މަގާމު ބަދަލު ކުރި ވަޒީރުންނަށް މަޖިލީހުން ރުހުން ދީފި
މިނިސްޓަރުންނަށް ރުހުން ދިނުމުގެ މައްސަލަ މަޖިލީހަށް ހުށަހެޅީ މިދިޔަ ބުރާސްފަތި ދުވަހު ދައުރުން ބޭރުން ބޭއްވި ޖަލްސާގަ
މަގާމު ދަބަލުކުރި ވަޒީރުންނަށް ރުހުން ދިނުން. ފޮޓޯ: ރައީސް އޮފީސް
ބައެއް މިނިސްޓްރީތައް އެއްކޮށްލައި، ވަޒީރުންގެ މަޖިލީހަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންނެވި ބަދަލާ ގުޅިގެން މަގާމު ބަދަލުވި ހަތަރު ވަޒީރުންނަށް ރައްޔިތުންގެ މަޖިލީހުން ރުހުން ދީފި އެވެ.
ދައުރުން ބޭރުން ހޯމަ ދުވަހު ބޭއްވި ދެވަނަ ޖަލްސާގެ ބައްދަލުވުމުގައި ރުހުން ދޭން ފާސްކުރީ ފިނޭންސް މިނިސްޓަރު، މޫސާ ޒަމީރު އާއި ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު އާއި އެގްރިކަލްޗާ އެންޑް ވެލްފެއާ މިނިސްޓަރު، ޑރ. މަރިޔަމް މާރިޔާގެ އިތުރުން ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު އަށެވެ.
މި މިނިސްޓަރުންނަށް ރުހުން ދިނުމުގެ މައްސަލަ މަޖިލީހަށް ހުށަހެޅީ މިދިޔަ ބުރާސްފަތި ދުވަހު ދައުރުން ބޭރުން ބޭއްވި ޖަލްސާގައެވެ. ކޮމިޓީން މީގެ ކުރިން ވެސް އެ މިނިސްޓަރުންނަށް ރުހުން ދީފައިވާތީ، އިއްޔެ ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީން ބޭއްވި ބައްދަލުވުމުގައި ވެސް ހުރިހާ މެންބަރުންގެ އިއްތިފާގުން ރުހުން ދިނުމަށް ވަނީ ފާސްކޮށްފައެވެ.
އޭގެއިތުރުން، ހޯމަ ދުވަހު ބޭއްވި ޖަލްސާގައި އެ މިނިސްޓަރުންނަށް ރުހުން ދޭން ވޯޓަށް އަހައި، ހަތަރު މިނިސްޓަރުންނަށް ވަނީ ރުހުން ދީފައެވެ.
އެގޮތުން، ޕްލޭނިން އެންޑް ފިނޭންސް މިނިސްޓަރު ކަމަށް ޒަމީރު އައްޔަން ކުރުމަށް 67 މެންބަރުންގެ އިއްތިފާގުން ވަނީ ފާސްކޮށްފައެވެ.
ކޮންސްޓްރަކްޝަން، ހައުސިން އެންޑް އިންފްރާސްޓަކްޗާ މިނިސްޓަރު ކަމަށް މުއްތަލިބު އައްޔަން ކުރަން ފާސްކުރީ ވެސް 69 މެންބަރުންގެ އިއްތިފާގުންނެވެ. އަދި އެގްރިކަލްޗާ އެންޑް އެނިމަލް ވެލްފެއާ މިނިސްޓަރަކަށް މާރިޔާ އައްޔަންކުރަން ފާސްކުރީ 70 މެންބަރުންގެ އިއްތިފާގުންނެވެ.
ހަޔާ އެޑިއުކޭޝަން ލޭބާ އެންޑް ސްކިލްސް މިނިސްޓަރު ކަމަށް ޑރ. ހައިދަރު އައްޔަން ކުރަން 64 މެންބަރުން ތާއިދުކުރިއިރު، ހަ މެންބަރަކު ވަނީ ދެކޮޅަށް ވޯޓު ދެއްވާފައެވެ. އެއީ އިދިކޮޅު އެމްޑީޕީއަށް ނިސްބަތްވާ މެންބަރުންގެ އިތުރުން ޕީއެންސީއަށް ނިސްބަތްވާ ދާންދޫ ދާއިރާގެ މެމްބަރު މުޙައްމަދު ފަޒީލް އެވެ.
މީގެ ކުރިން ވެސް ރައީސް މުއިއްޒު ވަނީ ވަޒީރުންގެ މަޖިލީހަށް ބަދަލު ގެންނަވާފައެވެ.
މިދިޔަ ޑިސެމްބަރު 26، ގައި ރައީސް މުއިއްޒު ގެންނެވި ބަދަލުގެ ދަށުން ހައުސިން މިނިސްޓްރީ އުވާލައި، އެ މިނިސްޓްރީގެ ދަށުން ހިންގަމުންދިޔަ ޕްލޭނިންގެ މަސައްކަތްތައް ފިނޭންސަށް އަދި ހައުސިންގެ މަސައްކަތްތައް ކޮންސްޓްރަކަޝަން މިނިސްޓްރީއަށް ވަނީ ބަދަލުކޮށްފަ އެވެ.
އެ ބަދަލު ގެންނެވުމަށްފަހު ހައުސިން މިނިސްޓަރަކަށް ހުންނެވި ޑރ. އަލީ ހައިދަރު ބަދަލު ކުރެއްވީ ހަޔާ އެޑިއުކޭޝަން މިނިސްޓަރަށެވެ. ހަޔާ އެޑިއުކޭޝަން މިނިސްޓަރުކަމުގައި ހުންނެވި ޑރ. މަރިޔަމް މާރިޔާ ބަދަލު ކުރެއްވީ އެގްރިކަލްޗާ އެންޑް އެނިމަލް ވެލްފެއާއަށެވެ.
