ހޮނިހިރު ދުވަހު އޮތް ބައި-އިލެކްޝަންގެ ނަތީޖާ އާއެކު ނ. މިލަދޫ ފެނަކައިގެ 3 މެނޭޖަރަކު ކުއްލި ގޮތަކަށް ސަސްޕެންޑް ކޮށްފައިވާ އިރު، އެ މުވައްޒަފުން ވަޒީފާއިން ސަސްޕެންޑްކުރި ސަބަބެއް މިހާތަނަށް އަންގާފައި ނުވާ ކަމަށާއި، ވާނުވާގައި ތިބިކަމަށް އެ މުވައްޒަފުން ބުނެފިއެވެ.

ސަސްޕެންޑް ކުރީ ސްޓޭޝަން މެނޭޖަރު މުހައްމަދު ހުސެއިން އާއި ޑެޕިއުޓީ މެނޭޖަރު ހާމިދު ހުސެއިން އާއި އެސިސްޓެންޓް މެނޭޖަރު މުހައްމަދު އަލީއެވެ.

ތިން މުވައްޒަފުންނަށް ވަކި ވަކިން އާދިއްތަ ދުވަހު ފެނަކަ ކޯޕަރޭޝަން ލިމިޓެޑުން ފޮނުވި ސިޓީގައި ވަނީ އެއް އިބާރާތެއްކަން ފާހަގަ ކުރެވެއެވެ.

މި ނޫހަށް ފެނިފައިވާ އެ ސިޓީތަކުގެ ކޮޕީ ގައި ވަނީ އެ މުވައްޒަފުންނާ ގުޅުން ހުރި މައްސަލަ އެއް ތަހުގީގު ކުރަމުންދާތީ އެ މައްސަލައިގެ ތަހުގީގުގައި އިތުރަށް ބަލަން ޖެހޭ ކަންކަން ހުރުމުން ފެބްރުއަރީ 10 ން ފެށިގެން 14 ދުވަހުގެ މުއްދަތައް ވަގުތީ ގޮތުން އޮފީހަށް ނުކުތުން މަނާ ކޮށްފައިވާ ކަމަށެވެ. ސިޓީގައި ބަލަނީ ކޮން މައްސަލައެއް ކަމެއް ބުނެފައެއް ނުވެއެވެ.

ރާއްޖެއެމްވީއަށް މައުލޫމާތު ދެމުން މި ތިން މުވައްޒަފުންވެސް ބުނެފައިވަނީ ވަޒީފާއިން ސަސްޕެންޑްކޮށްފައި ވަނީ ކޮން ސަބަބަކާއި ގުޅިގެން ކަމެއް މިހާތަނަށް ބުނެފައި ނުވާ ކަމަށެވެ. އަދި ސަސްޕެންޑްކުރަން ފޮނުވި ލިޔުމުގައިވެސް އޮތީ މައްސަލައެއް ބަލަމުން އަންނަ ކަމަށާއި، އެކަމާއި ގުޅިގެން އޮފީހުންވެސް އިތުރު ތަފްސީލެއް ދީފައި ނުވާ ކަމަށެވެ.

މީގެ އިތުރުން މުވައްޒަފުން ބުނެފައިވަނީ އެމީހުންނާއި ގުޅޭ އެއްވެސް މައްސަލައެއް މިހާތަނަށް ބަލާފައި ނުވާ ކަމަށެވެ. އަދި މައްސަލައެއް ބަލަމުންދާކަމުގެ މައުލޫމާތެއްވެސް ލިބިފައި ނުވާ ކަމަށާއި، އަހުލާގީ އަދި އިދާރީ މައްސަލައެއްވެސް ޖެހިފައި ނުވާ ކަމަށެވެ. އަދި އޮފީހަށް ނުކުތުން މަނާކޮށްފައިވާ ކަމަށް ލިޔުމުގައި ބުނެފައިވީ ނަމަވެސް، މިހާތަނަށް އެއީ ކޮން މައްސަލައެއްކަމެއް ސާފުކުރުމަށް މަސައްކަތް ކުރިނަމަވެސް އެކަމުގެ މައުލޫމާތެއް ފެނަކަ މައި އޮފީހުންވެސް ސާފުވާގޮތް ނުވިކަމަށް ބުނެފައިވެއެވެ.

ހޮނިހިރު ދުވަހު އޮތް އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ ބައި އިލެކްޝަންގައި ވެރިކަން ކުރާ ޕީއެންސީގެ ކެންޑިޑޭޓް އާ ވާދަ ކޮށް އެމްޑީޕީގެ ކެންޑިޑޭޓް ބޮޑު ތަފާތަކުން ވަނީ މޮޅުވެފައެވެ.

މައުލޫމާތު ލިބިފައިވާ ގޮތުގައި އިންތިޚާބުގައި ވޯޓު ލުމުގެ ކުރިން ފެނަކައިގެ ޑެޕިއުޓީ މެނޭޖިންގ ޑިރެކްޓަރ މުހައްމަދު އަބްދުލް ކަރީމް (ރުކުމާ) މިލަދޫ އަށް ޒިޔާރަތް ކުރައްވާ ފެނައިގެ މުވައްޒަފުންނާ ބައްދަލު ކޮށް ސަރުކާރުގެ ކެންޑިޑޭޓަށް ވޯޓު ދިނުން އެދޭ ކަމަށް ވަނީ ބުނެފައެވެ.

ފެނައިކައިގެ 3 މުވައްޒަފުން ސަސްޕެންޑް ކުރި މައްސަލައިގައި އެރަށުން ވާހަކަ ދެއްކި ފަރާތަކުން ބުނީ އެ ތިން މުވައްޒަފުންގެ ކުށަކީ ޕީއެންސީ އަށް ކެމްޕޭން ކުރަން އަމަލީ ގޮތުން ނޫޅުން ކަމަށާއި އެއީ އެހެން ކުށެއް އޮވެގެން އެޅި ފިޔަވަޅެއް ނޫން ކަމުގައެވެ.