ސުބާސީ، ބާސެލޯނާގެ އެއްބަސްވުން އައު ކޮށްފި

ބާސެލޯނާ އަށް ކުޅެމުން އަންނަ ސްޕެއިންގެ ޒުވާން ކުޅުންތެރިޔާ ޕައު ސުބާސީ، އެ ކުލަބާ އެކު ސޮއި ކޮށްފައިވާ އެއްބަސްވުން އައު ކޮށްފި އެވެ.

އުމުރުން 18 އަހަރުގެ ކުޅުންތެރިޔާ އޭނާގެ ސީނިއާ ކެރިއަރު ފެށީ ވެސް ބާސެލޯނާ އިންނެވެ. ބާސެލޯނާގެ ޒުވާން އުމުރުފުރައިގެ ޓީމުގައި ވެސް އޭނާ މޮޅު ކުޅުމެއް ދެއްކިއިރު، ބާސެލޯނާގެ ސީނިއާ ޓީމުން އޭނާ އަށް ފުރުސަތު ދިނީ ކުރީގެ ކޯޗު ޒަވީ ހެނާންޑޭޒް އެވެ.

މިއީ ބާސެލޯނާގެ އެއްބަސްވުން ސުބާސީ އައު ކުރި ދެ ވަނަ ފަހަރެވެ. 2024 ވަނަ އަހަރުގެ މެއި މަހުގެ ތެރޭގައި ވެސް އޭނާ ވަނީ ބާސެލޯނާގެ އެއްބަސްވުން އައު ކޮށްފަ އެވެ. އެ ފަހަރު ބާސެލޯނާ އާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާން އޮތީ 2027 ވަނަ އަހަރުގެ ޖޫން މަހުގެ ނިޔަލަށެވެ.

ނަމަވެސް އެ އެއްބަސްވުމުގެ މުއްދަތު ހަމަވާން ބާކީ ދެ އަހަރު އޮއްވާ، ސުބާސީ މި ވަނީ ދެ ވަނަ ފަހަރަށް ބާސެލޯނާގެ އެއްބަސްވުން އައު ކޮށްފަ އެވެ. ބާސެލޯނާ އާއެކު ސުބާސީ ސޮއި ކުރި އައު އެއްބަސްވުމުގެ މުއްދަތު ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ. އޭނާގެ އެއްބަސްވުން އައުކޮށް، ބާސެލޯނާ އިން ވަނީ އެކަން ރަސްމީކޮށް އިއުލާން ވެސް ކޮށްފަ އެވެ.

ބާސެލޯނާގައި ސުބާސީ މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް އެ ކުލަބަށް 60 މެޗު ކުޅެދީފަ އެވެ. މިހާރު ކުރިއަށްދާ ސީޒަންގައި އޭނާ ވަނީ 36 މެޗުގައި ބާސެލޯނާ އަށް ކުޅެފަ އެވެ.