މިނިސްޓަރު އިހުސާން ދިފާއަށް ދެއްކީ އެމްޑީޕީގެ ޕްރައިމަރީގެ ލިސްޓެއް ފެންނަ ފޮޓޯއެއް - މީކާއިލް

ހޯމްލޭންޑް ސެކިއުރިޓީ މިނިސްޓަރު އަލީ އިހުސާނަށް ކުރެވޭ ތުހުމަތުތަކުން ދިފާއުވާން ރައްޔިތުންގެ މަޖިލީހުގައި ދެއްކި ފޮޓޯއަކީ އެމްޑީޕީގެ ޕްރައިމަރީއެއްގައި ބޭނުންކުރި ޕާޓީގެ މެންބަރުން ހިމެނޭ ލިސްޓެއް ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.

ޑީއެންއާރުގައި ޕީއެންސީއަށް ފޯމު ފުރިކަމަށާއި، އެ މަސައްކަތުގެ ތެރޭގައި ޖިނާއީ ކުށެއް ކުރިކަމަށް މިނިސްޓަރު އިހުސާން ވަނީ މަޖިލީހުގައި އިއުތިރާފުވެވަޑައިގެންފައެވެ. އަދި ޕީއެންސީން ފޯމު ފުރިކަމަށް އެއްބަސްވެ އެކަމުން ދިފާއުވުމަށްޓަކައި މިނިސްޓަރު އިހުސާނު ވަނީ ތަކުރާރުކޮށް މަޖިލީހުގެ ތަޅުމުގައި ނެތް ފަރާތްތަކަށް ޖަވާބުދާރީ ނުވެވޭނެކަނަށް އެނގިވަޑައިގެން ހުންނަވާ ތުހުމަތުތަކެއް ކުރައްވާފައެވެ. މީގެ ތެރޭގައި ކުރީގެ ރައީސް އިބްރާހިމް މުހައްމަދު ޞާލިހުގެ އަނބިކަނބަލުން ފަޒްނާ އަހުމަދު އިންނެވި ފޮޓޯއެއް ދައްކަވާ އެތަނުގައި އޮތް ލިސްޓަކީ ޑިއެންއާރުގެ ޑޭޓާ ބޭސްގައި ހުރި މައުލޫމާތުކަމަށް ދައްކަން މަސައްކަތް ކުރެއްވިއެވެ.

މިނިސްޓަރު އިހުސާނުގެ މި ވާހަކައާއި ގުޅިގެން މަޖިލިހުގައި ތަކުރާރުކޮށް ނިޒާމާ ބެހޭ މައްސަލައެއް ހުށަހެޅުމުގެ ފުރުސަތަށް އެދެމުން ދަނިކޮށް، މީކާއިލްގެ ނަން އިއްވާ ތަޅުމުން ވަނީ ނެރެލާފައެވެ.

އިހުސާނުގެ ތުހުމަތުތަކާއި ގުޅިގެން ކަމުގެ ހަގީގަތް ހާމަކުރައްވާ މީކާއިލް ފޭސްބުކުގައި ކުރެއްވި ޕޯސްޓެއްގައި ވިދާޅުވީ މިނިސްޓަރ އިހުސާން ޑީއެންއާރް ތެރޭ ހުންނަވައިގެން ދިވެހިރާއްޖޭގެ ތާރީހުގާވެސް ހިންގެވި އެންމެ ބޮޑު ޝަހުސު އޮޅުވާލުމުގެ ވައްކަން ފޮރުވަން، ކުރީގެ ފަސްޓް ލޭޑީ ފަޒްނާއަށް ޖަވާބުދާރީވެވެންވެސް ނެތް ތަނެއްގާ، އެކަމަނާގެ އިސްތަށިފުޅުގާ ދޮގު އިލްޒާމް އަޅުވާފައިވާ ކަމަށެވެ.

އަދި އެ ފޮޓޯއިން ފެންނަ ލިސްޓަކީ ޑީއެންއާރް ލިސްޓެއް ނޫން ކަމަށާއި، އެއީ އެމްޑީޕީން ދޮރުންދޮރަށް ހިނގައިގެން ބުރަ މަސައްކަތުން ހޯދި ޑޭޓާކަމަށް މީކާއިލް ވިދާޅުވިއެވެ. މީކާއިލް ވިދާޅުވީ އެ ފޮޓޯ އަކީ ރައީސް ސޯލިހުގެ ޕްރައިމަރީ ކެންޕޭނުތެރޭ ނެގި ފޮޓޯއެއް ކަމަށެވެ. އަދި ޕާޓީ ޕްރައިމަރީ ތަކުގާ ވޯޓުލަނީ ޕާޓީ މެންބަރުން އެކަނި ކަމަށާއި، އެ މެންބަރުންގެ މައުލޫމާތު އަބަދުވެސް ޕާޓީގައި ހުންނާނެ ކަމަށެވެ.

މީކާއިލް ވިދާޅުވީ އެއްވެސް ސިޔާސީ ކަމެއްގާ ކުރިން ނޫޅުއްވާ ބޭފުޅުންނަށް އާވެދާނެ ކަމަށެވެ. އެއާ ހިލާފަށް، އިހުސާން ހުންނެވީ ސަރުކާރުގެ ކަރަންޓާއި ސަރުކާރުގެ ވަސީލަތްތައް ބޭނުންކޮށްގެން ސަރުކާރު އޮފީހެއްތެރޭ، އެތައް ސަތޭކަ ބަޔަކަށް ނޭނގި، ސޮޔާއި ފިންގަރޕްރިންޓް ފޯޖުކޮށްގެން، އެމީހުންގެ ނަމުގަ ޕީއެންސީ ފޯމު ފުރުއްވަން ކަމަށެވެ. އަދި މަޖިލިސް ތަޅުމުން ނެރުނީވެސް، ހާޒިރުވެވެން ނެތް ބައެއްގެ ބޮލުގާ ދޮގު އިލްޒާމް އަޅުވަމުންދާކަމާ އިތުރުފުޅު ހައްދަވަމުންދާކަން ރިޔާސަތުގެ ސަމާލުކަމަށް ގެނައުމުން ކަމަށް މީކާއިލް ވިދާޅުވިއެވެ.

މި މައްސަލައާއި ގުޅިގެން ކުރީގެ ފަސްޓްލޭޑީ ފަޒްނާ އަހުމަދު ވިދާޅުވީ ސާފުކޮށް އެނގޭ ގޮތުގައި މިނިސްޓަރު އިހުސާން އެކަމަނާއަށް ހަމަލާދޭން ޚިޔާރުކުރީ ދިފާޢު ނުކުރެވޭ ތަނެއް ނުވަތަ އޭނާއާ ދެކޮޅަށް ފިޔަވަޅު ނާޅާ ތަނެެއްގައި ކަމަށެވެ.

މި މައްސަލައާއި ގުޅިގެން މިނިސްޓަރު އިހުސާނަށް އަންނަނީ އާންމުންގެ ފާޑުކިއުން އަމާޒުވަމުންނެވެ. އަދި މަޖިލީހުގައި ދިފާއުވުމަށް އެހެން މީހުންގެ ބޮލުގައި ދޮގު އިލްޒާމު އަޅުވާ ވާހަކަ ދައްކާފައިވާތީ އިސްތިއުފާއަށްވެސް ގިނަ ބަޔަކު އަންނަނީ ގޮވަމުންނެވެ.