ލިއޯން ބަލިކޮށް ޕީއެސްޖީ ލީޑުގައި ކުރިއަށް

ފްރާންސް ލީގުގައި ލިއޯންއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އިން އެއް ވަނައިގައި ލީޑު ފުޅާކޮށްފި އެވެ.

ލިއޯންގެ އަމިއްލަ ދަނޑުގައި އާދީއްތަ ދުވަހުގެ ރޭ ލިއޯންއާ ދެކޮޅަށް ކުޅުނު މެޗު ޕީއެސްޖީ އިން ކާމިޔާބު ކުރީ 3-2 އިންނެވެ. މެޗުގައި ދެ ޓީމު ވެސް ލަނޑުތައް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ދެ ވަނަ ހާފު ފަށައިގެން އަށް ވަނަ މިނެޓުގައި ޕީއެސްޖީ އަށް ލީޑު ނަގައިދިނީ އެ ޓީމުގެ ޑިފެންޑަރު އަޝްރަފް ޙަކީމީ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ބްރާޑްލޭ ބާކޮލާ އެވެ.

އޭގެ ހަ މިނެޓު ފަހުން ފްރާންސްގެ އޮސްމާން ޑެމްބެލޭ ވަނީ ޕީއެސްޖީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެ ލަނޑު ޑެމްބެލޭ ޖެހީ ކްވިޗާ ކްވަރަޝްކޭލިއާ ތަނަވަސްކޮށްދިން ފުރުސަތެއްގަ އެވެ.

މެޗުގެ 83 ވަނަ މިނެޓުގައި ލިއޯންގެ ފުރަތަމަ ލަނޑު ޖެހީ ރަޔަން ޗާކީ އެވެ. އޭގެ ދެ މިނެޓު ފަހުން ޙަކީމީ ވަނީ ޕީއެސްޖީގެ ތިން ވަނަ ލަނޑު ޖަހައި ލީޑު ފުޅާ ކޮށްފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލިއޯންގެ ދެ ވަނަ ލަނޑު ޖެހީ ކޮރެންޓިން ޓޮލިސޯ އެވެ.

މެޗުން މޮޅުވެ ޕީއެސްޖީން ވަނީ އެއް ވަނައިގައި 13 ޕޮއިންޓުގެ ލީޑެއް ނަގައިފަ އެވެ. މިހާތަނަށް ލީގުގައި ކުޅެފައިވާ 23 މެޗުން ޕީއެސްޖީ އަށް ލިބެނީ 59 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި މާސޭ އަށް ލިބެނީ 46 ޕޮއިންޓެވެ.