މީހުން ބުނެއެވެ. ގެންދަވާނީ ދައްކަވާނެ ތަނެއް ދައްކަވާފައެވެ. އެކަމުގައި ނަގާނީ ވަގުތެވެ. ބައެއްފަހަރު އަވަހަށެވެ. އަނެއްބައިފަހަރު ލަހުންނެވެ. މިފަހަރު ބުޅާ ގޯނިން ބޭރުމިވީ މާއަވަހަށެވެ. ފެންނާނޭކަމަށް ކުރިންވެސް ހީކުރެވުނު މަންޒަރުތައް ފެންނާން މިފެށީ މާ ގިނަ ދުވަހެއް ނުވެއެވެ. ނޫނޭވާ މިއީ މަޖާ ކަމަކަށްވާނެއެވެ. ލައްކަ ކުޅިސަމާ ފެންނާނެހެން ހީވެޔެވެ.
އަދި މިއުޅެނީ ވެރިކަމުގެ ފުރަތަމަ އަހަރުވެސް ނުނިމިއެވެ. ރައީސް ޔާމީން ނެރެފައި ތިމަންނާ ޖަލުގައި ބާއްވާށޭ ބުނެ ގިސްލަ ގިސްލާފައި އުޅުނު އަބްދުއް ރަހީމް، ރައީސް ޔާމީނަށް އެދެއްވީ ކުރުދޮށީންނެވެ. ޢަބްދުއްރަހީމް އެފަޅާލީ ބޮޑު ވާހަކައެކެވެ. އިންތިޚާބުގެ ކުރިން އެވާހަކަތައް ވިދާޅުވިނަމަ "ހީލަތުން" ހޯދި ޓިކެޓަށް ވެރިކަން ނުލިބިދާނެތީ ނުދައްކާ އޮބަހައްޓައިގެން ހުރި ވާހަކަތަކެވެ. އޭރުވެސް ސިޔާސީ މީހުންނާއި ކަންކަން ދިރާސާ ކުރާމީހުން ޖެހި ހިސާބުތަކާ އެއްގޮތައް ބަރާބަރަށް އެހެރަ ދިމާވީއެވެ.
އޭރުވެސް ޕީޕީއެމްއާއި ޕީއެންސީގެ އެތެރެއިންނާއި ބޭރުން އަދި އާއްމު މީހުން އަބްދުއްރަހީމް އެވިދާޅުވި ވާހަކަތައް ދައްކާއުޅުނެވެ. އޭރުގެ މާލެ ސިޓީގެ މޭޔަރު ޕީއެންސީގެ ޓިކެޓް ހޯއްދަވަން ކުރެއްވި ކަންކަމާއި އެކަމުގެ ބައިވެރިންނާއި ކަންކުރި ގޮތުގެ ވާހަކަތައް ދޫދޫމަތިން ހަމަ ރަނގަޅަށް ދެކެވުނެވެ. އެކަމަކު ތަފާތުވީ އޭރު ދެއްކި ކުލަތަކެވެ. ރައީސް ޔާމީން ނޫން މީހަކު ބޭނުން ނެތްކަމަށް ދައްކައިގެން ދެއްކި ރީތި ދަޅައެވެ. ޕާޓީގެ އާއްމު މެންބަރުންގެ ލޮލުގައި އެޅުވި އަނދުނެވެ. ރުއި ރުއިމާއި އެމަނިކުފާނު "ނެތް ދުނިޔެ އެއްގައި ނޫޅެވޭނެ" ފަދަ ބީދައަކަށް ކުރި މޮޅު އެކްޓެވެ. އެއީވާ ސަޅި ފިލްމެކެވެ. ބެލުންތެރިން އޭގައި ބައިވެރިކޮށްގެން ކުޅުނު ޗާލު ފިލްމެކެވެ. ފިލްމު ދެބަޔަށް ދިޔައިރު ފިލްމުން ލިބުނު ކާމިޔާބު ވަރަށް ބޮޑެވެ. ޕާޓީ މީހުންކޮޅަށް ދެއްކި ރީތި ޗާލާކީ ވާހަކަތަކާއި ބޭނުންކުރި ހުސްގޮނޑިއާއި ރައީސް ޔާމީން ސަލާމަތް ކުރާނެ ކަމަށްބުނެ ކެނޑި ބައިސާތަކާއެކު ވެރިކަން ލިބުނީއެވެ. އިންތިހާއަށް ބަހާލި ސިޔާސީ ވަޒީފާތަކާއި މުޅި ސަރުކާރުގެ ނުފޫޒާއެކު މަޖިލިސްވެސް ނެގީއެވެ. އެއާއެކު އަސްލު ސޫރައަށް ރުޖޫއަވެ ކަންކުރިގޮތް ވަރަށް ސާފުކޮށް އަބްދުއްރަހީމް އެވިދާޅުވެދެއްވީއެވެ. މާކުރިންވެސް ޗާޓު އޮތީ ކުރެހި ނިމިފައިކަމާއި އޭގައި ރައީސް ޔާމީންގެ ނަންފުޅުވެސް ނެތްކަން ހާމަކުރެއްވީއެވެ. އަދި ޑރ މުއިއްޒަށް ބައިއަތު ހިފައި ޓިކެޓް ދިނުމަށް ނިންމާ އެކަން ކުރެއްވިގޮތްވެސް އަކުރުން އަކުރަށް އެ ހާމަކުރެއްވީއެވެ.
