ދެ ވަނަ ލެގުގެ ކުރިން ގާޑިއޯލާ: ބޭނުން ވަނީ އެންމެ ފުރިހަމަ މެޗެއް

ޔުއެފާ ޗެމްޕިއަންސް ލީގުގެ ޕްލޭ އޮފްގެ ދެ ވަނަ ލެގުގައި އެންމެ ފަހުގެ ޗެމްޕިއަން ރެއާލް މެޑްރިޑާ ދެކޮޅަށް ނިކުންނައިރު، މެންޗެސްޓަރ ސިޓީ އަށް ބޭނުން ވަނީ އެންމެ ފުރިހަމަ ކުޅުން ދައްކާނެ މެޗެއް ކަމަށް އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

ޕްލޭ އޮފްގެ ފުރަތަމަ މެޗުގައި ސިޓީގެ އިއްތިހާދު ސްޓޭޑިއަމްގައި މި ދެ ޓީމު ބައްދަލު ކުރި މެޗު ކާމިޔާބު ކުރީ ރެއާލް އިންނެވެ. އެއީ މެޗުގެ އެންމެ ފަގު ވަގުތުގައި ލަނޑު ޖަަހައިގެން، 3-2 އިންނެވެ. އެހެންކަމުން ސިޓީ އަށް މުބާރާތުގެ ގަދަ 16 ވަނަ ބުރުން ޖާގަ ލިބެން އޮތީ ރެއާލް ބަލިކޮށްގެންނެވެ.

ރެއާލްގެ އަމިއްލަ ދަނޑުގައި ކުޅޭ ދެ ވަނަ ލެގުގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ގާޑިއޯލާ ބުނީ، ސިޓީ ކުޅެން ޖެހޭނީ ވަރަށް ހިތްވަރާ އެކު ކަމަށާއި، ކޮންމެ ކުޅުންތެރިޔަކު ވެސް އަމިއްލަ ނަފުސަށް އިތުބާރު ކުރަން ޖެހޭ ކަމަށެވެ.

ގާޑިއޯލާ ބުނީ ރެއާލްގެ ދަނޑުގައި ސިޓީން ރަނގަޅު ކުޅުމެއް ދައްކައިފި ނަމަ، އެ ޓީމަށް ބޭނުންވާ ނަތީޖާ ނެރެވޭނެ ކަމަށެވެ. އަދި ޕްލޭ އޮފްގެ ފުރަތަމަ ލެގުގެ ނަތީޖާ އޮތް ގޮތުން، ސިޓީ އަށް އިތުރު އެހެން ގޮތްތަކެއް ނުވަތަ އޮޕްޝަންތަކެއް ވެސް ނެތް ކަމަށް ގާޑިއޯލާ ބުންޏެވެ.

މީގެ އިތުރުން ގާޑިއޯލާ ބުނީ ސިޓީގެ ޖެކް ގްރީލީޝް، ނަތަން އަކޭ އަދި ރުބެން ޑިއާސް ވެސް ޓީމާ އެކު ދަތުރު ކޮށްފައިވާ ކަމަށެވެ. ދެ ވަނަ ލެގުގައި އެ ކުޅުންތެރިން ލައްވާ ކުޅުމާ މެދު ގޮތެއް ނިންމާނީ ގިނަ ކަންތައްތަކަށް ބެލުމަށްފަހު، ފަހު ވަގުތުގައި ކަމަށް ވެސް އޭނާ ބުންޏެވެ. ގާޑިއޯޅާ ފާހަގަ ކުރި ގޮތުގައި ސިޓީގެ ސްކޮޑުގައި ހިމެނިގެން އެ ކުޅުންތެރިން ދެ ވަނަ ލެގަށް އައުމަކީ ވެސް އުފާވެރި ޚަބަރެކެވެ.

އިތުރަށް ވާހަކަ ދައްކަމުން ގާޑިއޯލާ ބުނީ ދެ ވަނަ ލެގުގައި ސިޓީން ދައްކަން ޖެހޭނީ އާދަޔާ ޚިލާފު ހިތްވަރެއް އަދި ކުޅުމެއް ކަމަށެވެ. އެ މެޗުގައި ގޯސްތަކެއް ވުމަށް ފުރުސަތު ދެވެން ނެތް ކަމަށާއި، ބޭނުން ވަނީ އެންމެ ފުރިހަމަ ކުޅުމެއް ދައްކައި، ނަތީޖާ ނެރެން ކަމަށް ވެސް އޭނާ ބުންޏެވެ.

ރެއާލްގެ އަމިއްލަ ދަނޑުގައި މި ދެ ޓީމު ބައްދަލު ކުރާ މެޗު ފަށާނީ ބުދަ ދުވަހުގެ ރޭ ދަންވަރު ރާއްޖެ ގަޑިން އެކެއް ޖަހާއިރު އެވެ.