ހޮޅުދޫ ރައްޔިތުން ބޭނުންވަނީ ރަށުގެ ޕޮލިސް ސްޓޭޝަން ހުސްކޮށް، އިމާރާތް ރައްޔިތުންނަށް ހަވާލު ކުރަން
ފުލުހުންގެ އިންޓެގްރިޓީ އާ މެދު ރައްޔިތުން ވަނީ ސުވާލު އުފައްދާފައި
ޒަކިއްޔާ މޫސާގެ މަރުގެ ތަހުގީގު އަވަސް ކުރުމަށް ގޮވާލާ ހޮޅުދޫގައި ބޭއްވި މުޒާހަރާގެ ތެރެއިން - 21 ފެބްރުއަރީ 2025
ނ. ހޮޅުދޫގައި ބޮޑެތި ޒަޚަމްތަކަކާއެކު، މަރުވެފައި އޮއްވާ ފެނުނު ޒަކިއްޔާ މޫސާގެ މަރުގެ މައްސަލަ އިތުރަށް ހޫނުވެ ރައްޔިތުން މިހާރު ބޭނުންވަނީ ރަށުގެ ޕޮލިސް ސްޓޭޝަން ހުސްކޮށް ރައްޔިތުންނާ ހަވާލު ކުރަން ކަމަށް އެރަށުން މި ނޫހާ ވާހަކަ ދެއްކި އެ ރަށު މީހަކު ބުނެފިއެވެ.
"ތަހުގީގަށް ފުލުހުން އެއްބާރުލުމެއް ނުދޭ، ޖަވާބުދާރީ އެއް ނުވޭ، އެމީހުން އިހުމާލުން، މަރުގެ ސީން ނައްތާލީ؛" ހޮޅުދޫ މީހަކު ބުންޏެވެ.
ރައްޔިތުން ސިފަ ކުރަނީ ހޮޅުދޫ ގައި ތިބި ފުލުހުންނަކީ "ބޭކާރު" ބައެއްގެ ގޮތުގައެވެ.
"ފުލުހުން ބޭނުން ކުރަމުންދާ އިމާރާތަކީ ރައްޔިތުންގެ އިމާރާތެއް، ވަރަށް ފަހަކާ ޖެހެންދެންވެސް އެތަން ދީފައި ހުރީ މުޅިން ހިލޭ. މިހާރު އެމީހުންގެ ބޭނުމެއް ނެތް، އެހެންވީމާ ރައްޔިތުން ބޭނުންވަނީ އިމާރާތް؛" އޭނާ ބުންޏެވެ.
އިމާރާތް އަނބުރާ ހޯދުމަށް ކައުންސިލަށް ރައްޔިތުންގެ ފަރާތުން މިހާރު އެދިފައިވާ ކަމަށް ވެސް މައުލޫމާތު ދިން ފަރާތުން ބުނެފައިވެއެވެ.
މައްސަލަ އިންތިހާ އަށް ލަސްވެ، ރައްޔިތުންގެ ކެތްތެރިކަން ކޮޅުންލާފައިވާ ކަމަށް އެރަށުން ވާހަކަ ދެއްކި އެހެން މީހަކު ބުންޏެވެ.
"ރައްޔިތުންގެ ތެރެއިން 90 އިންސައްތަ އަށް ވުރެ ގިނަ މީހުން ބޭނުންވަނީ އިންސާފު ލިބޭނެކަން ޔަގީންވަންދެން ހުއްޓާ ނުލައި، އިހުތިޖާޖު ކުރަން، އަދި ކައިރި ރަށްރަށު މީހުން ވެސް އިހުތިޖާޖު ގައި ބައިވެރިވާން ހޮޅުދޫ އަށް އަންނަން؛" އޭނާ ބުންޏެވެ.
ފުލުހުންގެ އިހުމާލު އޮތް ކަމަށް ހޮޅުދޫ ރައްޔިތުން ބުނަމުން ދަނިކޮށް، މަރުގެ މައްސަލަ ތަހުގީގުކުރުމުގައި ފުލުހުން ގަނޫނާއި ގަވާއިދާ ޚިލާފުވެފައި ވޭތޯ ބެލަމުން އަންނަ ކަމަށް ނޭޝަނަލް އިންޓަގްރިޓީ ކޮމިޝަން (އެންއައިސީ)އިން އާދިއްތަ ދުވަހު ވަނީ ބުނެފައެވެ.
މައްސަލައިގެ ތަހުގީގު ކުރިއަށް ދާ ގޮތާ މެދު ހިތްހަމަ ނުޖެހިފައި ތިބި ރަށުގެ ރައްޔިތުން ހޯމަ ދުވަހު ވެސް ވަނީ ރަށުގެ ކައުންސިލަށް ގޮސް ކައުންސިލުގެ ރައީސް އާ ބައްދަލު ކޮށްފައެވެ.
ރައްޔިތުން ބޭނުންވަނީ ކައުންސިލް ރައީސް އާ އެކު އަންގާރަ ދުވަހު ފުލުހުންނާ ބައްދަލު ކޮށް ރައްޔިތުންގެ ސުވާލުތަކަށް ޖަވާބު ހޯދުމަށެވެ.
އޭގެ އިތުރުން ފުލުހުންގެ އިންޓެގްރިޓީ އާ މެދު ރައްޔިތުންގެ ހިތުގައި ސުވާލު އުފެދިފައިވާތީ އިންޓެގްރިޓީ ކޮމިޝަން އަށް ޝަކުވާ ހުށަހަޅާށެވެ.