އަބްދުއްރަހީމްގެ ވާހަކައިގާ އަމިއްލަފޮށާ ބޮލުގައި އެޅޭހާ މިންވަރަށްވެސް ވިދާޅުވީއެވެ. އަބްދުއްރަހީމްވެސް ވާގިވެރިވެގެން އެނޫން ވަރެއް ނެތިގެން ކުރި ރައީސް ޔާމީންގެ ވެރިކަމަށް ޚުދު އަބްދުއްރަހީމްވެސް ފާޑު ވިދާޅުވީއެވެ. މުޅި ރާއްޖޭގެ އެންމެންހެން ދައްކަމުންދިޔަ "ސަދަގާތު ފައުންޑޭޝަނާއި، ހައްޖު ކޯޓާއާއި، ކަދުރުގެ ވާހަކައަށް ދަންދެން ގޮވާލެއްވިއިރު އެކަން އޭރު ދިފާއު ކުރުމުގައި އެންމެ އިސްކޮށް ހުރި އެކަކީ އަބްދުއްރަހީމެވެ. ކޮރަޕްޝަންގެ ވާހަކަ ނުލާހިކު ރީތިކޮށް ގޮވާލިއިރު އޭގައި ހިމެނިގެން އަބްދުއްރަހީމާއި އަނބިކަނބަލުންގަތް އަގުބޮޑު ފުލެޓްތަކާއި ދަރިކަލުންގެ އައިނަކަށް ކުރި ބޮޑު ޚަރަދުގެ ވާހަކަ އޭރުވެސް މީހުން ދައްކައި އުޅުނެވެ.
ކޮންމެއަކަސް އަބްދުއްރަހީމް ކުރުދޮށިން ރައީސް ޔާމީނަށް ދެއްވި ދެއްވުމަކީ ފިސާރި މަޖާ ފިލްމެއްގެ ފެށުމެވެ. އެވެރިން އެވެރިންނަށް ކޮށްފައިހުރި ކަންކަނަ އަމިއްލައަށް ދާނީ ހާމަކުރަމުން ނިއުޅަމުންކަމަށް ބެލެވެއެވެ. އަބްދުއްރަހީމް ދެއްކެވި ވާހަކަތަކަށް ދެން ފެންނާނެ ރައްދުތަކާއި ބައެއް ފޮޓޯ ވީޑިއޯ ތިލަވާނެ ކަމީ މުޖައްރިބު ކަމެކެވެ. މިހާރުވެސް ސޯޝަލް މީޑިއާގައި ކުރަމުންދާ ކޮމެންޓްތަކާއި އެކި މީހުންގެ ވާހަކަތަކުން އެކަމަށް ހެކިދެއެވެ. އިސާހިތަކު މިފެށެނީ އަނެއްކާ އާ ފިލްމެކެވެ. ރައްޔިތުންނަށް އެތައްކަމެއް ހާމަވާނެ މަޖާ މޮޅު ފިލްމަކަށް ވާނެ ކަމަށް ބެލެވެއެވެ.
