އެމްޑީޕީން އިސްނަގައިގެން ސިޔާސީ ޕާޓީތަކާއެކު ވާހަކަ ދައްކާ މިޑްޓާމް އިލެކްޝަނަކަށް ދާންޖެހޭ - ރާއީ

އެމްޑީޕީން އިސްނަގައިގެން ސިޔާސީ ޕާޓީތަކާއެކު ވާހަކަ ދައްކާ މިޑްޓާމް އިލެކްޝަނަކަށް ދާންޖެހޭ ކަމަށް މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވިދާޅުވެއްޖެއެވެ.

އެމްޑީޕީގެ ހަރުގޭގައި ބޭއްވި ޖަލްސާގައި މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވިދާޅުވީ އޭނާ ގަބޫލުކުރާ ގޮތުގައި އެމްޑީޕީ އިން އިސްނަގައިގެން، ރާއްޖޭގެ އެހެން ސިޔާސީ ޕާޓީތަކާއި އެހެން ސިޔާސީ ޕާޓީތަކުގެ ވެރިންނާ ވާހަކަދައްކައިގެން މިޑްޓަރމް އިލެކްޝަނަކަށް ދާންޖެހޭ ކަމަށެވެ. އަދި އެކަމާއި ގުޅިގެން ރައީސުލްޖުމްހޫރިއްޔާ އާއި ވާހަކަ ދެއްކުނު ގޮތަކުން ދައްކަންޖެހޭ ކަމަށެވެ.

Advertisement

ރާއީ ވިދާޅުވީ އޭނާއަށް ފެންނަތަނުގައި މި ވެރިކަމެއް ފަސް އަހަރަކު ނޯންނާނެ ކަމަށެވެ. އަދި ވެރިކަން ވެއްޓި ރާއްޖެ ހަލަބޮލިވުމުގައި ކުރިން އެމްޑީޕީގެ ލީޑަރޝިޕުން ވާހަކަދައްކައިގެން މިޑްޓަރމް އިލެކްޝަނަކަށް ރައީސް ޑރ. މުހައްމަދު މުއިއްޒު ވަޑައިގަންނަވާނެ ގޮތަށް މަސައްކަތް ކުރަންޖެހޭ ކަމަށެވެ.

ދެވަނަ ކަމަކީ، މިހާރު ރާއްޖޭގެ ރައީސުލްޖުމްހޫރިއްޔާ ރަށްރަށަށް ވަޑައިގަންނަވާއިރު މާ ގަޔާވާ ކަމެއް ފެންނަ ކަމަށާއި ބަޖެޓުގައި މަޝްރޫއުތައް ނެތަސް އެކަން މިހާރު ކުރަމުންދަނީ ރައީސުލްޖުމްހޫރިއްޔާ ވަޑައިގަންނަވާ ރަށްރަށުގައި ނޯޓުގައި ލިޔެގެން ކަމަށެވެ. އެހެންކަމުން މަޖިލީހުގެ މެންބަރުން ވެސް އެ ރަށްރަށުގެ ރައްޔިތުންނަށް ގުޅިގެން އެ ކަންކަން ކުރަން، ރައީސަށް ކޮންމެ ރަށަކުން ނޯޓުދޭން އެބަޖެހޭ ކަމަށް ރާއީ ވިދާޅުވިއެވެ. ރާއީ ވިދާޅުވީ ރައްޔިތުން ބޭނުންވާ ކަންކަން ލިޔެފައި، ރައީސަށް ނޯޓުދޭން އެބަޖެހޭ ކަމަށާއި، އެއީ ރައީސް ވަރަށް ގަޔާވާ ކަމެއް ކަމަށެވެ.

ރާއީ ވިދާޅުވީ ރާއްޖޭގެ ރަށްރަށުގައި އަންހެންވެރިންނަކީ ވަރަށް ވަރުގަދަ، ވަރަށް ކެރޭ ބައެއް ކަމަށެވެ. އަންހެންވެރިން ވެސް ރައީސަށް ނޯޓެއް ދިއްކޮށްލަން ޖެހޭ ކަމަށާއި އޭގައި ލިޔާނެ އެއްޗެއް އެ ބޭފުޅުންނަށް އެނގޭނެ ކަމަށާއި، ރައީސްގެ ޢަޖުމަ ބަލައިލަންޖެހޭ ކަމަށް ރާއީ ވިދާޅުވިއެވެ.

ރާއީ ވިދާޅުވީ އެމް.ޑީ.ޕީގެ ލީނަރޝިޕްގައި ޤާބިލިއްޔަތުކަން ހުންނާނެ ކަމަށާއި ވާހަކަ ދެއްކުނު ގޮތަކަށް މާދަމާ ރޭ، މިކަން ފެށުމުގެ ކުރިން ވެސް ރައީސް މުއިއްޒާ ވާހަކަ ދެއްކޭތޯ ބަލަންޖެހޭ ކަމަށެވެ. އަދި މިޑްޓާމް އިލެކްޝަން ގެންނަން ވާހަކަ ދައްކާ އެއްބަސްނުވާނަމަ، މަސައްކަތް ފެށުމަށް ރާއީވަނީ ގޮވާލައްވާފައެވެ.