ރަށުން މައުލޫމާތު ދިން ފަރާތްތަކުން ބުނެފައިވަނީ މި ދެ ކަންތަކަށް ވެސް ކައުންސިލުގެ ރައީސް މިހާރު އެއްބަސްވެފައިވާ ކަމަށެވެ.
މިދިޔަ ހުކުރު ދުވަހު ރަށުގައި އޮތް ބޮޑު އިހްތިޖާޖަށް ފަހު ރައްޔިތުން ވަނީ އެ ރަށު ޕޮލިސް ސްޓޭޝަނަށް ވެދެފައެވެ.
އެއާއެކު ރަށަށް އިތުރު ފުލުހުން އަރާ ޕެޕަރ ސްޕްރޭ ޖަހާ، ބައެއް މީހުންނަށް ސިއްހީ ފަރުވާވެސް ދޭން ޖެހުނެވެ.
"އިތުރު ފުލުހުން ރަށަށް އެރީވެސް ރައްޔިތުންގެ ނުގަބޫލުގައި، ރައްޔިތުން ބޭނުމެއް ނޫން އިތުރަށް ރަށަށް ފުލުހުން އަރާކަށް؛"
އޭގެ ނަތީޖާ އަކަށް ވީ ބަޔަކަށް އަނިޔާވުން ކަމަށް ރަށުން ވާހަކަ ދެއްކި ފަރާތުން ބުންޏެވެ.
ހޮޅުދޫގައި ހުކުރު ދުވަހު މުޒާހަރާ ކުރި މީހުން ހޮޅުދޫ ދާއިރާގެ ރައްޔިތުންގެ މަޖިލީހުގެ މެންބަރާއި ހޯމް މިނިސްޓަރު ވެސް ފެއިލްވެއްޖެ ކަމަށް ބުނެފައެވެ. އަދި ހޯމް މިނިސްޓަރު އަލީ އިހުސާން އިސްތިއުފާ ދެއްވަން ޖެހޭ ކަމަށް ވެސް ވަނީ ބުނެފައެވެ.
ރައްޔިތުންގެ ތެރެއިން ގިނަ ބަޔަކު ދެކޭ ގޮތުގައި މި މައްސަލައިގައި ސަރުކާރުން އެއް ގޮތަކަށް ވެސް އަޅައެއް ނުލައެވެ. އިންސާފު ހޯދައިދޭން މަސައްކަތެއް ވެސް ނުކުރެއެވެ.
އެންއައިސީން މި މައްސަލަގައި ނެރުނު ބަޔާނުގައި ބުނެފައިވަނީ އެ މައްސަލައިގައި ރައްޔިތުން ފުލުހުންނަށް ސީރިއަސް ތުހުމަތުތަކެއް ކުރަމުންދާތީ، އެ ކޮމިޝަނުގެ ގާނޫނުގެ ދަށުން، ކޮމިޝަނުގެ އަމިއްލަ އިސްނެގުމުގެ މަތީން އެ މައްސަލަ ތަހުގީގު ކުރުމުގައި ފުލުހުން ގާނޫނާއި ގަވާއިދާ ޚިލާފުވެފައި ވޭތޯ ބެލުމަށް މިދިޔަ ބުރާސްފަތި ދުވަހު އެ ކޮމިޝަނުން ނިންމާފައި ވާ ކަމަށެވެ.
އުމުރުން 50 އަހަރުގެ ޒަކިއްޔާ މޫސާ ބޮޑެތި ޒަޚަމް ތަކަކާއެކު މަރުވެފައި އޮއްވާ ފެނުނީ 2024 ވަނަ އަހަރުގެ ސެޕްޓެމްބަރު މަހުގެ 10 ވަނަ ދުވަހުގެ ހެނދުނުގެ ވަގުތެއްގައެވެ.
ހިއުމަން ރައިޓްސް ކޮމިޝަން އިންވެސް ވަނީ ޒަކިއްޔާގެ މަރުގެ މައްސަލަ އެ ކޮމިޝަނުން ތަހުގީގު ކުރަމުން ދާކަމަށް ބުނެފައެވެ.
ޒަކިއްޔާ މަރުވާން ދިމާވި ސަބަބެއްގެ ގޮތުގައި ޑޮކްޓަރުން ފާހަގަކޮށްފައި ވަނީ ކަރަށް ލިބިފައިވާ ޒަޚަމްތަކެއްގެ ސަބަބުން ކަމުގައި މި ތަހުގީގާ ގުޅިގެން ޑިސެމްބަރު 3، 2024 ގައި ބޭއްވި ނޫސްވެރިންގެ ބައްދަލުވުމެއްގައި ފުލުހުން ބުނެފައިވެއެވެ.
ހޮޅުދޫ ކައުންސިލްގެ ރައީސް ރައްޔިތުންނާ ބައްދަލު ކޮށް ދެއްކެވި ވާހަކަގައި ޒަކިއްޔާ މަރުވީ އަމިއްލަ އަށްކަން އޭނާ އަށް ވެސް ގަބޫލު ނުކުރެވޭ ކަމަށް ވަނީ ވިދާޅުވެފައެވެ. އެހެން ނަމަވެސް މިހާތަނަށް އޭނާ މަރާލިކަމުގެ އެއްވެސް ހެއްކެއް ތަހުގީގަށް ފާހަގަކުރެވިފައި ނެތް ކަމަށް ފުލުހުން ވަނީ ބުނެފައެވެ.
ޒަކިއްޔާގެ މަރަށް އިންސާފު ހޯދުމަށް ގޮވާލައި އެތައް ފަހަރަކު ހޮޅުދޫ ރައްޔިތުން ވަނީ އިހުތިޖާޖު ކޮށްފައެވެ.
