އައު ސީޒަނަށް ތަައްޔާރުވުމުގެ ގޮތުން އިންޓަރ މިއާމީން ކުޅުނު ރަޙުމަތްތެރިކަމުގެ މެޗުގައި އޮލިމްޕިއާ ބަލިކޮށްފި އެވެ.

އަދީއްތަ ދުވަހުގެ ފަތިހު އޮލިމްޕިއާއާ ދެކޮޅަށް ކުޅުނު މެޗު މިއާމީން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި މިއާމީން ތިން ލަނޑު ޖެހިއިރު، ދެ ވަނަ ހާފުގައި ވަނީ އަނެއް ދެ ލަނޑު ޖަހައިފަ އެވެ.

މެޗު ފަށައިގެން 27 ވަނަ މިނެޓުގައި މިއާމީ އަށް ލީޑު ނަގައިދިނީ ކެޕްޓަން ލިއޮނަލް މެސީ އެވެ. އޭގެ ފަހުން ފުރަތަމަ ހާފުގެ 44 ވަނަ މިނެޓުގައި މިއާމީގެ ދެ ވަނަ ލަނޑު ޖެހީ ފެޑެރިކޯ ރެޑޮންޑޯ އެވެ. އަަދި މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ނޯހް އާލެން ވަނީ މިއާމީގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި މިއާމީގެ ހަތަރު ވަނަ ލަނޑު ޖެހީ އުރުގުއޭގެ ލުއިސް ސުއަރޭޒް އެވެ. އަދި މެޗުގައި މިއާމީގެ ފަހު ލަނޑު ރަޔަން ސެއިލާ ޖެހީ މެޗުގެ 79 ވަނަ މިނެޓުގަ އެވެ.

އައު ސީޒަންެގެ މޭޖާ ލީގު ސޮކާ (އެމެރިކާ ލީގު)ގެ ކުޅުން ފެށުމުގެ ކުރިން މިއާމީން ރަޙުމަތްތެރިކަމުގެ އެއް މެޗު ކުޅޭނެ އެވެ. އެއީ ފެބްރުވަރީ މަހުގެ 15 ވަނަ ދުވަހު އޯލަންޑޯ ސިޓީއާ ދެކޮޅަށް ކުޅޭ މެޗެވެ. އޭގެ ފަހުން މިއާމީން ކޮންކާކަފް ޗެމްޕިއަންސް ކަޕްގެ މެޗު ވެސް ކުޅޭނެ އެވެ. އަދި އެމެރިކާ ލީގުގެ ފުރަތަމަ މެޗުގައި ފެބްރުވަރީ މަހުގެ 23 ވަނަ ދުވަހު ނިކުންނާނީ ނިއުޔޯކް ސިޓީއާ ދެކޮޅަށެވެ.