ސަރުކާރުގެ ގޮތެއް ފޮތެއް ނެތް، ބައި-އިލެކްޝަނަށް ފަހު ލަންދޫގައި ވެސް ވަޒީފާތައް ބަހާލައިފި
މިހާރު ލަންދޫގައި ތިބި ފެނަކައިގެ މުވައްޒަފުންގެ އަދަދު 35 އަށް ވަނީ އަރާފަ
އަލަށް ފެނަކަ އަށް ވަތް މުވައްޒަފުންނަށް މަރުޚަބާ ކިޔުމަށް ބޭއްވި ހަފްލާގެ ތެރެއިން
ހޮނިހިރު ދުވަހު ބޭއްވި ބައި-އިލެކްޝަންގައި ލަންދޫގެ ޑަބްލިޔުޑީސީ ގޮނޑި ޕީއެންސީ އަށް ލިބުމާއި އެކު ފެނަކަ ކޯޕަރޭޝަނުން އިތުރު ވަޒީފާތަކެއް ބަޔަކަށް ދީފިއެވެ.
ރާއްޖެއެމްވީ އަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި އަލަށް ފެނަކައިން 10 ވަޒީފާ ވަނީ ހަމަޖައްސާދީފައެވެ. މި ވަޒީފާތަކަކީ މިއީ އިންތިޚާބު ކާމިޔާބުވުމާއި ގުޅިގެން ދޭނެ ކަމަށް ސަރުކާރުން ވައުދުވި ވަޒީފާތަކެއް ކަަމަށް ވެސް މި ނޫހަށް ވަނީ މައުލޫމާތު ލިބިފައެވެ. އޭގެ ތެރެއިން 5 މީހުން ހޯމަ ދުވަހު ވަޒީފާ އަށް ނެރެފައިވާ އިރު ބާކީ ތިބި މީހުންނަށް ވެސް ވަޒީފާ ދިން ކަމުގެ ޗިޓު ފޯރުކޮށްދީފައިވާކަން ރާއްޖެއެމްވީ އަށް ވަނީ ކަށަވަރުވެފައެވެ.
ހޯމަ ދުވަހު ލަންދޫ ފެނަކަ ބްރާންޗަށް ވަޒީފާ އަށް ނެރުނު މީހުންގެ ތެރޭގައި ހިމެނެނީ ދެ އެޑްމިން އޮފިސަރުންނާއި، ދެ ޓެކްނީޝަނުންގެ އިތުރުން ސުޕަރވައިޒަރެކެވެ. މީގެ އިތުރުން ފެނަކައިގައި ވަޒީފާ އަދާކުރަމުންދާ 5 މީހަކަށް ޕްރޮމޯޝަން ވެސް ދިނުމަށް ހަމަޖެހިފައިވާކަމަށް މި ނޫހަށް ވަނީ މައުލޫމާތު ލިބިފައެވެ. އޭގެ ތެރެއިން ބައެއް މީހުންނަށް ހޯމަ ދުވަހު ވަނީ ޕްރޮމޯޝަން ދީފައެވެ. އެގޮތުން ޕްރޮމޯޝަން ދީފައިވާ މީހުންގެ ތެރޭގައި އެސެސިސްޓެންޓް މެނޭޖަރކަމުގެ މަޤާމް ދިން މީހަކާއި، ސީނިއާ ސުޕަރވައިޒަރކަމުގެ މަޤާމް ދިން މީހެއް ހިމެނެއެވެ.
އެއާއި އެކު ލަންދޫގައި ތިބި ފެނަކައިގެ މުވައްޒަފުންގެ އަދަދު 35 އަށް ވަނީ އަރާފައެވެ.
މީގެ ކުރިން ލޯކަލް ކައުންސިލްގެ ބައި-އިލެކްޝަނަށް މަކުނުދޫ ތައްޔާރު ވަމުން ދިޔަ ދަނޑިވަޅާއި ދިމާކޮށް ކުއްލި އަކަށް ސަރުކާރުން ވަނީ އެ ރަށުގައި ވެސް ވަޒީފާތަކެއް ބަހާލާފައެވެ.
ވަޒިފާތަކަށް މީހން ނަގަމުންދަނީ އިއުލާނު ކުރުމެއް ނެތި އެއްވެސް އުސޫލެއް ގޮތެއް ފޮތެއް ނެތި ކަމަށް މައުލޫމާތު ލިބިފައިވެއެވެ.
އަނެއްކޮޅުން އިންތިޚާބުން ޕީއެންސީގެ ކެންޑިޑޭޓް ބަލިވި ނ. މިލަދޫގެ ފެނަކައިގައި މަސައްކަތް ކުރާ 3 މުއްވަޒަފަކު ވަނީ ކުއްލި ގޮތަކަށް ސަސްޕެންޑް ކޮށްފައެވެ.
ހޮނިހިރު ދުވަހު ކުރިއަށްދިޔަ އިންތިހާބު ބޭއްވި ދާއިރާތަކުން ސަރުކާރު ހިންގާ ޕީޕަލްސް ނެޝަނަލް ކޮންގްރެސް އިން 9 ގޮނޑި، އިދިކޮޅު މޯލްޑިވިއަން ޑިމޮކްރެޓިކް ޕާޓީ އިން 2 ގޮނޑި ވަނީ ކާމިޔާބުކޮށްފައެވެ.
