އަމިއްލަ ދަނޑުގައި ބޮޑު މޮޅެއް ހޯދައިގެން ޕީއެސްޖީ ގަދަ 16 އަށް

ޔުއެފާ ޗެމްޕިއަންސް ލީގުގެ ޕްލޭ އޮފްގެ ދެ ވަނަ ލެގުގައި ބެރެސްޓު ކޮޅަށް ހަތް ލަނޑު ޖަހައިގެން ބޮޑު މޮޅެއް ހޯދައި، ޕެރިސް ސެއިންޓް ޖާމަން (ޕީއެސްޖީ) އިން މުބާރާތުގެ ގަދަ 16 ވަނަ ބުރުން ޖާގަ ހޯދައިފި އެވެ.

ބްރެސްޓުގެ އަމިއްލަ ދަނޑުގައި މި ދެ ޓީމު ބައްދަލު ކުރި ފުރަތަމަ ލެގު ޕީއެސްޖީން ވަނީ 3-0 އިން ކާމިޔާބު ކޮށްފަ އެވެ. އެހެންކަމުން އަމިއްލަ ދަނޑުގައި ދެ ވަނަ ލެގަށް ނިކުތްއިރު ވެސް، ޕީއެސްޖީ އަށް މުބާރާތުގެ ގަދަ 16 ވަނަ ބުރުގެ އުންމީދު ބޮޑެވެ.

ޕީއެސްޖީގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 7-0 އިންނެވެ. މެޗުގެ ފުރަތަމަ ހާފުގައި ޕީއެސްޖީން ދެ ލަނޑު ޖެހިއިރު، ދެ ވަނަ ހާފުގައި ވަނީ ފަސް ލަނޑު ޖަހައިފަ އެވެ.

މެޗުގެ 20 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ ބްރާޑްލޭ ބާކޮލާ އެވެ. އެއީ ފަބިއަން ރުއީޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެެކެވެ. އޭގެ ފަހުން މެޗުގެ ފުރަތަމަ ހާފު ނިމުމުގެ ކުރިން ބާކޮލާ ތަނަވަސްކޮށްދިން ފުރުސަތެއްގައި ޕީއެސްޖީގެ ދެ ވަނަ ލަނޑު ޖެހީ ކްވިޗާ ކްވަރަޝްކޭލިއާ އެވެ.

މެޗުގެ ދެ ވަނަ ހާފު ފަަށައިގެން ސާދަ ވަނަ މިނެޓުގައި ޕީއެސްޖީގެ ތިން ވަނަ ލަނޑު ޖެހީ ވިޓީނިއާ އެވެ. އޭގެ ފަސް މިނެޓު ފަހުން ޑިސެއާ ޑޯ ވަނީ ޕީއެސްޖީގެ ހަތަރު ވަނަ ލަނޑު ޖަހައިފަ އެވެ.

މެޗުގައި ޕީއެސްޖީގެ ފަސް ވަނަ ލަނޑު ނޫނޯ މެންޑޭސް 69 ވަނަ މިނެޓުގައި ޖެހިއިރު، އޭގެ ހަތް މިނެޓު ފަހުން ގޮންޒާލޯ ރާމޯސް ވަނީ އެ ޓީމުގެ ހަ ވަނަ ލަނޑު ޖަހައިފަ އެވެ. އަދި މެޗުގައި ޕީއެސްޖީގެ ހަތް ވަނަ ލަނޑު ސެނީ މަޔޫލޫ ޖެހީ މެޗުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށެވެ.

ބްރެސްޓު ކަޓުވާލައި ޕީއެސްޖީން މުބާރާތުގެ ގަދަ 16 ވަނަ ބުރުގެ ޖާގަ ހޯދީ، ދެ ލެގުގެ އެގްރިގޭޓް ނަތީޖާ 10-0 އިންނެވެ.