ރެއާލުން ފަހު ވަގުތު ސިޓީ ބަލިކޮށްފި

ޔުއެފާ ޗެމްޕިއަންސް ލީގުގެ ޕްލޭ އޮފްގެ ފުރަތަމަ ލެގުގައި މެންޗެސްޓަރ ސިޓީއާ ދެކޮޅަށް ކުޅުނު މެޗުން، ފަހު ވަގުތު އެންމެ ފަހުގެ ޗެމްޕިއަން ރެއާލް މެޑްރިޑު މޮޅުވެއްޖެ އެވެ.

ސިޓީގެ އިއްތިހާދު ސްޓޭޑިއަމްގައި އަންގާރަ ދުވަހުގެ ރޭ އެ ޓީމާ ދެކޮޅަށް ކުޅުނު މެޗު ރެއާލުން ކާމިޔާބު ކުރީ 3-2 އިންނެވެ. މެޗުގައި ސިޓީން ވަނީ ދެ ފަހަރެއްގެ މަތިން ލީޑު ވެސް ނަގައިފަ އެވެ. ނަމަވެސް ރެއާލުން ދެ ފަހަރު ވެސް ނަތީޖާ ހަމަހަމަ ކުރިއިރު، މެޗުން ރެއާލް މޮޅުވީ މެޗުގެ އެންމެ ފަހު ވަގުތުގައި ލަނޑު ޖަހައިގެންނެވެ.

މެޗުގެ ފުރަތަމަ ހާފުގެ 19 ވަނަ މިނެޓުގައި ސިޓީ އަށް ކުރި ހޯދައިދިނީ ނޯވޭގެ ފޯވާޑު އާލިން ހާލަންޑު އެވެ. އޭނާ އެ ލަނޑު ޖެހީ ޖޮސްކޯ ގްވާޑިއޯލް ތަނަވަސްކޮށްދިން ފުރުސަތެއްގަ އެވެ. ނަމަވެސް މެޗުގެ ދެ ވަނަ ހާފު ފަށައިގެން ފަނަރަ ވަނަ މިނެޓުގައި ރެއާލުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެއީ ޑެނީ ސެލަބޯސް ތަނަވަސްކޮށްދިން ފުރުސަތެއްގައި ފްރާންސްގެ ކެޕްޓަން ކީލިއަން އެމްބާޕޭ ޖެހި ލަނޑުންނެވެ.

އޭގެ ފަހުން މެޗުގެ 80 ވަނަ މިނެޓުގައި، ދެ ވަނަ ފަހަރަަށް ސިޓީ އަށް ކުރި ހޯދައިދިނީ ވެސް ހާލަންޑު އެވެ. އެއީ ސިޓީ އަށް ލިބުނު ޕެނަލްޓީއެއް ކާމިޔާބު ކޮށްގެން ހާލަންޑު ޖެހި ލަނޑެކެވެ. އޭގެ ހަ މިނެޓު ފަހުން ބްރަހިމް ޑިއާޒް ވަނީ ލަނޑު ޖަހައި، ދެ ވަނަ ފަހަރަށް ރެއާލަށް ނަތީޖާ ހަމަހަމަ ކޮށްދީފަ އެވެ. އެ ލަނޑު އޭނާ ޖެހީ ވިނީޝިއުސް ޖޫނިއާ ތަނަވަސްކޮށްދިން ފުރުސަތެއްގަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ރެއާލް މޮޅުވީ، އިންގްލެންޑުގެ ޖޫޑް ބެލިންހަމް ޖެހި ލަނޑުންނެވެ. އެ ލަނޑު ޖަހަން ބެލިންހަމް އަށް ވެސް ފުރުސަތު ތަނަވަސްކޮށްދިނީ ވިނީޝިއުސް އެވެ.

ޕްލޭ އޮފްގައި ސިޓީ އާއި ރެއާލްގެ ދެ ވަނަ ލެގު އޮންނާނީ ރެއާލްގެ އަމިއްލަ ދަނޑުގަ އެވެ. ދެ ވަނަ ލެގުގެ ކުޅުން އޮންނާނީ ފެބްރުވަރީ މަހުގެ 20 ވަނަ ދުވަހު އެވެ. އެ މެޗު އެއްވަރުކޮށްލައިގެން ވެސް، ރެއާލަށް މުބާރާތުގެ ގަދަ 16 ވަނަ ބުރުން ޖާގަ ހޯދުމުގެ ފުރުސަތު އޮންނާނެ އެވެ. ގަދަ 16 އިން ޖާގަ ހޯދުމަށް، ސިޓީ އަށް ޖެހޭނީ އެ މެޗުގައި ރެއާލް ބަލި ކުރާށެވެ.