މިސްކިތްތަކުގައި ފަންޑު ފޮށިތައް ބެހެއްޓުން އިތުރުވާތީ، އެކަން ރެގިއުލޭޓްކުރާނެ ގަވައިދެއް ހަދަނީ

ރާއްޖޭގެ މިސްކިތްތަކުގައި ފަންޑު ފޮށިތައް ބެހެއްޓުން އިތުރުވާތީ، އެކަން ރެގިއުލޭޓްކުރާނެ ގަވައިދެއް ހެދުމަށް ނިންމައިފިއެވެ.

މިކަމާއި ގުޅޭގޮތުން، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އެކި އެކި ޖަމިއްޔާތަކުން މިސްކިތްތަކުގައި ފަންޑުފޮށިތައް ބަހައްޓައިގެން އެކި ކަންކަމަށް ފަންޑު ހޯދަން ހުއްދައަށް އެދުން ގިނަވެގެންދާތީ، މިސްކިތްތަށް ބޭނުންކޮށްގެންކުރާ މިފަދަ ކަންކަން ރެގިއުލޭޓްކުރާނެ ގަވައިދެއް ހެދުމަށްވަނީ ނިންމާފައިވާ ކަމަށެވެ.

މިގޮތަށް ހުއްދަދެވޭނީ ހޯދާ ފައިސާ ޚަރަދުކުރާނެ ގޮތުގެ ތަފްސީލު ހުށަހެޅުމުން ކަމަށާއި، ހުއްދަ ތަކުރާރު ކުރެވޭނީ ޚަރަދުކުރިގޮތުގެ ތަފްސީލާއި އޮޑިޓް ރިޕޯޓް ހުށަހެޅުމުން ކަމަށް އުސޫލުގައި ބަޔާންވާނެ ކަމަށް މިނިސްޓަރު ޝަހީމް ވިދާޅުވިއެވެ. އަދި ވިދާޅުވީ މި އުސޫލު ހެދިގެންދާނީ ދީނީ އެއްބައިވަންތަކަން ހިމާޔަތްކުރުމުގެ ގާނޫނާއި ގަވާއިދުގެ ތެރެއިން ކަމަށެވެ.

މިއީ ކޮންމެހެން ކުރަންޖެހިފައިވާކަމެއް ކަމަށް ވެސް މިނިސްޓަރު ޝަހީމް ވިދާޅުވިއެވެ. ނަމަވެސް މި ގަވައިދު ހަދައި، އާއްމު ކުރެވޭނެ ވަކި ދުވަހެއް މިނިސްޓަރު ޝަހީމް ހާމަކުރައްވާފައިނުވެއެވެ.

މިސްކިތްތަކުގެ އިތުރުން ވެސް އާއްމުން އެއްވެ އުޅޭ އެކިއެކި ސަރަހައްދުތަކުގައި ފަންޑު ފޮށި ބަހައްޓައިގެން ފައިސާ ހޯދުން މިހާރު ވަނީ އާއްމުވެފައެވެ. ބޮޑެތި ބަލިތައް ތަހައްމަލް ކުރާ މީހުންނަށް އެހީވުމަށް ހިންގާ ހަރަކާތްތަކުގައި އެކިއެކި ޖަމިއްޔާތަކުން ވެސް ބައިވެރިވެ، އިވެންޓްތައް ކުރިއަށް ގެންދެއެވެ. ނަމަވެސް ބަލި މީހުންގެ ފޮޓޯއާއި، ޑޮކިއުމެންޓް ދައްކައިގެން އޮޅުވާލައިގެން ފައިސާ ހޯދާ މައްސަލަތަކެއް މިފަހުން ފެންމަތިވެގެންދިޔައެވެ. އެހެންކަމުން މިފަދަ ކަންކަމަށް ސަމާލުވުމަށް ކަމާބެހޭ އިދާރާތަކުން އިލްތިމާސްކޮށްފައިވެއެވެ.