ދިވެހި ދައުލަތުގެ ތެރޭގައި ކަރަޕްޝަން އަށަގަނެފައިވާ މިންވަރު އިތުރުވެއްޖެ: ޓްރާންސްޕޭރަންސީ
ރާއްޖެ ހިމެނެނީ، 50 އަށްވުރެ ދަށުން ޕޮއިންޓް ލިބިފައިވާ ތިންބައިކުޅަ ދެބައި ޤައުމުތަކުގެ ތެރޭގައި
ޓްރާންސް ޕޭރަންސީ މޯލްޑިވްސް ގެ ނިޝާން
ދިވެހި ދައުލަތުގެ ގެ ތެރޭގައި ކަރަޕްޝަން އަށަގަނެފައިވާ މިންވަރު އިތުރުވެއްޖެ ކަމަށް ޓްރާންސްޕޭރަންސީ އިންޓަރނޭޝަނަލް އިން ހާމަ ކޮށްފިއެވެ.
ޓްރާންސްޕޭރަންސީ އިންޓަނޭޝަނަލްއިން އަންގާރަ ދުވަހު ނެރުނު 2024 ވަނަ އަހަރުގެ ކޮރަޕްޝަން ޕަސެޕްޝަންސް އިންޑެކްސް (ސީޕީއައި) އިން ދިވެހިރާއްޖޭގެ ސީޕީއައި ސްކޯރ 39ން 38ށް ވަނީ ދަށްވެފައެވެ.
ޓްރާންސްޕޭރަންސީގެ ރިޕޯޓުގައި ފާހަގަ ކޮށްފައިވާ ގޮތުގައި ރާއްޖެ ހިމެނެނީ، 50 އަށްވުރެ ދަށުން ޕޮއިންޓް ލިބިފައިވާ ތިންބައިކުޅަ ދެބައި ޤައުމުތަކުގެ ތެރޭގައި ކަމަށެވެ.
ޓްރާންސްޕޭރަންސީ އިން އަހަރަކު އެއްފަހަރު ނެރޭ ރިޕޯޓުގައި ގައުމުތައް ދަރަޖަ ކުރާއިރު ސަރުކާރުގެ ތެރޭގައި ކޮރަޕްޝަން އަށަގަނެފައިވާ މިންވަރު ބެލުމުގައި، ސާރވޭތަކާއި މާހިރުންގެ ދިރާސާތަކުގެ މައްޗަށް ބަލާ ކަމަށް އެ ޖަމްއިއްޔާ އިން ބުނެފައި ވެއެވެ. މިއަހަރު، ސީޕީއައި އަމާޒު ކޮށްފައި ވަނީ މުޅި ދުނިޔޭގައި މޫސުމަށް އަންނަ ބަދަލުތަކާ ދެކޮޅަށް ފިޔަވަޅު އެޅުމުގައި ކޮރަޕްޝަންގެ ސަބަބުން ކުރާ ނޭދެވޭ އަސަރުތަކުގެ މައްޗަށެވެ.
ދައުލަތުގެ ތެރޭގައި ކަރަޕްޝަން ހިމެނޭ މިންވަރު ގިންތި ކުރާ މި އިންޑެކްސް ގައި ސުމެއް (0) އެއީ ކޮރަޕްޝަންގެ އަމަލުތައް ވަރަށް ބޮޑު ކަމަށް ގަބޫލު ކުރެވޭ މިންވަރެވެ. އަނެއް ކޮޅުން 100 އަކީ ކަރަޕްޝަންގެ އަމަލުތައް ވަރަށް މަދުކަމަށް ގަބޫލު ކުރެވޭ މިންވަރެވެ.
ދިވެހިރާއްޖެ އަށް 2024 ވަނަ އަހަރު ލިބިފައިވާ ސްކޯ އަކީ 38 އެވެ. އަހަރުގެ ސީޕީއައި ގައި 180 ޤައުމުގެ ތެރެއިން ރާއްޖެ ހިމެނިފައިވަނީ 96 ވަނައިގައެވެ.
ޓްރާންސްޕޭރަންސީ އިން ބުނެފައިވަނީ ރާއްޖޭގެ ސްކޯއިން ކޮރަޕްޝަނާ ދެކޮޅަށް ކުރެވޭ މަސައްކަތްތަކުގައި މާބޮޑު ކުރިއެރުމެއް ނުވަތަ އެއްވެސް ކުރިއެރުމެއް ލިބިފައިނުވާކަމެވެ. އޭގެ އިތުރުން ކަރަޕްޝަންގެ އަމަލުތަކުގައި ބައިވެރިވާ ސިޔާސީ އަދި ދައުލަތުގެ އިސް މުވައްޒަފުން ޒިންމާދާރު ކުރުވުމަށް ކުރަން ޖެހޭ ތަހުގީގު ކުރުމާއި ދައުވާ ކުރުމާއި އަދި ގާނޫނުތައް ތަންފީޒު ކުރުން ހަރުދަނާ ކުރަން ޖެހޭ ކަމަށެވެ.
"ގައުމުގައި ނިޒާމީ ގޮތެއްގައި ކަރަޕްޝަންގެ އަމަލުތައް ދައުލަތުގެ އެންމެ މަތީ ފަންތީގައި އަށަގަނެފައި ވާއިރު މަސްލަހަތު ހާމަ ކުރުމާއި، ކަރަޕްޝަންގެ އަމަލުތަކުން ވަގަށް ނަގާފައިވާ ފައިސާ އާއި މުދާ ދައުލަތައް އަނބުރާ ހޯދުމަށް ކުރެވޭ މަސައްކަތައް ބޮޑެތި ރިފޯމުތަކެއް ގެންނަން ޖެހިފައިވާ ކަން ފާހަގަ ކުރަމެވެ." ރިޕޯޓުގައި ވެއެވެ.
