މަރެސްކާ ބޭނުން ވަނީ ޗެލްސީ އޮންނަން ޖެހޭ ހިސާބަށް ގެންދަން

ބޭނުން ވަނީ ޗެލްސީ އޮންނަން ޖެހޭ ހިސާބަށް އެ ކުލަބު ގެންދަން ކަމަށް، އެ ޓީމަށް އިރުޝާދު ދެމުން އަންނަ އެންޒޯ މަރެސްކާ ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ރޭ އެސްޓަން ވިލާގެ ދަނޑުގައި އެ ޓީމާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

މި ސީޒަނާ ދިމާކޮށް ޗެލްސީގެ ކޯޗުކަމާ ހަވާލުވި މަރެސްކާގެ އިރުޝާދުގެ ދަށުން ޗެލްސީން ރަނގަޅު ނަތީޖާތަކެއް ނެރެމުން އައި ނަަމަވެސް، މި ފަހުން ނަތީޖާތައް ދަށްވެފައި ވާތީ އޭނާ އަށް އަންނަނީ ފާޑު ކިޔުންތައް އަމާޒުވަމުންނެވެ.

މަރެސްކާ ބުނީ މި ސީޒަންގައި އޭނާ ޙާސިލު ކުރަން ބޭނުންވާ އަމާޒު ވަރަށް ސާފު ކަމަށެވެ. އެގޮތުން އޭނާ ބޭނުން ވަނީ ލީގުގެ ގަދަ ހަތަރެއްގައި ޗެލްސީ އޮންނަން ކަމަށާއި، ޗެލްސީގައި އޭނާ ހުރީ "ކިރިޔާ" ސަލާމަތްވާން ނޫން ކަމަށް މަރެސްކާ ވަނީ ބުނެފަ އެވެ.

ޗެލްސީގައި މަސައްކަތް ކުރަމުން އަންނައިރު، އެންމެ ބޮޑަށް ބޭނުން ވަނީ ތަށިތަކެއް ކާމިޔާބު ކުރުން ކަމަށާއި، ކުލަބު އެ ފެންވަރަށް ގެންދަން ބޭނުންވާ ކަމަށް ވެސް މަރެސްކާ ބުންޏެވެ. މެޗުތަކުން ޗެލްސީ މޮޅުވުމުން ކެތްތެރިވާން ޖެހޭ ކަމަށާއި، މެޗުތަކުން ބަލިވުމުން ފެންނަނީ ހިތްވަރު ނެތް މަންޒަރު ކަމަށް އޭނާ ބުންޏެވެ. އަދި ބޭނުން ވަނީ ޗެލްސީ އޮންނަން ޖެހޭ ހިސާބަށް އެ ކުލަބު ގެންދަން ކަމަށް ވެސް މަރެސްކާ ވަނީ ބުނެފަ އެވެ.

މީގެ އިތުރުން މަރެސްކާ ބުނީ ޗެލްސީގެ ކުޅުންތެރިންނާއި، އެ ޓީމުގެ ކޯޗިން އޮފިޝަލުން ކުރަމުން އަންނަ މަސައްކަތުން، އެ ޓީމުގެ ޓާގެޓަށް ވާސިލުވެވޭނެ ކަމަށެވެ. ޚާއްސަކޮށް ޗެލްސީގެ ސަޕޯޓަރުން ޓީމުގެ ފަހަތުގައިި ޓީމާ އެކު ތިބުމަކީ، އުފާވެރި އިޙުސާސެއް ކަމަށް އޭނާ ބުންޏެވެ.

މަރެސްކާ ބުނީ އަމިއްލަ ދަނޑުގައި އެންމެ ފަހުން ޗެލްސީ ކުޅުނު ދެ މެޗުން ވެސް އެ ޓީމު މޮޅުވެފައިވާ ކަމަށާއި، އެކަމުގައި ސަޕޯޓަރުންގެ ދައުރު ވެސް ބޮޑު ކަމަށެވެ. ޚާއްސަކޮށް ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުގައި އެކަން ފެނުނު ކަމަށާއި، އެއީ ޓީމަށް ލިބޭ ހިތްވަރެއް ކަމަށް އޭނާ ބުންޏެވެ.

އެސްޓަން ވިލާގެ ދަނޑުގައި އެ ޓީމާ ދެކޮޅަށް ނިކުންނައިރު ޗެލްސީ އޮތީ ލީގު ތާވަލްގެ ހަ ވަަނައިގަ އެވެ. އެއީ މިހާތަނަށް އެ ޓީމު ކުޅެފައިވާ 25 މެޗުން 43 ޕޮއިންޓާ އެކު އެވެ. އެ މެޗުން މޮޅުވެ ލީގު ތާވަލްގެ ކުރިއަށް ޖެހިލުމުގެ ފުރުސަތު ޗެލްސީ އަށް އޮންނާނެ އެވެ.

އެސްޓަން ވިލާއާ ދެކޮޅަށް ޗެލްސީ ނިކުންނާނީ ހޮނިހިރު ދުވަހުގެ ރޭ ރާއްޖެ ގަޑިން 22:30 ގައެވެ.