ގޯއްޗާއި ފްލެޓް ދޫނުކުރާނަމަ ސީދާ ހަރަކާތަށް ނުކުންނާނެ ކަމަށް އެ ޕާޓީން ވަނީ ބުނެފަ
ގޯއްޗާއި ފްލެޓްގެ މައްސަލައިގައި ކުރަމުންދާ އިހުތިޖާޖުގެ ތެރެއިން
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ދޫކޮށްފައިވާ ފްލެޓާއި، ގޯތިތައް ދޫނުކޮށް ލަސްކުރާ މައްސަލައިގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ހައުސިން މިނިސްޓްރީ އަށް ހުށަހެޅި ސިޓީގެ ޖަވާބު އަދިވެސް ނުލިބޭކަމަށް އެ ޕާޓީ އިން ބުނެފިއެވެ.
7 ޖެނުއަރީގައި ހުށަހެޅި އެ ސިޓީގެ ޖަވާބު ނުލިބޭކަން ހާމަަކުރައްވާ ވާހަކަ ދައްކަވަމުން ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒް ވަނީ މި މައްސަލައިގައި ސަރުކާރުން އަމަލުކުރާ ގޮތަށް ފާޑުވިދާޅުވެފައެވެ. ނިޔާޒް މި މޭރުމުން ވާހަކަދައްކަވާފައި ވަނީ ގޯއްޗާއި ފްލެޓް ދިނުން ލަސްވާތީ ހައުސިން މިނިސްޓްރީ ކައިރީގައި އާއްމުން ކުރި އިހުތިޖާޖުގައި ބައިވެރިވެވަޑައިގެން ރާއްޖެއެމްވީ އަށް ދެއްވި ބަސްދީގަތުމެއްގައެވެ.
އެގޮތުން، ކުރީ ސަރުކާރުގައި ދޫކޮށްފައިވާ ފްލެޓާއި، ގޯތިތައް ކުރިއަށް އޮތް މަސްދުވަހުގެ ތެރޭގައި ދޫކުރަންޖެހޭނެ ކަމަށާއި، އެކަން ނުކޮށް ތިބީ ސިޔާސީ މަގްސަދެއްގައި ކަމަަަަށް ނިޔާޒް ވިދާޅުވިއެވެ. އަދި އާއްމު ރައްޔިތުންގެ ހައްގުތައް ހޯދުމަށް އެމްޑީޕީން ކުރާ މަސައްކަތް ކުރިއަށް އޮތްތަނުގައި އިތުރަށް ވަރުގަދަ ކުރާނެ ކަމަށް ނިޔާޒް ވަނީ ވިދާޅުވެފައެވެ. އެ މަސައްކަތް ކުރުމަށް އެމްޑީޕީގެ އެތެރޭގެ ކޮމިޓީތައް ވެސް އެކުލަވާލާފައިވާ ކަމަށާއި ބޯހިޔާވަހިކަމުގެ މައްސަލަ އަަށް އެމްޑީޕީން ޚާއްސަ ސަމާލުކަމެއް ދޭ ކަމަށް ނިޔާޒް ވަނީ ވިދާޅުވެފައެވެ.
މީގެ އިތުރުން، އެމްޑީޕީން ހުށަހަޅާފައިވާ ސިޓީގެ ޖަވާބު ހޯދުމަށް ހައުސިން މިނިސްޓްރީ އަށް އެމްޑީޕީން އާދިއްތަ ދުވަހު ދިޔަ ނަމަވެސް ހައުސިން މިނިސްޓްރީ އަށް ވަނުމަށް ފުރުސަތު ލިބިފައި ނުވާ ކަމަށް ނިޔާޒް ފާހަގަކުރެއްވިއެވެ. ދަރުބާރުގޭގައި މިހާރު ހިންގާ ހައުސިން މިނިސްޓްރީގެ ސެކިއުރިޓީ ބަލަހައްޓަން ފުރުސަތު އެ ފަރާތްތަކަށް ދީފައި ނުވަނީ އެ ސަރަހައްދުގައި އިހުތިޖާޖުކުރާ މީހުންނަށް އެތެރެއަށް ނުވަދެވޭނެ ކަމަށް ބަޔާންކުރުމަށް ފަހުގައި ކަމަށް ވެސް ނިޔާޒް ވަނީ ވިދާޅުވެފައެވެ. އެހެންނަމަވެސް އެމްޑީޕީން ރަސްމީކޮށް ހުށަހަޅާފައިވާ ސިޓީ އެއްގެ ޖަވާބު ހޯދަން އައިކަމަށް ބުނުމުން ވެސް މިނިސްޓްރީ ތެރެއަށް ވަދެވޭ ގޮތް ނުވިކަމަށް ނިޔާޒް ފާހަގަކުރެއްވިއެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ދޫކޮށްފައިވާ ފްލެޓާއި، ގޯތިތައް ކުރިއަށް އޮތް މަސްދުވަހުގެ ތެރޭގައި ދޫކުރަންޖެހޭނެ ކަމަށް އެމްޑީޕީން ވަނީ ބުނެފައެވެ. އަދި ގޯއްޗާއި ފްލެޓް ދޫނުކުރާނަމަ ސީދާ ހަރަކާތަށް ނުކުންނާނެ ކަމަށް އެ ޕާޓީން ވަނީ ބުނެފައެވެ. މީގެ އިތުރުން ވަގު ލިޔުންތަކެއް ބޭނުންކޮށްގެން ހައުސިން ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ އެއްބަޑު އެއްބަފާ ބޭބެއަށް ހުޅުމާލެ-ފޭސް2 އަކުން ގޯއްޗެއް ދޭން މަސައްކަތް ކުރި މައްސަލައިގެ ޒިންމާވެސް ސަރުކާރުން ނަގަން ޖެހޭނެ ކަމަަށް އެ ޕާޓީން ވަނީ ބުނެފައެވެ.
ސަރުކާރުން އެންމެ ފަހުން ބުނެފައި ވަނީ ރޯދައިގެ ކުރިން ފްލެޓް ލިސްޓް އާއްމު ކުރާނެ ކަަމަށެވެ. ނަމަވެސް އެކަން އެގޮތަށް ހިނގާފާނެކަމާއި މެދު އާއްމުން ދަނީ ސުވާލު އުފައްދަމުންނެވެ.
