދި އެކަމާ ޔުކްރެއިންގެ ގާނޫނު ހަދާ މަޖިލީހުގެ ރައީސް ވަނީ ރައީސް މުއިއްޒު އަށް ޝުކުރު އަދާ ކުރައްވާފައެވެ.