ލަންކާ މީހަކު ފޮރިން މިނިސްޓަރު ހަލީލަށް އިންޒާރުދޭ މައްސަލައެއް ތަހުގީގު ކުރަން ފަށައިފި

ލަންކާ މީހަކު ސޯޝަލް މީޑިއާ މެދުވެރިކޮށް ފޮރިން މިނިސްޓަރު ޑރ.އަބްދުﷲ ހަލީލަށް އިންޒާރުދޭ މައްސަލައެއް ތަހުގީގު ކުރަން ފަށައިފިއެވެ.

މިނިސްޓަރު ހަލީލަށް އިންޒާރު ދީފައިވަނީ ނަދީޝް ޕެރެރާ ނަމަކަށް ކިޔާ އެކްސް އެކައުންޓެއްގައެވެ.

މިމައްސަަލައާ ގުޅިގެން ހުކުރު ދުވަހު ފުލުހުން ބުނީ މިމައްސަލަ ސަމާލު ކަމަށް އައިސްފައިވާ ކަމަށާއި، ގުޅުންހުރި އިދާރާތަކާއިއެކު ބަލަންޖެހޭ ކަންކަން ބަލަމުންދާ ކަމަށެވެ. އަދި މީހަކު ހައްޔަރުކޮށްފައިނުވާ ކަމަށް ފުލުހުން ބުނެއެވެ.

ނަމަވެސް މައްސަލައާ ގުޅިގެން ސުވާލު ކުރަންޖެހޭ ފަރާތްތަކާއި ސުވާލު ކުރަމުންދާ ކަމަށް ފުލުހުން ބުނެއެވެ.

މިނިސްޓަރު ހަލީލަށް ލަންކާ މީހަކު އިންޒާރު ދެމުންދާއިރު، މިނިސްޓަރު ހުންނެވީ ރަސްމީ ދަތުރުފުޅެއްގައި އެގައުމުގެ ވެރިރަށް ކޮލަންބޯގައެވެ.

މީގެ އިތުރުން މޯލްޑިވްސް އިމިގްރޭޝަން ކޮންޓްރޯލަރ މަގާމުގައި ހުންނެވި މުހައްމަދު ޝަމްއާން ވަހީދަށް އަށް ބޮޑެތި ތުހުމަތުތަކެއް ކޮށްފައިވެއެވެ. އަދި ޝަމްއާންއަކީ ކޮރަޕްޝަން ބޮޑު ބޭފުޅެއްގެ ގޮތުގައި ތުހުމަތުކޮށްފައިވެއެވެ.

މައުލޫމާތު ލިބިފައިވާ ގޮތުގައި އެލަންކާ މީހާއަކީ ރާއްޖެއަށް ނާދެވޭ ގޮތަށް ޑީޕޯޓުކޮށްލާފައިވާ މީހެކެވެ. ނަމަވެސް އޭނާއަކީ ކުރިން ރާއްޖޭ މީހަކާއި ކައިވެނިކޮށްގެން ރާއްޖޭގެ ދިރިއުޅު މީހެއް ކަމަށާއި، އޭނާގެ ދަރިފުޅު ހުރީ ރާއްޖޭގައި ކަމަށް ބުނެފައިވެއެވެ. ދަރިފުޅު ދެކެން ބޭނުންވާތީ، ރާއްޖެއަށް ދެވޭ ގޮތަށް އެ ހުއްދަ ދިނުމަށް ވެސް އެދިފައިވެއެވެ.