ސްޕެއިންގެ ބާސެލޯނާ އަށް ކުޅެމުން އަންނަ އުރުގުއޭގެ ޑިފެންޑަރު ރޮނާލްޑު އަރައުހޯ، އެ ކުލަބާ އެކު ސޮއި ކޮށްފައިވާ އެއްބަސްވުން އައު ކޮށްފި އެވެ.
އުމުރުން 25 އަހަރުގެ ކުޅުންތެރިޔާ ބާސެލޯނާ އަށް ބަދަލުވީ 2019 ވަނަ އަހަރު އެވެ. އެ ކުލަބާ އެކު އޭނާ ސޮއި ކުރީ ފަސް އަހަރު ދުވަހުގެ އެއްބަސްވުމެއްގަ އެވެ. އެއްބަސްވުމުގެ މުއްދަތު ހަމަވުމުން، ބާސެލޯނާ ދޫކޮށްލަން އަރައުހޯ ބޭނުންވި ކަމަށް މީޑިއާ ތަކުގައި ރިޕޯޓު ކުރި އެވެ.
ނަމަވެސް ބާސެލޯނާ އާއި އަރައުހޯއާ ދެމެދު ކުރިއަށް ގެންދިޔަ މަޝްވަރާތަކަށް ފަހު ބާސެލޯނާގައި މަޑު ކުރަން އޭނާ ނިންމީ ކަމަށް ވެސް މީޑިއާ ތަކުގައި ވަނީ ބުނެފަ އެވެ. ބާސެލޯނާ އިން މިހާރު ވަނީ އަރައުހޯގެ އެއްބަސްވުން އައުކޮށް، ރަސްމީކޮށް އެކަން އިއުލާން ވެސް ކޮށްފަ އެވެ.
ބާސެލޯނާ އާއެކު އަރައުހޯ ސޮއި ކުރީ ހަ އަހަރު ދުވަހުގެ އެއްބަަސްވުމެއްގަ އެވެ. އެެހެންކަމުން 2031 ވަނަ އަހަރުގެ ޖޫން މަހުގެ ނިޔަލަށް އޭނާ ބާސެލޯނާގައި ހުންނާނެ އެވެ. އަރައުހޯ އަކީ ބާސެލޯނާގެ ތިން ވަނަ ކެޕްޓަންގެ ތެރޭގައި ވެސް ހިމެނޭ ކުޅުންތެރިޔެކެވެ.
ބާސެލޯނާގައި މިހާތަނަށް ހޭދަކޮށްފައިވާ ހަ ސީޒަންގެ ތެރޭގައި އަރައުހޯ ވަނީ އެ ކުލަބަށް ކުޅެދިން 155 މެޗުގައި އަށް ލަނޑު ޖަހައިފަ އެވެ. އޭނާ ވަނީ ބާސެލޯނާ އާއެކު ހަތަރު ތައްޓެއް ކާމިޔާބު ކޮށްފަ އެވެ. އެއީ ސްޕެނިޝް ލީގުގެ އިތުރުން، ކޮޕާ ޑެލް ރޭ އަދި ސްޕެނިޝް ސުޕަ ކަޕް އެވެ. މީގެ ތެރެއިން ސްޕެނިޝް ސުޕަ ކަޕް ވަނީ ދެ ފަހަރެއްގެ މަތިން ކާމިޔަބު ކޮށްފަ އެވެ.
އަރައުހޯ އަކީ ބާސެލޯނާގައި މިވަގުތު ތިބި ކުޅުންތެރިންގެ ތެރެއިން އެ ޓީމު ކޯޗު ހަންސީ ފްލިކް އެންމެ އިސްކަން ދެމުން އަންނަ ކުޅުންތެރިންގެ ތެރޭގައި ވެސް ހިމެނޭ ކުޅުންތެރިޔެކެވެ. މީޑިއާ ތަކުގައި ބުނެފައިވާ ގޮތުން އަރައުހޯ ބެހެއްޓުމަށް ބާސެލޯނާ އިން އެހާ ބޮޑަށް ބާރު އެޅީ ވެސް ފްލިކްގެ އެދުމުގެ މަތީންނެވެ.
