ސައުދީ ޕްރޯ ލީގުގައި އަލް ރިޔާދާ ދެކޮޅަށް ކުޅުނު މެޗުން އެއްވަރުވެ، އެންމެ ފަހުގެ ޗެމްޕިއަން އަލް ޙިލާލް އިން ފުރުސަތު ނަގާލައިފި އެވެ.

ހުކުރު ދުވަހުގެ ރޭ އަލް ރިޔާދާއި އަލް ޙިލާލް ބައްދަލު ކުރި މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ އަލް ރިޔާދުންނެވެ. ނަމަވެސް ދެ ވަނަ ހާފުގައި ލަނޑު ޖަހައިގެން، އަލް ޙިލާލް ވަނީ މެޗުގެ ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އަލް ރިޔާދަށް ކުރި ހޯދައިދިނީ މުޙައްމަދު ކޮނާޓޭ އެވެ. އޭގެ ފަހުން މެޗުގެ ނަތީޖާ ހަމަހަމަ ކުރުމަށް އަލް ޙިލާލުން ކުރަމުން އައި މަސައްކަތް ކާމިޔާބުވީ މެޗުގެ ދެ ވަނަ ހާފުގަ އެވެ. މެޗުގެ 60 ވަނަ މިނެޓުގައި އަލް ޙިލާލަށް ނަތީޖާ ހަމަހަމަ ކޮށްދިނީ ސަލީމް އަލް ދައުސަރީ އެވެ. އޭގެ ފަހުން އަލް ޙިލާލަށް ލީޑު ނަގާނެ ފުރުސަތު ވެސް ލިބުނެވެ.

މެޗުން މޮޅުވެ ލީގު ތާވަލްގެ އެއް ވަނަ އަށް ޖެހިލުމުގެ ފުރުސަތު އަލް ޙިލާލަށް އޮތެވެ. މެޗު އެއްވަރުވެ އަލް ޙިލާލް ދެ ވަނައިގައި އޮތީ މިހާތަނަށް އެ ޓީމު ކުޅެފައިވާ 20 މެޗުން 48 ޕޮއިންޓާ އެކު އެވެ. އަލް ޙިލާލަށް ވުރެ އެއް މެޗު މަދުން ކުޅެގެން އެއް ވަނައިގައި އަލް އިއްތިހާދަށް ލިބެނީ 49 ޕޮއިންޓެވެ.